Ebərəje 3 - Dɔnɔn kə̂ Siki: Tar kə̂ aw arə təbbə

Jeju uta Mɔyijə

¹ Mba yeenn bba, see ngakɔnʼm kə̂ Lubba bbarse arə ə-ddeeje to dəwje laa, arəje kəmse to kə dɔ Jeju tə̂. N̂-to nje-kaw-kula lə Lubba ddəm tɔkə nje-polo Lubba kə̂ jooje məje tə̂ ddəw tə̂ laa ngaâ jaw pa tarɛ̂ kə taje ddəm.

² Lubba mbəre mba kula nəənn le ngaâ n̂-dda kula le kə dɔgɔlɛ̂ tokə Mɔyijə dda kə dɔgɔlɛ̂ mə kəy tə̂ lə Lubba tɔyn le.

³ A asə karə Jeju inga piti nya uta piti lə Mɔyijə, mba nje-dda kəy inga piti uta kəy kə̂ n̂-dda le.

⁴ Kəy kâra kâra tɔyn, dəw â dda. A Lubba â dda nɛ̂nje tɔyn.

⁵ Ləw, Mɔyijə to nje-kula kə̂ dda kula kə dɔgɔlɛ̂ mə kəy tə̂ lə Lubba tɔyn. Ne â n̂-to nje-tar-naji tarje kə̂ Lubba a ta pa.

⁶ A bbasinɛn, Kristə dda kula kə dɔgɔlɛ̂ to Ngonn lə Lubba njaa kə̂ undɛ̂ karə ɔn dɔ kəy laa. Jeje, bbo n-naynje jaw jundaje məje dɔ nɛ̂n tə̂ kə̂ jaw nginanje ngaâ jaw ddaje nɛ̂n rɔ-nəəl le a, n-toje to kəy lə Lubba njaa.

Tar kuwa-rɔ lə dəwje lə Lubba

⁷ Mba yeenn bba, tokə Ndil-mə-nda pa nan: «Bbokənɛn, bbo ooje ndu Lubba kə̂ aw bbar a,

⁸ arəje məse kətərə tokə lə kaseseje ang. Mba ləw, n̂-ddaje dɔ-kətərə ngaâ n̂-nanje Lubba mə kɔr tə̂.»

⁹ Lubba pa nan: «Kaseseje ooje nɛ̂nje tɔyn kə̂ m-dda mə kɔr tə̂ bbal dɔsɔ njaa, a n̂-ngaanje tam ta nanʼm nɛ̂n.

¹⁰ Mba yeenn bba, wungu ɔnʼm dɔde tə̂ ngaâ m-pa nan: ‹Kəjə ləde to kə dannâ ang kə ndɔ tɔyn, n̂-gərəje nɛ̂n kə̂ m-ndiki karə n̂-ddaje ang.›

¹¹ Mə wungu tə̂ kə̂ ɔnʼm le, munda yo m-pa nan: Dâ kandəje dɔ nangə tə̂ kə̂ m-gɔl karə duwaje rɔde kə tə̂ le ndɔ kâra ang.»

¹² Ngakɔnʼmje, aaje rɔse arəje marə dəw kâra horose tə̂ arə məɛ̂ maji ang ang ddəm mbətə ta koo məɛ̂ tə̂ ang ddəm aw ddəw əw kə Lubba kə̂ Nje-kisi kəm baa le ang ddəm.

¹³ Lubba nayn aw bbarse «bbokənɛn» bbay. Maji karə ə-ndəjəje naan kə ndɔ tɔyn. Baann bba karə majang dda arə marə dəw horose tə̂ dda dɔ-kətərə ang.

¹⁴ Bbo n-naynje jaw juwaje jarə ngəng ndərəng jɔsuje kɔnyɛ̂ a, Lubba a karə n-ddeeje to nje-kula mar Kristə.

¹⁵ Makəturu lə Lubba pa nan: «Bbokənɛn, bbo ooje ndu Lubba kə̂ aw bbar a, arəje məse kətərə tokə lə kaseseje ang. Mba ləw, n̂-ddaje dɔ-kətərə kə Lubba.»

¹⁶ Njê kə̂ ooje ndu Lubba kə̂ aw bbar bba ddaje dɔ-kətərə saa le toje to njê kə̂ dda wa? To dəwje tɔyn kə̂ Mɔyijə tee kə de Ejipitə tə̂ kə ddang le.

¹⁷ Njê kə̂ wungu ɔn Lubba dɔde tə̂ bbal dɔsɔ le toje to njê kə̂ dda wa? Wungu ɔɛ̂n dɔ dəwje tə̂ kə̂ ddaje majang, dede le njaa doyje mə kɔr tə̂.

¹⁸ Lubba ubbu nɛ̂n nan: «Dâ kandəje dɔ nangə tə̂ kə̂ m-gɔl karə duwaje rɔde kə tə̂ le ndɔ kâra ang.» Njê kə̂ nubbu nɛ̂n narəde le toje to njê kə̂ dda wa? Nubbu nɛ̂n narə dede kə̂ n̂-ddaje dɔ-kətərə saa le.

¹⁹ Mba joo a, dandəje dɔ nangə kuwa-rɔ tə̂ le ang, mba dooje məde tə̂ ang.