Ebərəje 4 - Dɔnɔn kə̂ Siki: Tar kə̂ aw arə təbbə

¹ Ndu Lubba kə̂ unn ta karə jandə lo kuwa-rɔ tə̂ kə̂ n̂-gɔl mba tar ləje le nayn baa bbay. Yeenn a, maji karə kəmje kətərə bba karə dəw kâra horose tə̂ dda tokə nɛ̂ɛnn le due to du ang.

² Mba ndu Lubba kə̂ unn ngaâ dila mbəre darə kajejedede le dila mbəre darəje tɔ. A Tar kə̂ Maji nəənn kə̂ dooje le dda marə nɛ̂n kâra rɔde tə̂ ang, mba dəwje kə̂ ooje tar le ooje nɛ̂n məde tə̂ ang ddəm.

³ A jeje, joo məje tə̂ arə ja kandəje lo tə̂ kə̂ Lubba pa tarɛ̂ le. N̂-pa nan: «Mə wungu tə̂ kə̂ ɔnʼm le mubbu nɛ̂n m-pa nan: Dâ kandəje dɔ nangə tə̂ kə̂ m-gɔl karə duwaje rɔde kə tə̂ le ndɔ kâra ang.» Lubba pa baann. A ləw baa kar kə̂ n̂-dda nɛ̂n duninya n̂-tunga le, kuwa-rɔ to mban.

⁴ Mba Makəturu lə Lubba pa tar dɔ ndɔ tə̂ kə̂ to siri laa nan: «Ngaâ, ndɔ siri laa a, Lubba uwa rɔɛ̂ go kulaje tə̂ laa tɔyn kə̂ n̂-dda.»

⁵ Makəturu tə̂ənn le Lubba təl pa bbay nan: «Dâ kandəje dɔ nangə tə̂ kə̂ m-gɔl karə duwaje rɔde tə̂ le ndɔ kâra ang.»

⁶ Njê kə̂ ooje tar nəənn dɔngɔr le andəje lo kuwa-rɔ tə̂ le ang, mba n̂-ddaje dɔ-kətərə. A ddəw to ta karə marə dəwje andəje bbay.

⁷ Mba yeenn bba, Lubba ila marə ndɔ tokə siki ngaâ n̂-bbar ndɔ le nan «bbokənɛn». Ndɔ nday nya bba narə Dabbiti pa makəturu tə̂ nəənn le nan: «Bbokənɛn, bbo ooje ndu Lubba kə̂ aw bbar a, arəje məse kətərə ang.»

⁸ Bbo Jɔsuwe aw kə ngann Ijarayɛlje lo kuwa-rɔ tə̂ kə̂ tɔkɔrɔ njaa a le, Lubba a təl pa tar marə ndɔ dang ang ngaa.

⁹ Yeenn pa nan, marə ndɔ kə̂ dəwje lə Lubba a kuwaje nɛ̂n rɔde le nayn bbay. Ndɔ le to tokə ndɔ kə̂ to siri laa le.

¹⁰ Mba bbo dəw tee lo kuwa-rɔ tə̂ kə̂ Lubba gɔl a, nəw kulaje laa ta kuwa rɔɛ̂ tɔ, tokə Lubba əw kulaje laa a uwa rɔɛ̂ le.

¹¹ Mba yeenn bba, maji karə n-ddaje singa ta tee lo kuwa-rɔ tə̂ le. Baann bba dəw kâra horoje tə̂ a koso tokə lə kajejedede kə̂ ddaje dɔ-kətərə le ang.

¹² Mba tar kə̂ tee ta Lubba tə̂ to kəm baa ngaâ ee kə singa. Tar le aw dda kula uta tɔkə kiya kə̂ tɛɛ̂ to ər joo kəm. Ddəw kâra baa tokə tɔkə kiya kə̂ tɛɛ̂ to ər joo kəm aw kayn horo mənrə-rɔje kə ubbuje kə̂ mə singa tə̂ le, tar lə Lubba aw andə dəw ndərəng bbəngəre tə̂. Tar le aw tee kə nɛ̂nje kə̂ dəw aw dda bboe məɛ̂ tə̂ ddəm aw əjə ddəm.

¹³ Nɛ̂n kâra kə̂ iya rɔɛ̂ nɔn Lubba tə̂ goto. Nɛ̂n tɔyn kə̂ Lubba dda to ddaka baa kəmɛ̂ tə̂. A ne Lubba le tɔ â, ja kɔru gəl nɛ̂nje tɔyn kə̂ n-ddaje karɛ̂je.

Jeju to tɔkə nje-polo Lubba

¹⁴ Tɔkə nje-polo Lubba ləje to. Ne kə̂ nuta kəseje tɔyn, kə̂ naw ndərəng n̂-tee nɔn Lubba tə̂ darâ: To Jeju Ngonn lə Lubba. Yeenn bba joo nɛ̂n məje tə̂ mban arə maji karə juwaje jarə ngəng.

¹⁵ Tɔkə nje-polo Lubba ləje le, nɛ̂nje kə̂ jubbaje singa tə̂ ang a, nasə ta koo ndoo kə je ddəwe tə̂. Mba n̂-nɛɛ̂n mə nɛ̂nje tə̂ tɔyn tokə jeje njaa tɔ, a ne n̂-dda majang kâra ang.

¹⁶ Yeenn a, maji karə n-ddeeje ngɔsi kə ngende-mbay lə Lubba kə̂ to nje-mə-maji ta jarə məje oso pɔn. Baann bba nâ koo kəm-to-ndoo ləje ngaâ nâ dda kə je mə-maji ta nâ kumanje mə karje tə̂ kə̂ asə karə numanje.