Ebərəje 2 - Dɔnɔn kə̂ Siki: Tar kə̂ aw arə təbbə

Kaji to nɛ̂n kə̂ ngəng

¹ Mba yeenn bba, maji karə juwaje tarje kə̂ joo le jarə ngəng. Baann ang a, ja ndəəmje ddəw.

² Mba ləw, tar kə̂ Lubba arə anjəje paje to baa ang, dəwje kə̂ aaje lo kə tar tə̂ le ang ngaâ ddaje nɛ̂n kə turu ndu tar le ang ingaje kunda kə dɔgɔlɛ̂ njaa.

³ Yeenn a, bbo jooje kaji kə̂ ngəng be nəənn le to nɛ̂n ang a, jeje ja teeje ta kunda tə̂ tokə baânn wa? Kaji nəənn le, Əbbə-dəwje â unn kutu kila mbəre. Goe tə̂ a, dəwje kə̂ ooje tam kaji nəənn le təlje ddee paje tarɛ̂ arəje nan to tar kə̂ tɔkɔrɔ.

⁴ Lubba njaa kara tɔju to tarje ləde le to tarje kə̂ tɔkɔrɔ, ddəw nɛ̂n-mɔrije tə̂ dang dang ddəm ddəw gusuje tə̂ lə Ndil-mə-nda kə̂ aw kayn dəwje tokə məɛ̂ ndiki ddəm.

Jeju to ddəw kinga kaji

⁵ Duninya kə̂ bara kə̂ jaw pa tarɛ̂ nəənn le, anjəje â Lubba arəde singa mba kɔn dɔɛ̂ ang.

⁶ A marə dəw pa makəturu tə̂ lə Lubba nan: «Lubba, dəw to ddi bba aw əjə dɔɛ̂ tə̂ wa? Dəw to ddi bba aw aa lo kə dɔɛ̂ tə̂ wa?

⁷ Mba ə-dda arə n̂-ddee to dəw kə̂ ta-gɔl anjəje tə̂ mba gɔju kar, ə-dda arə ninga piti kə kɔsu gaji,

⁸ ngaâ ungu nɛ̂n tɔyn kɔ gɔlɛ̂ tə̂.» Bbo Lubba ungu nɛ̂n tɔyn kɔ gɔlɛ̂ tə̂ a, yeenn tɔju to nɛ̂n tɔyn njaa to kɔ gɔlɛ̂ tə̂. A kə̂ bbokənɛn nəənn, joo a, nɛ̂nje tɔyn toje kɔ gɔlɛ̂ tə̂ ang bbay.

⁹ A nɛ̂n kə̂ joo â nəənn: Jeju le Lubba dda arə n̂-ddee to dəw kə̂ ta-gɔl anjəje tə̂ mba gɔju kar bba karə ddəw mə-maji tə̂ lə Lubba noy mba dəwje tɔyn. Yeenn ngaâ bbasinɛn ninga piti kə kɔsu gaji mba koy kə̂ noy le.

¹⁰ Lubba dda nɛ̂nje tɔyn ngaâ arə nɛ̂nje le naynje kə lo-tode mbɛɛ̂. Lubba le oo maji karə Jeju ddee to dəw kə̂ asə tɔyn njaa ddəw ndoo tə̂ kə̂ Jeju le oo. Yeenn bba ta dda karə ngannɛ̂ ne Lubba le nya nya ingaje piti laa. Mba Jeju â aw ɔru nɔnde arə dingaje kaji.

¹¹ A ne kə̂ naw dda narə dəwje aw ddeeje to dəwje lə Lubba le, ne de kə dəwje lə Lubba le tɔyn njaa bɔdede kâra baa. Mba yeenn bba bbo n̂-bbarde to ngakɔɛ̂n a, to rɔ-kul laa ang.

¹² Mba Jeju pa arə Lubba nan: «Mâ kila mbər tar ləi karə ngakɔnʼmje. Mâ kɔsu pa ta pitii nɛ̂n horo dəwje tə̂ kə̂ mbɔnje naan.»

¹³ Jeju pa tɔ bbay nan: «Əman, mâ kunda məm tɔyn dɔ Lubba tə̂.» Ngaâ n̂-pa bbay nan: «Əman kə dəwje kə̂ Lubba arəm â jar nəənn.»

¹⁴ Ngannje nəənn le toje tɔyn to dəwje. Yeenn bba Jeju kara ddee to dəw tokə dede tɔ. Baann bba ddəw koy tə̂ laa, n̂-guru singa Əsu kə̂ ee kə singa tɔl dəw,

¹⁵ nɔru dəwje kə̂ bbəəlje yo arə isije to bbərəje njaa nyɔm le kə ddang.

¹⁶ Mba anjəje â Jeju ddee ta kumande ang, dəwje kə̂ gəl Abaraham tə̂ â n̂-ddee ta kumande.

¹⁷ Mba yeenn bba, maji karə n̂-ddee tokə lə ngakɔɛ̂nje mə nɛ̂nje tə̂ tɔyn. Yeenn bba n̂-ddee to tɔkə nje-polo Lubba kə̂ aw dda mə-maji kə dəwje ngaâ aw dda nɛ̂n lə Lubba kə dɔgɔlɛ̂ mba kɔru nɛ̂n tar majang lə dəwje dɔde tə̂ kə ddang.

¹⁸ Bbasinɛn nasə ta kuman njê kə̂ nɛ̂n aw nande, mba ne njaa kara nɛ̂n nɛɛ̂n ddəm noo ndoo ddəm.