Ebərəje 6 - Dɔnɔn kə̂ Siki: Tar kə̂ aw arə təbbə

¹ Mba yeenn bba, maji karə n-naynje kə dɔ dɔngɔr nɛ̂n-tɔjuje tə̂ kə̂ dɔ Kristə tə̂ le ang, a jawje kə nɛ̂n-tɔjuje tə̂ kə̂ toje to lə dəwje kə̂ tɔkə. Ja təlje dɔ nɛ̂n-tɔju tə̂ kə̂ dɔngɔr le ang ngaa. Nɛ̂n-tɔjuje kə̂ dɔngɔr le to ənga turu-mə ta kinya nɛ̂n-ddaje kə̂ aw awje kə dəw karə inga yo, tar kunn-mə karə Lubba,

² tar batɛmje, tar kila ji dɔ dəwje tə̂, tar ndol lə dəwje kə̂ oyje kə tar sariya kə̂ to kə ndɔ kə ndɔ le.

³ Jinya nɛ̂njeenn a jawje kə kete. Bbo Lubba ndiki a, ja ddaje tokə baann.

⁴ Marə dəwje, lo-karɛ lə Lubba dda arə kəmde uja, dingaje nɛ̂n-karə-baa kə̂ in darâ ngaâ dingaje Ndil-mə-nda.

⁵ N̂-gərəje maji lə tar lə Lubba ngaâ n̂-gərəje singa-mɔnguje lə Lubba kə̂ a toje ndɔ tə̂ kə̂ nâ ddee kɔn-mbay.

⁶ A n̂-tusuje mə-kunn ləde dinyaje. Dede le, ddəw təl kə de karə n̂-turu məde tokə siki goto ngaa. Mba yeenn nayn to n̂-təl n̂-tɔlje Ngonn lə Lubba dɔ kakə-dəsə tə̂ ngaâ darəje ddəw karə dəwje tajɛ̂je.

⁷ Junnje nɛ̂n-kɔju-marɛ̂ dɔ ndɔɔ tə̂: Bbo ndi ərə kə ndɔ tɔyn dɔ nangə ndɔɔ tə̂ le ngaâ nandə kandə-ko narə njê-ndɔɔje a, Lubba bbar tar kə̂ maji dɔ nangə tə̂ le.

⁸ A bbo nangə le andə konnje kə gərgəndəje a, to nangə kə̂ maji ang. Lubba a bbar tar kə̂ maji ang dɔɛ tə̂ njangə baa ngaâ dâ kula puru tə̂.

⁹ Ngakɔnje kə̂ n-ndikise nya, jaw pa tar be njaa, a n-gərə to ə-naynje ddəw tə̂ kə̂ maji kə̂ to ddəw kinga kaji le.

¹⁰ Lubba to gatə gatə ang bba məɛ̂ a koy dɔ nɛ̂nje kə̂ aw ddaje le ang ddəm ndiki kə̂ ə-ndikeje le ang ddəm. Ə-tɔjuje ndiki ləse le ddəw maji tə̂ kə̂ ə-ddaje kə kəsə njê-mə-kunnje ləw ngaâ ə-naynje aw ddaje bbay bbasinɛn le.

¹¹ A nɛ̂n kə̂ n-ndiki to karə bbo kula nəənn le nayn məse tə̂, sese kâra kâra tɔyn ndərəng ɔsu kɔnyɛ̂. Yeenn bba â kingaje nɛ̂nje tɔyn kə̂ aw undaje məse dɔɛ tə̂.

¹² Arəje dabbə ddase ang, a ə-ndajije dəwje kə̂ unnje məde ngaâ tɔje wurde nginanje ngaâ ingaje nɛ̂nje kə̂ Lubba unn ndue ta karəde.

Ndu-kunn lə Lubba nayn kə ture

¹³ Ndɔ tə̂ kə̂ Lubba unn ndue arə Abaraham le, nunda yo ta dda nɛ̂n kə̂ nunn due mbɛɛ̂ le. A marə dəw kə̂ utɛ̂ karə nunda yo le kə ria goto. Yeenn bba nunda yo kə ria ne Lubba njaa.

¹⁴ N̂-pa nan: «Tɔkɔrɔ njaa, mâ bbar tar kə̂ maji dɔi tə̂ baa kə nangə̂ ngaâ mâ karə ngakai ddeeje tokə banya.»

¹⁵ Abaraham tɔ wure nginan ngaâ ninga nɛ̂n kə̂ Lubba unn ndue ta karɛ̂ le.

¹⁶ Bbo dəwje a ta kundaje-yo a, dundaje yo le kə ri marə dəw kə̂ utade. Yeenn bba yo-kunda ləde le dda arə dəwje ooje məde tə̂ kə tar ləde le ngaâ dəwje a kasəje ta mayn tar le ang.

¹⁷ Ddəw kâra baa, Lubba ndiki ta tɔju dəwje kə̂ nunn ndue narəde le to, ndue le a turu ndɔ kâra ang. Yeenn bba nunda yo.

¹⁸ Yeenn bba ndu-kunn kə yo-kunda lə Lubba toje to nɛ̂nje kə̂ a turuje ndɔ kâra ang. Ngaâ Lubba kara a kərə ngəm ddəwe tə̂ ang tɔ. Nɛ̂ɛnn arəje singa nya, jeje kə̂ bbay lo kiya-rɔ ləje njaa to karə junda məje dɔ nɛ̂n tə̂ kə̂ Lubba unn ndue ta karəje le.

¹⁹ Əngaje jeje, nɛ̂n kə̂ jaw junda məje dɔɛ tə̂ le to tokə andə-narɛ kə̂ ɔɔy kə̂ n̂-tɔ tɔkə to tə̂ darə uwa ar nɛ̂n lo kâra. Nɛ̂n le nday kubbu kə̂ n̂-gangə nɛ̂n mə kəy-polo Lubba kə̂ mə dara tə̂ ngaâ aw tee lo tə̂ kə̂ n̂-sangə nya bbay mba Lubba.

²⁰ Jeju andə lo tə̂ le kete arəje to nje-kɔru nɔnje. N̂-ddee to tɔkə nje-polo Lubba tokə Mɛlkisedɛk. Nâ nayn to tɔkə nje-polo Lubba kə̂ to kə ndɔ kə ndɔ.