Ebərəje 5 - Dɔnɔn kə̂ Siki: Tar kə̂ aw arə təbbə

¹ Tɔkə njê-poloje Lubba kâra kâra tɔyn, n̂-mbərəde horo dəwje tə̂ karə n̂-ddaje kula lə Lubba mba dəwje le. Kula ləde to ənga kunn nɛ̂n-karə-baaje kə nɛ̂n-poloje kə̂ dəwje ddeeje nɛ̂n karə Lubba mba majangje.

² Ne nje-polo Lubba le njaa kara naw nubba singa ddəw marə nɛ̂nje tə̂ ang nya. Yeenn a, nasə ta gərə nɛ̂n kə̂ aw uta singa dəwje kə̂ gərəje nɛ̂n ang ngaâ ndəəmje ddəw.

³ Ne njaa kara nubba singa ddəw marə nɛ̂nje tə̂ ang, arə to tar laa ta karə nɛ̂n-polo mba majang laa ne njaa tɔ bbo mba majang lə dəwje kə karəde baa ang.

⁴ Dəw kâra asə ta kɔsu gaji rɔɛ̂ to tɔkə nje-polo Lubba ang. Lubba â bbar dəw bba undɛ̂ to tɔkə nje-polo tokə n̂-bbar Arɔn.

⁵ Kristə kara ɔsu gaji rɔɛ̂ to tɔkə nje-polo Lubba ang. Lubba â bbarɛ̂ ngaâ pa nan: «Ə-to Ngonnəm. Bbokənɛn marə ə-ddee to ngonnəm ngaa.»

⁶ Lubba pa bbay nan: «Â to tɔkə nje-polo Lubba kə̂ to kə ndɔ kə ndɔ tokə Mɛlkisedɛk.»

⁷ Kar kə̂ Jeju nayn nɛ̂n dɔ nangə tə̂ bbay le n̂-duju Lubba n̂-dda nɛ̂n rɔɛ̂ to ndoo, nuru nɛ̂n əkii ləm ang ddəm nɔn Lubba tə̂ kə̂ asə ta kajɛ̂ ta yo tə̂. Yeenn bba Lubba oo ndu-nɔn laa le mba nunn rɔɛ̂ narə Lubba.

⁸ N̂-to Ngonn lə Lubba njaa, a nɛ̂n kəm-to-ndooje kə̂ ingɛ̂ le ddaje arə n̂-gərə ddəw kə̂ ta koo nɛ̂n ta Lubba.

⁹ Ddəw nɛ̂nje tə̂ənn le, Kristə ddee to dəw kə̂ asə tɔyn ta karə dəwje tɔyn kə̂ ddaje nɛ̂n kə turu ndue kaji kə̂ to kə ndɔ kə ndɔ.

¹⁰ Tɔkɔrɔ njaa, Lubba undɛ̂ to tɔkə nje-polo tokə Mɛlkisedɛk.

Tusu mə-kunn kinya to nɛ̂n kə̂ maji ang

¹¹ Tarje toje nya ta pa dɔ tar tə̂ nəənn, a to ngəng nya ta kɔru gəle. Mba ə-ddeeje to dəwje kə̂ gərə nɛ̂n ləde ɔn nya.

¹² Kuru lo əw nya karə ə-ddeeje to njê-nɛ̂n-tɔjuje ngaa. A sese le tɔ bbay â ə-ndikije karə n̂-təl n̂-tɔjuse dɔngɔr nɛ̂nje kə̂ dɔ tar tə̂ lə Lubba wa? Ə-ddeeje to dəwje kə̂ ndikije ta kil mba bbay, bbo asəje ta kusa nɛ̂n kə̂ kətərə ang.

¹³ Dəw kə̂ nayn aw il mba bbay to əngutay bbay. N̂-gərə nɛ̂n dɔ tar nɛ̂n tə̂ kə̂ gatə gatə ang.

¹⁴ A nɛ̂n-kusa kə̂ kətərə to mba dəwje kə̂ tɔkə. Dede â ddəw nɛ̂n tə̂ kə̂ daw ddaje kə ndɔ tɔyn, dasəje ta kɔru kəm nɛ̂n kə̂ maji kə nɛ̂n kə̂ maji ang.