Ebərəje 10 - Dɔnɔn kə̂ Siki: Tar kə̂ aw arə təbbə

Kristə ɔru nɛ̂n-poloje kə̂ dɔngɔr kə ddang

¹ Ndu lə Mɔyijə to ndil nɛ̂nje kə̂ maji kə̂ a toje ndɔ tə̂ kə̂ bara, bbo tɔju nɛ̂nje le kə dɔgɔlɛ̂ tɔyn ang. Mba yeenn bba, ddəw nɛ̂n-poloje tə̂ kə̂ daw darə kə bbal kâra kâra tɔyn le, Ndu asə ta dda karə dəw kə̂ ndiki ta ddee ngɔsi kə Lubba ddee maji tɔyn ndɔ kâra ang.

² Mba bbo Ndu asə ta dda tokə baann a, dəw a karə nɛ̂n-polo ang ngaa. Mba njê kə̂ aw poloje Lubba tokə baann le, dâ toko nɛ̂n-yərəw ləde gɔl kâra baa njaa nyɔm ngaâ kəjə tə̂ ləde dâ kooje rɔde to dəwje kə̂ ddaje majang kâra ang.

³ A nɛ̂n-poloje kə̂ dəwje aw arəje Lubba le oleje məde dɔ majangje tə̂ ləde bbal kə bbal.

⁴ Mba məsə baw-mangəje kə məsə bal-binyaje asəje ta kɔru majangje ndɔ kâra ang.

⁵ Mba yeenn bba, kar tə̂ kə̂ Kristə a ta ddee dɔ nangə tə̂ le, n̂-pa narə Lubba nan: «Ə-ndiki nɛ̂n-polo ang ddəm nɛ̂n-karə-baa ang ddəm a ə-dda arə da-rɔm to.

⁶ Daje kə̂ n̂-rode dɔ bann tə̂ wase nɛ̂n-poloje kə̂ dəwje aw arəje mba kɔru nɛ̂n tar majangje, to nɛ̂nje kə̂ aw inga rɔ-nəəl mbɛɛ̂ ang.

⁷ Mba yeenn bba, m-pa nan: ‹əman â mar nəənn, m-ddee ta dda nɛ̂n kə̂ məi ndiki. Ddəw kâra baa kə tar kə̂ Makəturu-əndaar pa dɔm tə̂ le.› »

⁸ Kristə pa dɔngɔr nan: «Nɛ̂n-poloje wase nɛ̂n-karə-baaje, daje kə̂ n̂-ro dɔ bann tə̂ wase nɛ̂n-poloje mba majangje le ə-ndiki tə̂ ang ddəm nəəli ang ddəm.» A, to nɛ̂nje kə̂ Ndu duju karə dəwje ddaje njaa.

⁹ N̂-pa bbay nan: «Əman â mar nəənn, m-ddee ta dda nɛ̂n kə̂ məi ndiki.» Yeenn bba Kristə ɔru nɛ̂n-poloje kə̂ dɔngɔr le ddang a ddee kə nɛ̂n-polo kə̂ siki ture tə̂.

¹⁰ Jeju-Kristə dda nɛ̂n kə̂ Lubba ndiki ddəw da-rɔɛ̂ tə̂ kə̂ nunn gɔl kâra baa njaa narə to dɔbɔnyɛ̂ bba karə n̂-toko nɛ̂n-yərəw ləje.

¹¹ Njê-poloje Lubba kâra kâra tɔyn aw arje taar lo kula tə̂ ləde kə ndɔ tɔyn mba dda kula ləde. Nɛ̂n-poloje kə̂ kâra baa â daw darə. A to nɛ̂n-poloje kə̂ a kasə ta kɔru majangje ndɔ kâra ang.

¹² A Kristə arə nɛ̂n-polo kâra baa mba majangje. Goe tə̂ a, nisi dɔ ji-kɔl Lubba tə̂ nyɔm kə ləw.

¹³ Bbasinɛn, naw nginan karə Lubba ungu njê-baanje laa kɔ gɔlɛ̂ tə̂.

¹⁴ Mba ddəw nɛ̂n-karə-baa tə̂ kə̂ kâra baa njaa, n̂-dda narə dəwje kə̂ n̂-toko majang ləde ddeeje maji tɔyn kə ndɔ kə ndɔ.

¹⁵ Ndil-mə-nda njaa kara pa nan tar nəənn le to tar kə̂ tɔkɔrɔ. N̂-pa nan:

¹⁶ «Əbbə-dəwje pa nan: Dɔnɔn kə̂ mâ kɔsu kə de go ndɔje tə̂ənn â nəənn: Mâ karə nduje ləm to bbəngərəde tə̂, mâ kuja nduje le tokə makəturu dɔ bbəngərəde tə̂.»

¹⁷ Goe tə̂ a, n̂-pa bbay nan: «Mâ kole məm dɔ majang tə̂ ləde ang ngaa ddəm dɔ nɛ̂n-ddaje tə̂ ləde kə̂ ngabula le ang ngaa ddəm.»

¹⁸ A n-gərə kə majɛ̂ to, bbo Lubba ɔru tar majang dɔ dəw tə̂ mban a, dəw le a karə nɛ̂n mba kɔru nɛ̂n tar majang laa le ang ngaa.

Kristə ɔru ddəw kə̂ siki

¹⁹ Yeenn a, ngakɔnʼmje, jee kə ddəw tɔyn njaa ta kandə lo tə̂ kə̂ n̂-sangə dang nya bbay mba Lubba le ddəw məsə Jeju tə̂ kə̂ kayn nangə̂.

²⁰ Nɔru ddəw kə̂ siki kə̂ jasəje ta kunn ta kinga nɛ̂n təbbə narəje. Ddəw le nday mə tɔkə bəl-kubbu tə̂ kə̂ n̂-gangə nɛ̂n mə kəy-tande kinga-naan le. Yeenn pa nan ddəw da-rɔɛ̂ tə̂ njaa.

²¹ Jee kə marə tɔkə nje-polo Lubba kə̂ Lubba undɛ̂ to nje-kɔn dɔ kəy laa.

²² Yeenn a, maji karə n-ddeeje ngɔsi kə Lubba kə mə-kâra ddəm junnje məje tɔyn njaa jarɛ̂je ddəm. Mba məje le, n̂-toko kəjəje kə̂ maji ang kə̂ toje tə̂ kə ddang. Ngaâ da-rɔje le, maann kə̂ maji â n̂-toko nɛ̂n.

²³ Maji karə nɛ̂n kə̂ jundaje məje dɔɛ̂ tə̂ ngaâ jaw paje tarɛ̂ kə ddaka le jinyaje ddəwe ang. Mba Lubba kə̂ unn ndue le aw turu ndue ndɔ kâra ang.

²⁴ Maji karə jundaje kəmje dɔ naan tə̂, jarə ndiki to məje tə̂ ddəm n-ddaje nɛ̂nje kə̂ maji ddəm.

²⁵ Maji karə n-tusuje lo mbɔn-naan ləje jinyaje ang, mba marɛ̂je aw ddaje tokə baann. A maji karə n-ndəjəje naan, mba ooje, ndɔ lə Əbbə-dəwje ddee ngɔsi ngaa.

²⁶ Mba bbo n-gərəje nɛ̂n kə̂ tɔkɔrɔ mban bba n-təlje jaw ddaje majang kə mə-ndiki ləje a, marə nɛ̂n-polo kâra a kasə kɔru majang ləje le ang ngaa.

²⁷ Bbay nɛ̂n kə̂ nayn â to, ta bbəəl nginan nɛ̂n sariya lə Lubba kə̂ a ddee ddəm puru kə̂ ɔn kə singa nya kə̂ to ngɔsi ta kɔn dəwje kə̂ mbətəje ta koo ta Lubba ddəm.

²⁸ Bbo dəw mbətə Ndu lə Mɔyijə, â bbo njê-tar-najije joo wase mota paje nan n̂-dda nɛ̂n le tɔkɔrɔ a, maji karə n̂-tɔlɛ̂ ta dəjə ang.

²⁹ Yeenn a, dəw kə̂ oo Ngonn lə Lubba to nɛ̂n ang kəmɛ̂ tə̂ ngaâ oo məsə dɔnɔn kə̂ Lubba ɔsu karə toko nɛ̂n-yərəwje laa to nɛ̂n kə̂ baa ngaâ taji Ndil-mə-nda kə̂ aw dda saa mə-maji le, kunda laa a bo nya.

³⁰ Mba n-gərəje dəw kə̂ pa nan: «Əman â mâ kila barə! Əman â mâ kuka dəw kâra kâra asə kula-ddɛɛ̂.» N̂-pa tɔ bbay nan: «Əbbə-dəwje a gangə sariya dɔ dəwje tə̂ laa.»

³¹ To nɛ̂n-bbəəl nya ta koso mə ji Lubba kə̂ nje-kisi kəm baa tə̂.

³² A maji karə oleje məse dɔ nɛ̂n tə̂ kə̂ ingase ləw. Go kəmse tə̂ kə̂ Lubba dda arə uja le, ə-maanje gɔlse nangə̂ ə-ddaje nɛ̂n ddɔ arəje ngəng.

³³ Marɛ̂jeenn a, n̂-tajise, dula kəmse ndoo tə̂ kəm dəwje tə̂ tɔyn. Marɛ̂jeenn a, aw umanje njê kə̂ daw dula kəmde ndoo tə̂.

³⁴ Ngaâ ooje kəm-to-ndoo lə njê kə̂ dungude kəy-kula tə̂. A bbo duwa nɛ̂nje ləse n̂-taaje a, aw ndikije tə̂ kə rɔ-nəəl. Mba ə-gərəje to eeje kə nɛ̂n-kingaje kə̂ maji uta yejeenn ddəm nɛ̂n-kingaje kə̂ a toje kə ndɔ kə ndɔ ddəm.

³⁵ Yeenn a, məse kə̂ undaje le, maji karə ə-tusuje inyaje ang. Mba kuka kə̂ bo nya to ddəwe tə̂.

³⁶ Maji karə uwaje arə ngəng bba â ddaje nɛ̂n kə̂ mə Lubba ndiki. Ngaâ goe tə̂ a, â kingaje nɛ̂n kə̂ nunn ndue ta karəse.

³⁷ Mba Makəturu lə Lubba pa nan: «Tɛn be, mbɔr ang njaa a, dəw kə̂ a ta ddee le a ddee, nâ tila ang.»

³⁸ Lubba pa nan: «Dəw ləm kə̂ ddee gatə gatə ddəw mə-kunn tə̂ a kisi kə təbbə. A bbo n̂-təl kə guku a, mâ kinga rɔ-nəəl ddəw tə̂ laa ang.»

³⁹ A jeje, dəwje kə̂ təlje kə guku ngaâ naynje kə kɔrɔ̂ le jeeje horode tə̂ ang. Jeeje horo dəwje tə̂ kə̂ ooje məde tə̂ ta kinga nɛ̂n kaji.