Ebərəje 11 - Dɔnɔn kə̂ Siki: Tar kə̂ aw arə təbbə

Tar mə-kunn

¹ Mə-kunn, to karə dəw arə məɛ̂ oso pɔn dɔ nɛ̂nje tə̂ kə̂ naw nunda məɛ̂ dɔɛ̂ tə̂, to karə dəw tɔju to nɛ̂nje kə̂ kəmɛ̂ aw oo ang ddəm le toje tə̂ənn njaa.

² Ddəw mə-kunn tə̂ lə kajejedede â Lubba pa nɛ̂n tar ləde maji.

³ Ddəw mə-kunn tə̂ â n-gərə nɛ̂n to ddəw tar kə̂ ta Lubba tə̂ â duninya to nɛ̂n. Yeenn a, nɛ̂nje kə̂ jaw jooje ddeeje ddəw nɛ̂nje tə̂ kə̂ kəm dəw aw oo ang.

⁴ Ddəw mə-kunn tə̂ â Abɛl unn nɛ̂n nɛ̂n-polo kə̂ maji uta lə Kayn arə Lubba. Mba mə-kunn laa le â Lubba ooe nɛ̂n to dəw kə̂ gatə gatə ngaâ ndiki tə̂ kə nɛ̂n-polo laa le. Abɛl oy mban njaa, a ddəw mə-kunn tə̂ laa, n̂-nayn naw pa tar baa bbay.

⁵ Ddəw mə-kunn tə̂ â Lubba unn nɛ̂n Enɔkə aw saa darâ kəm baa karə noy ang. Dəw təl ingɛ̂ ang ngaa, mba Lubba unnɛ̂ aw saa mbɔrɛ̂ tə̂. Makəturu lə Lubba pa nan: «Enɔkə nəəl kəm Lubba tə̂, kete bba karə nunnɛ̂.»

⁶ Bbo dəw unn məɛ̂ ang a, ddəw kə̂ nâ nəəl nɛ̂n kəm Lubba tə̂ goto. Maji karə dəw kə̂ aw ddee ngɔsi kə Lubba gərə to Lubba to ngaâ naw nuka dəwje kə̂ aw sangɛ̂je.

⁷ Ddəw mə-kunn tə̂ â Nowe oo tar nɛ̂nje kə̂ a ta ddeeje kə̂ Lubba pa arɛ̂. Yeenn bba, noo tar kə̂ Lubba pa arɛ̂ le to tar kə̂ tɔkɔrɔ ngaâ n̂-dda tɔkə to ta kaji nɛ̂n njê kə̂ laa. Nɛ̂n kə̂ n̂-dda le tɔju to nɛ̂n-dda lə dəwje kə̂ dɔ nangə tə̂ to nɛ̂n-dda kə̂ maji ang. Lubba ooe kəmɛ̂ tə̂ to dəw kə̂ gatə gatə mba mə-kunn laa.

⁸ Ddəw mə-kunn tə̂ â Abaraham oo ta Lubba kə̂ bbarɛ̂ ngaâ ɔtu aw nangə tə̂ kə̂ Lubba a ta karɛ̂ to laa. Naw njaa baann, bbo n̂-gərə lo kə̂ naw naw tə̂ le ang.

⁹ Ddəw mə-kunn tə̂ â naw dda bbe nangə tə̂ kə̂ Lubba unn ndue ta karɛ̂ tokə nje-mba. N̂-to kəy-tande tə̂, ne kə Ijakə kə Jakobbo. Dede kara ndu Lubba kə̂ unn arə Abaraham le to mbade tɔ.

¹⁰ Abaraham aw nginan ta kisi tɔkə bbe tə̂ kə̂ dungu gɔlɛ̂ nangə̂ darə ngəng, kə̂ Lubba â tɔju gusu kə̂ n̂-dda nɛ̂n ddəm Lubba â to nje-ddɛɛ̂ ddəm.

¹¹ Ddəw mə-kunn tə̂ tɔ â Sara kə̂ aw katə ngaâ bbalɛ̂ nday nya arə asə kuju ang ngaa inga ddəw uju ngonn, mba n̂-gərə to Lubba kə̂ unn ndue arɛ̂ le aw turu ndue ang.

¹² Mba yeenn bba, ddəw tə̂ lə dəw kə̂ kâra baa, kə̂ nayn ngɔsi baa ta koy le duju dəwje kə̂ banya banya tokə lə əndɛtɛrɛndɛnje kə̂ darâ ddəm ənangara ba-katə ddəm arə dəw asə ta turade ang.

¹³ Dəwjeenn le tɔyn naynje ddəw mə-kunn tə̂ ndərəng oyje nɛ̂n. A dingaje nɛ̂nje kə̂ Lubba unn ndue ta karəde le ang. N̂-naynje ddəw əw bba dooje ngaâ n̂-ddaje rɔ-nəəl mbɛɛ̂. N̂-paje kə tade to n̂-toje to njê-mbaje ddəm dəwje kə̂ aw ndayje to nday dɔ nangə tə̂ ddəm.

¹⁴ Dəwje kə̂ paje tar tokə baann tɔjuje kə ddaka to daw sangəje bbe ləde njaa.

¹⁵ Bbo to daw dəjəje dɔ bbe tə̂ kə̂ dɔtuje dinyaje le a, dâ kingaje ddəw ta təl tə̂.

¹⁶ A kə̂ tɔkɔrɔ njaa, daw ndikije ta kinga marə bbe kə̂ maji uta ye kə̂ kete le. To bbe kə̂ darâ. Mba yeenn bba, bbo dəw bbar Lubba to Lubba ləde a, rɔ Lubba wul ang. Tɔkɔrɔ njaa n̂-gɔl marə bbe mba tar ləde.

¹⁷ Ddəw mə-kunn tə̂ â Abaraham unn Ijakə arə Lubba to nɛ̂n-polo kar tə̂ kə̂ Lubba nɛɛ̂n nɛ̂n. To ngonnɛ̂ kə̂ kâra baa â nunn ta karə Lubba kə̂ unn ndue arɛ̂ pa nan:

¹⁸ «Ddəw tə̂ lə Ijakə â a kinga ngakai kə̂ munn ndum ta kari le.»

¹⁹ Abaraham pa məɛ̂ tə̂ nan: «Dəw kə̂ oy kara, Lubba ee kə singa ta ndole.» Mba yeenn bba Lubba təl kə ngonnɛ̂ le arɛ̂ tokə dəw kə̂ oy bba ndol.

²⁰ Ddəw mə-kunn tə̂ â Ijakə bbar nɛ̂n tar kə̂ maji dɔ Jakobbo de kə Ejawu tə̂ mba kisi ləde kə̂ bara.

²¹ Ddəw mə-kunn tə̂ â kar kə̂ Jakobbo nayn ngɔsi baa ta koy a, bbar tar kə̂ maji dɔ ngann lə Jojɛpə tə̂ kâra kâra. Nɔsu əngo-nɔɛ̂n dɔ kakə tə̂ kə̂ naw tɔsu ngaâ n̂-duju Lubba.

²² Ddəw mə-kunn tə̂ â Jojɛpə a ta koy a, pa tar tee lə ngann Ijarayɛlje nangə tə̂ kə̂ Ejipitə kə ddang. Ngaâ, nunn ndu ta pa nɛ̂n kə̂ to tar ləde ta dda kə singɛ̂je narəde.

²³ Ddəw mə-kunn tə̂ â kar kə̂ duju Mɔyijə a, njê-kujeje le unnɛ̂je iyɛ̂je nɛyn mota. Dooje ngonn le a n̂-kura arə n̂-bbəəlje ndu kə̂ tɔkə mbay unn le ang.

²⁴ Ddəw mə-kunn tə̂ â kar tə̂ kə̂ Mɔyijə ddee dingaw a, n̂-mbətə karə n̂-bbarɛ̂ to ngonn kə̂ ngonn lə Parawɔn kə̂ dɛnɛ̂n â uje.

²⁵ N̂-ndiki ta koo ndoo kə dəwje lə Lubba, uta ye kə̂ ta dda rɔ-nəəl mba gɔju kar ddəw majang tə̂.

²⁶ Noo a, kə̂ ta karə dəwje tajɛ̂je tokə n̂-tajije Kristə to nɛ̂n-kinga kə̂ ngəng uta nɛ̂n-kingaje kə̂ Ejipitə. Mba nunda kəmɛ̂ njaa nyɔm kə dɔ kuka tə̂ kə̂ Lubba a kukɛ̂ ndɔ tə̂ kə̂ bara.

²⁷ Ddəw mə-kunn tə̂ â Mɔyijə ɔtu Ejipitə tə̂ kə ddang a bbəəl wungu le tɔkə mbay ang. Nuwa narə ngəng tokə nɛ̂n kə̂ noo Lubba kə̂ dəw ooe ang le.

²⁸ Ddəw mə-kunn tə̂ â Mɔyijə unda gɔl kusu Pakə nangə̂ ngaâ arə n̂-tusu məsə dɔ kakə ta-kəyje tə̂. Baann bba anjə kə̂ nje-tɔl dəwje tɔl ngann-dərəje lə ngann Ijarayɛlje ang.

²⁹ Ddəw mə-kunn tə̂ â ngann Ijarayɛlje uruje «Ba Kasɛ», n̂-ndayje tə̂ tokə lə nangə kə̂ tutu. A kar tə̂ kə̂ dəwje kə̂ Ejipitə nanje ta kuru ba le tɔ a, ba le uwade.

³⁰ Ddəw mə-kunn tə̂ â ngann Ijarayɛlje njaje gukuje nɛ̂n dɔ bbe kə̂ Jeriko ndɔ siri. A ndoko kə̂ dila n̂-guku nɛ̂n bbe le unda nangə.

³¹ Ddəw mə-kunn tə̂ â Rahabə kə̂ to dɛnɛ̂n nje-kaya oy nɛ̂n kə dəwje kə̂ toje to njê-baanje lə Lubba le ang. Mba n̂-taa njê kə̂ dulade karə tənnje lo ooje kə rɔɛ̂ tə̂ kə majɛ̂.

³² Tar ddi bba mâ pa bbay wa? Bbo ta pa tar dɔ Jedeyɔn tə̂, dɔ Barak tə̂, dɔ Samsɔn tə̂, dɔ Jɛpete tə̂, dɔ Dabbiti tə̂, dɔ Samuwɛl tə̂ kə dɔ njê-kilaje mbər tar lə Lubba tə̂ a, kar a goto.

³³ Ddəw mə-kunn tə̂ â n̂-tətəje tɔkə bbe-kɔnje kə ddɔ. N̂-ddaje nɛ̂n kə̂ gatə gatə ngaâ dingaje nɛ̂n kə̂ Lubba unn ndue ta karəde, n̂-tɔje ta ənamje.

³⁴ N̂-tɔlje puruje kə̂ aw ɔn kə singa nya, n̂-teeje ji dəwje tə̂ kə̂ a ta tɔlde kə tɔkə kiya. Singade ɔru, a n̂-təl dingaje singa. Mə ddɔ tə̂, n̂-ddeeje to baw-ddɔje njaa ngaâ n̂-tubbaje njê-ddɔje kə̂ inje marə bbeje tə̂ kə̂ dang kə̂ ndikije ta taa bbe ləde jide tə̂.

³⁵ Ddəw mə-kunn tə̂ â marə dɛnɛ̂nje təl ingaje dəwje ləde kə̂ oyje, mba dəwje ləde le ndolje. A marə dəwje, dula kəmde ndoo tə̂ ndərəng ngɔsi kə yo, a n̂-ndikije karə dəwje le inyajede ang, bba karə ndɔ kə̂ doyje ngaâ n̂-ndolje a, disije maji uta ye kə̂ kete.

³⁶ Marɛ̂je dɔjude n̂-koko nɛ̂n, n̂-tundade kə ndəy. N̂-tɔ marɛ̂je kə kula njamji ngaâ dungude kəy-kula tə̂.

³⁷ Marɛ̂je, n̂-tilade kə ər n̂-tɔlde, n̂-tuja marɛ̂je n̂-gangəde dannâ joo kə nɛ̂n-kuja kakə, marɛ̂je n̂-tukade kə tɔkə kiya n̂-tɔlde. N̂-gərəje lo kə̂ dâ kisije tə̂ ang. Əndaar batə, ang a, əndaar binya â dɔje. Nɛ̂n kâra ɔru jide ang. Dula kəmde ndoo tə̂ ddəm n̂-ddade maji ang ddəm.

³⁸ A dede le, duninya nəənn asə karə disi tə̂ ang njaa. Dawje kə lo lo, mə kɔrje tə̂, dɔ ddingirije tə̂, mə buja ərje tə̂ ddəm mə bujaje tə̂ kə̂ nangə̂ ddəm.

³⁹ Dede tɔyn, ddəw mə-kunn tə̂ ləde â Lubba pa nɛ̂n tar ləde maji. A dingaje nɛ̂nje kə̂ Lubba unn ndue ta karəde le ang.

⁴⁰ Mba Lubba gɔl marə nɛ̂n kə̂ maji nya uta bbay mbaje. Mba yeenn bba, n̂-ndiki karə jeje kə de tɔyn jinga nɛ̂njeenn le naan tə̂.