Ebərəje 1 - Dɔnɔn kə̂ Siki: Tar kə̂ aw arə təbbə

Lubba pa tar ddəw tə̂ lə Ngonnɛ̂

¹ Ləw, Lubba pa tar kə kajejedede gɔl banya nya kə gusu kə̂ dang dang ddəw tə̂ lə njê-kilaje mbər tar laa.

² A bbasinɛn, ddutu ndɔje tə̂ nəənn, Lubba pa kə je tar ddəw tə̂ lə Ngonnɛ̂. Ddəw tə̂ lə Ngonnɛ̂ le â n̂-dda nɛ̂nje tɔyn ngaâ nunn ngonnɛ̂ le karə ddee to nje-nɛ̂nje tɔyn.

³ Ddəw tə̂ lə Ngonn le â dəwje ooje piti lə Lubba kə̂ aw ndoko ngaâ n̂-to tokə Lubba njaa. Tar laa kə̂ ee kə singa nya aw dda arə nɛ̂nje tɔyn naynje kə lo-tode. N̂-toko majang lə dəwje ngaâ goe tə̂ a, naw nisi darâ dɔ ji-kɔl Lubba tə̂ kə̂ to nje-singa-mɔngu.

Ngonn lə Lubba uta anjəje

⁴ Mba yeenn bba, Lubba dda arə Ngonnɛ̂ le uta anjəje ngaâ ri kə̂ n̂-bbarɛ̂ nɛ̂n ngəng uta ri kə̂ n̂-bbar nɛ̂n anjəje.

⁵ Ta pa nan: «Ə-to Ngonnəm, bbokənɛn marə ə-ddee to ngonnəm ngaa.» Ndɔ kâra Lubba pa tar baann arə marə anjə ang. Ngaâ ta pa nan: «Əman, mâ to bɔɛ̂je, a ne nâ to Ngonnəm.» Ndɔ kâra n̂-pa tar dɔ marə anjə tə̂ baann ang tɔ.

⁶ A kar tə̂ kə̂ Lubba aw ula ngonn-dəre dɔ nangə tə̂ le, n̂-pa nan: «Maji karə anjəje lə Lubba tɔyn poleje.»

⁷ Lubba pa tar dɔ anjəje tə̂ nan: «M-dda marə anjəje ləm aw ddaje kula tokə ləl, daw ddaje kula darəm tokə ndɔn-puru.»

⁸ A n̂-pa narə Ngonnɛ̂ nan: «Ə-to Lubba, kɔn-mbay ləi a to kə ndɔ kə ndɔ. Ngaâ, kɔn-mbay ləi to kɔn-mbay kə̂ gatə gatə.

⁹ Nɛ̂n kə̂ gatə gatə â ə-ndiki, a ə-mbətə majang. Mba yeenn bba, Lubba kə̂ to Lubba ləi le mbəri horo njê-marije tə̂ ngaâ ungu ubbu kusu dɔi tə̂.»

¹⁰ Lubba pa bbay nan: «Kunn-kutu nɛ̂n tə̂, əi Əbbə-dəwje â ə-dda nangə, a dara to nɛ̂n kə̂ ə-dda kə jii.

¹¹ Nɛ̂njeenn tɔyn a gotoje, a əi, ə-nayn kə ndɔ tɔyn. Dara kə nangə a ngisije tokə lə kubbu.

¹² A kəde tokə lə kubbu kə̂ daw n̂-kə. Tɔkɔrɔ njaa, dâ mbəlde tokə lə kubbu. A əi, ə-nayn kə ndɔ tɔyn, ngaâ ndɔi a kɔsu kɔyn ndɔ kâra ang.»

¹³ Ta pa karə marə anjə nan: «Ə-ddee isi dɔ ji-kɔləm tə̂, mâ dda karə njê-baanje ləi ddeeje to lo kungu gɔli.» Lubba pa tar baann ndɔ kâra ang.

¹⁴ Anjəje tɔyn toje to ndilje kə̂ aw ddaje kula arə Lubba. Naw nulade narə daw dumanje dəwje kə̂ n̂-ndiki ta kajide.