Ebərəje 13 - Dɔnɔn kə̂ Siki: Tar kə̂ aw arə təbbə

Pa-nja kə̂ nəəl kəm Lubba tə̂

¹ Maji karə ə-naynje ddəw ndiki naan tə̂ tokə ngakɔn-naan njaa.

² Maji karə məse oy ta taa njê-mbaje kə majɛ̂ rɔse tə̂ ang. Mba ddəw nɛ̂n-dda tə̂ kə̂ baann â, marə dəwje taaje anjəje kə rɔde tə̂, a n̂-gərəje to anjəje ang.

³ Maji karə əjəje dɔ dəwje tə̂ kə̂ toje kəy-kula tə̂ tokə nɛ̂n kə̂ sese njaa â ə-toje kəy-kula tə̂ le kə de tɔ. Maji karə əjəje dɔ dəwje tə̂ kə̂ daw ddade maji ang tokə nɛ̂n kə̂ sese njaa â daw ddase maji ang tɔ.

⁴ Maji karə dingawje kə dɛnɛ̂nje tɔyn bbəəlje go taa-naan ləde ngaâ dəwje kə̂ taaje naan ngəmje rɔde arə naan. Mba Lubba a gangə sariya dɔ njê-kayaje tə̂ kə njê-ddaje lo-to-majang ang tə̂.

⁵ Maji karə bbo narɛ dɔrɔ â to mə nɛ̂n-ddaje tə̂ ləse ang. Maji karə undaje məse kə dɔ nɛ̂n tə̂ kə̂ to jise tə̂ njaa. Mba Lubba pa nan: «Mâ kinyai ang ddəm mâ mbəti ang ddəm.»

⁶ Mba yeenn bba, jasəje ta pa kə bbəəl ang nan: «Əbbə-dəwje to nje-kumanʼm Mâ bbəəl marə nɛ̂n kâra ang. Ddi â dəw a kasə ta dda səm wa?»

⁷ Maji karə oleje məse dɔ dəwje tə̂ kə̂ tɔjujese ddəw ləw ngaâ ndajije tar lə Lubba kə̂ pa dɔ Jeju tə̂ arəse le. Əjəje dɔ kisi tə̂ ləde ndərəng koy tə̂ ləde, ta ə-ndajije mə-kunn ləde.

⁸ Jeju-Kristə nayn kə lo-to laa njaa takənɛn, bbokənɛn kə ndɔ kə ndɔ.

⁹ Maji karə inyaje arə nɛ̂n-tɔjuje kə̂ dang dang ddaje arə ə-ndəəmje ddəw ang. Maji karə ingaje singa ddəw mə-maji tə̂ lə Lubba bbo ddəw nduje tə̂ kə̂ dɔ nɛ̂n-kusaje tə̂ ang. Mba dəwje kə̂ aw ngəmje ndujeenn le ingaje marə nɛ̂n kâra ddəwe tə̂ ang.

¹⁰ Jeje, bann ləje to bann kə̂ njê-poloje Lubba kə̂ aw ddaje kula mə kəy-tande kinga-naan tə̂ asəje ta kusa nɛ̂n-polo kə̂ to dɔɛ tə̂ ang.

¹¹ Bbo tɔkə nje-polo Lubba aw arə nɛ̂n-polo mba majang lə dəwje a, məsə daje le â nandə nɛ̂n lo tə̂ kə̂ n̂-sangə dang nya bbay mba Lubba le. A n̂-tee kə da-rɔ daje le naw nɛ̂n ddaka giri bbe tə̂ le bba naw ro.

¹² Mba yeenn bba Jeju njaa kara oy giri bbe tə̂ ddaka mba toko nɛ̂n nɛ̂n-yərəw lə dəwje kə məse njaa.

¹³ Yeenn a, maji karə n-teeje jawje rɔɛ̂ tə̂ ddaka, ta n-tɔ wurje jarə dəwje tajijeje saa tɔ.

¹⁴ Mba, nangə̂ nəənn marə bbe ləje kə̂ a to nyɔm goto arə jaw sangəje bbe kə̂ a to ndɔ tə̂ kə̂ bara.

¹⁵ Ddəw tə̂ lə Jeju, maji karə n-walje Lubba tokə nɛ̂n-polo kə̂ jaw jarɛ̂je ddəw paje tə̂ kə ddəw tarje tə̂ kə̂ taje tə̂ kə̂ tɔjuje to Lubba to Əbbə-dəwje.

¹⁶ Maji karə məse oy ta dda maji kə naan ang ddəm ta kɔsu naan ngar ang ddəm. Mba nɛ̂n-poloje kə̂ baann â nəəl kəm Lubba tə̂.

¹⁷ Maji karə ooje ta dəwje kə̂ aw tɔjuse ddəw ngaâ ə-bbəəljede. Mba daw dundaje kəmde dɔse tə̂. Ngaâ a to tar ləde ta pa go nɛ̂n tɔyn dɔse tə̂ nɔn Lubba tə̂. Maji karə ə-ddaje arə n̂-ddaje kula ləde kə rɔ-nəəl bbo kə kəm-rɔ ang, mba a kumanse kâra ang.

¹⁸ Maji karə ə-dujuje Lubba mbaje. Mba n-gərə to kəjə ləje to kə majɛ̂ bbo jɔkuje ang ngaâ n-ndiki karə pa-nja ləje to kə majɛ̂ mə nɛ̂nje tə̂ tɔyn.

¹⁹ M-dujuse nya karə ə-dujuje Lubba, bba karə minga ddəw ta təl njangə baa rɔse tə̂.

Duju Lubba

²⁰ Lubba kə̂ to nje-karə mə-wul-lɔm dda arə Əbbəjeje Jeju kə̂ to tɔkə nje-kuul batəje le oy, a ndol. Ddəw məsə Jeju tə̂ kə̂ arə to nɛ̂n-polo le â Lubba ɔsu nɛ̂n kə je dɔnɔn kə̂ a to kə ndɔ kə ndɔ.

²¹ Maji karə ne Lubba le narə ingaje singa ta dda nɛ̂n nɛ̂nje tɔyn kə̂ maji, bba karə ə-ddaje nɛ̂n nɛ̂n kə̂ məɛ̂ ndiki. Nɛ̂n kə̂ nəəl kəmɛ̂ tə̂ â maji karə n̂-dda məje tə̂ ddəw tə̂ lə Jeju-Kristə. Ne Jeju kə̂ piti to laa kə ndɔ kə ndɔ. Amɛnn!

Tar lapiya

²² Ngakɔnʼmje, m-dujuse karə ə-tɔje wurse ooje nɛ̂n ndəjəje nəənn. Mba makəturu kə̂ mula nɛ̂n marəse nəənn ngal ang.

²³ M-ndiki ta karə ə-gərəje to dɔru ngokɔnje Timɔte kəy-kula tə̂ mban. Bbo n̂-ddee njangə a, əman je saa ja kaw koose.

²⁴ Ə-ddaje lapiya njê kə̂ aw tɔjuse ddəw kə dəwje lə Lubba tɔyn. Ngakɔnje kə̂ Itali ddase lapiya.

²⁵ Maji karə mə-maji lə Lubba nayn kə se tɔyn.