Ebərəje 12 - Dɔnɔn kə̂ Siki: Tar kə̂ aw arə təbbə

Lubba to Bɔjeje

¹ Jeje, dəwje nya kə̂ ddaje nɛ̂n ddəw mə-kunn tə̂ le gukujeje. Yeenn a, maji karə n-mbətəje nɛ̂nje tɔyn kə̂ aw ɔɔyjeje, uta tɔyn majang kə̂ aw unguje mə bandə tə̂ laa kə ngɔru baa, ta jaynje ngɔru kə̂ Lubba dujuje karə jaynje le bbo jinyaje ddəwe ang.

² Jarəje kəmje to kə dɔ Jeju tə̂ kə̂ ɔru ta-ddəw mə-kunn arəje ngaâ aw dda arə mə-kunn ləje le aw sangə kə majɛ̂ le. N̂-ndiki tə̂ ta koy dɔ kakə-dəsə tə̂ bbo n̂-dda rɔ-kule ang. N̂-ndiki tə̂ mba noo rɔ-nəəl kə̂ nâ kinga goe tə̂ tokə kete ngaâ bbasinɛn, nisi dɔ ji-kɔl Lubba tə̂.

³ Maji karə əjəje dɔ Jeju tə̂ kə̂ oo ndoo tokə baann ji njê-nɛ̂n-ddaje tə̂ kə̂ maji ang kə̂ mbəteje, a n̂-tɔ wure le. Yeenn bba rɔse a koy njururu ang ddəm â tusuje ddəwe kinyaje ang ddəm.

⁴ Mba ddɔ kə̂ aw ddɔje kə majang le, ə-ddɔje ndərəng ə-teeje nɛ̂n yo tə̂ ang bbay.

⁵ Məse oy dɔ ndəjə kə̂ Lubba arəse tokə dəw aw arə ngannɛ̂ le wa? Ndəjə le nan: «Ngonnəm, bbo Əbbə-dəwje aw undai mba tɔji nɛ̂n ddəw a, oo to nɛ̂n kə̂ baa ang. A bbo n̂-ndɔru mbii a, arə rɔi oy njururu ang.

⁶ Mba Əbbə-dəwje aw unda dəw kə̂ n̂-ndike mba tɔjɛ̂ nɛ̂n ddəw. Naw nunda dəwje tɔyn kə̂ ddeeje to ngannɛ̂ kə ndəy.»

⁷ Bbo Lubba aw undase mba tɔju nɛ̂n se ddəw a, maji karə ə-tɔje wurse. Mba naw nundase tokə lə ngannɛ̂ njaa. Ngonn kə̂ dda bba bɔɛ̂je aw undɛ̂ mba tɔjɛ̂ nɛ̂n ddəw ang wa?

⁸ Bbo sese nundase mba tɔju nɛ̂n se ddəw tokə naw dda kə kəsə ngannɛ̂ tɔyn le ang a, ə-toje to ngann-məɛ̂ njaa ang, ə-toje to ngannje kə̂ dəw gərə bɔdede ang.

⁹ Bɔjejedede kə̂ njê-kujujeje aw undajeje mba tɔjuje nɛ̂n je ddəw, a jaw bbəəljede. Yeenn a, Bɔjeje kə̂ darâ, maji karə n-bbəəleje nya uta bbay mba kinga nɛ̂n təbbə.

¹⁰ Bɔjejedede aw undajeje mba tɔju nɛ̂n je ddəw kə kəjə ləde njaa mba marə gɔju kar. A Lubba aw undaje mba tɔju nɛ̂n je ddəw mba maji ləje bba karə n-ddeeje maji tɔyn tokə laa.

¹¹ Tɔkɔrɔ njaa, bbo daw dunda dəw mba tɔjɛ̂ nɛ̂n ddəw a, to nɛ̂n rɔ-nəəl karɛ̂ tə̂ənn le njaa ang. A ndərəng goe tə̂ a, dəw kə̂ dundɛ̂ le ddee to dəw kə̂ gatə gatə ngaâ isi kə mə-wul-lɔm.

¹² Yeenn bba, maji karə arəje rɔse oy njururu ang, uwaje arəje ngəng.

¹³ Maji karə ilaje ddəw kə̂ to gatə gatə ə-njaje tə̂, baann bba bbo dəw kə̂ to nje-mətə a, gɔlɛ̂ le a tuju njaa nyɔm ang, a n̂-təl n̂-nja kə majɛ̂.

Ndəjəje dang dang

¹⁴ Maji karə ə-sangəje ddəw kisi kə mə-wul-lɔm kə dəwje tɔyn. Ngaâ arəje nɛ̂n-yərəw ɔruse ang. Baann ang a, dəw kâra horose tə̂ a koo Əbbə-dəwje ang.

¹⁵ Aaje kə majɛ̂ arəje marə dəw dda arə mə-maji lə Lubba due ang, bba karə dəw kâra ddee tokə marə kam kə̂ atə kə̂ aw ndu horo dəwje tə̂ ang. Dəw kə̂ baann le aw ddee kə tar horo dəwje tə̂ ddəm aw tuju dəwje ddəm.

¹⁶ Aaje kə majɛ̂ arəje marə dəw kâra horose tə̂ ddee to nje-kaya ang ddəm oo nɛ̂nje kə̂ dunda dang mba Lubba kəmɛ̂ tə̂ to nɛ̂n kə̂ baa ang ddəm tokə Ejawu kə̂ duje dɔngɔr, a unn tɔkə laa le labbə mba nɛ̂n-kusa kə̂ ka tə̂ kâra be le ang.

¹⁷ Ə-gərəje kə majɛ̂ to ndərəng a, Ejawu le ndiki karə bɔɛ̂je bbar tar kə̂ maji dɔɛ̂ tə̂, a bɔɛ̂je le mbətə. N̂-sangə tar kə̂ maji le kə maann-nɔn, a ninga ang, mba ninga ddəw ta dda karə bɔɛ̂je le turu ndue ang ngaa.

¹⁸ Lubba kə̂ aw ddeeje ngɔsi saa le to dang kə ddingiri kə̂ dəw asə kɔru kə jia tokə ddingiri kə̂ Sinay kə̂ ngann Ijarayɛlje awje tə̂. Puru aw ɔn tə̂, lo tuka ndul tə̂, lo ndul tə̂ biriri, ləl aw ula tə̂,

¹⁹ kɔru təbbə aw bbar tə̂, ndu dəw aw bbar tə̂ tɔ. Kar kə̂ Ngann Ijarayɛlje ooje ndu dəw le baann a, ndu le ngəng nya arə n̂-ndikije ta tɔ wurde koo nɛ̂n kəse ang ngaa.

²⁰ Mba dasəje ta tɔ wurde dɔ ndu tə̂ kə̂ Lubba unn nəənn ang. Ndu le nan: «Dəw wase da bba ɔru ddingiri nəənn kə jia kara, maji karə n̂-tilɛ̂ kə ər n̂-tɔlɛ̂.»

²¹ Nɛ̂n kə̂ daw dooje le to bbəəl nya arə Mɔyijə pa nan: «M-bbəəl nya arə maw misa.»

²² A sese, ə-ddeeje ngɔsi kə ddingiri kə̂ Sinyɔ, kə̂ to bbe lə Lubba kə̂ nje-kisi kəm baa, Jerujalɛm kə̂ darâ, kə̂ anjəje toje tə̂ doro doro.

²³ Ə-ddeeje ngɔsi mban kə mbɔn-naan lə ngann-dərəje lə Lubba mban, dede kə̂ ride to makəturu tə̂ darâ, Ə-ddeeje ngɔsi mban kə Lubba kə̂ to nje-gangə sariya dɔ dəwje tə̂ tɔyn, ə-ddeeje ngɔsi mban kə ndil dəwje kə̂ gatə gatə kə̂ Lubba dda arə n̂-ddeeje to dəwje kə̂ sangəje tɔyn njaa.

²⁴ Ə-ddeeje ngɔsi mban kə Jeju kə̂ to nje-gɔl-tar dɔnɔn kə̂ siki ddəm ngɔsi kə məsə Jeju kə̂ kayn nangə̂ ngaâ aw pa tar maji nya uta məsə Abɛl ddəm.

²⁵ Aaje rɔse! Ə-mbətəje ta koo ta Lubba kə̂ aw pa tar arəse nəənn ang. Mba dede kə̂ ləw n̂-mbətəje ta koo ta Mɔyijə dɔ nangə tə̂ nəənn le, n̂-teeje ta kunda tə̂ ang. A jeje, bbo n-turuje girije jarə Lubba kə̂ nje-kisi darâ nu kə̂ aw ndɔru mbije le a, ja tee ta kunda tə̂ tokə baânn wa?

²⁶ Ləw, ndu Lubba yəkə nangə. A bbasinɛn, nunn ndue narəje nan: «Mâ karə nangə yəkə gɔl kâra bbay. Ngaâ mâ karə dara yəkə tɔ.»

²⁷ Tarje kə̂ nan: «Gɔl kâra bbay» le tɔju to nɛ̂nje kə̂ Lubba dda a yəkəje ngaâ a gotoje, ta nɛ̂nje kə̂ asəje ta yəkə ang â ta naynje.

²⁸ Lubba aw arəje Bbe-kɔn kə̂ nɛ̂n a kasə ta yəkə ang. Yeenn bba, maji karə jarɛ̂je wooyo ngaâ n-poleje kə ddəw kə̂ a karɛ̂ rɔ-nəəl, n-ngəmje rɔje mba tar laa ddəm n-bbəəleje ddəm.

²⁹ Mba Lubba ləje to tokə puru kə̂ aw ɔn nɛ̂n tɔyn.