Apokalisi 9 - Dɔnɔn kə̂ Siki: Tar kə̂ aw arə təbbə

Təbbə kə̂ to min laa bbar

¹ Anjə kə̂ to min laa to təbbə, a moo marə əndɛtɛrɛndɛn in darâ oso nangə̂. Darɛ̂ ngaw kele ta tɔkə buwa kə̂ sunrɛ̂ goto.

² Əndɛtɛrɛndɛn le ɔru ta tɔkə buwa kə̂ sunrɛ̂ goto le. Sa ubba tə̂ tokə sa tɔkə puru. Sa kə̂ ubba buwa tə̂ le dda arə kar kə kəm dara tuka ndul biti biti.

³ Əbeteje inje mə sa tə̂ le teeje ngaâ gaynje nangə̂. Darəde singa karə duta nɛ̂n dəwje tokə nyije kə̂ dɔ nangə tə̂.

⁴ Darəde ndu karə n̂-tujuje muje kə kamje kə kakəje ang. A dəwje kə̂ əndaji lə Lubba goto əngo-nɔnde tə̂ â ta n̂-ddajede maji ang.

⁵ Darə ddəw əbeteje le karə n̂-tɔlje dəwje le ang, a ta kula â dulaje kəmde ndoo nɛyn min. Dâ tɔsuje dəwje le karə tode tokə lə nyi.

⁶ Kar tə̂ənn, dəwje a sangəje yo, a dâ kingɛ̂ ang nyɔm. Dâ ndikije ta koy, a yo a kaynde kaw ddəw əw.

⁷ Əbeteje le undaje rɔ sundaje kə̂ n̂-gɔlde ta dda nɛ̂n ddɔ. Marə nɛ̂n to dɔde tə̂ tokə lə əjɔkudɔ kə̂ n̂-dda kə andə ngaâ kəmde unda kəm dəw.

⁸ Biin-dɔde tokə lə biin-dɔ dɛnɛ̂n ngaâ ngangəde tokə lə ngangə ənam.

⁹ Əbeteje le, tokə dula dɔ-kubbu-ddɔ kə̂ n̂-dda kə andə-narɛ nɔn-gude tə̂. Kɔru bakəde bbar tokə kɔru sarɛtə ddɔ kə̂ sundaje tokə banya aw ndɔruje awje nɛ̂n kə ta ddɔ tə̂.

¹⁰ Bbɔngude tokə bbɔngu nyi, ngawɛ̂ to tə̂. Singa kə̂ ta karə dulaje nɛ̂n kəm dəwje ndoo tə̂ mba nɛyn min le to bbɔngude tə̂ le.

¹¹ Tɔkə mbay ləde to anjə kə̂ to mə tɔkə buwa tə̂ kə̂ sunrɛ̂ goto le. Ria kə ndɔn-tar lə ebərəje nan Abadɔn, a kə ndɔn-tar lə gerekəje nan Apolinyɔ. Kandə ri le nan «Nje-nɛ̂n-tuju».

¹² Dɔngɔr nɛ̂n kəm-to-ndoo le nday mban. A marə nɛ̂n kəm-to-ndooje joo aw ddeeje goe tə̂ bbay.

Təbbə kə̂ to misan laa bbar

¹³ Anjə kə̂ to misan ləde le to təbbə laa. A bann kə̂ n̂-dda kə andə-narɛ kə̂ to nɔn Lubba tə̂ le, moo marə ndu bbar ər kəkəleje tə̂ sɔ kəm.

¹⁴ Ndu le pa arə anjə kə̂ to misan ləde kə̂ uwa təbbə jia tə̂ le nan: «Ə-tutu anjəje kə̂ sɔ kə̂ n̂-tɔde mbɔr tɔkə ba tə̂ kə̂ ria nan Əparatə le.»

¹⁵ N̂-tutu anjəje kə̂ sɔ le. Bbo n̂-kayn horo dəwje kə̂ dɔ nangə tə̂ loe mota a, n̂-toje ngɔsi ta tɔl dəbbə dəwje kə̂ dəbbə nangə tə̂ le kâra karɛ̂ tə̂ənn, ndɔɛ̂ tə̂ənn, mə nɛyn tə̂ənn kə bbalɛ̂ tə̂ənn le.

¹⁶ Kɔr njê-ddɔje kə̂ toje to njê-sundaje kə̂ n̂-bbar darə moo to doro doro kɔr joo (200 000 000).

¹⁷ Mə nin tə̂ ləm le, moo sundaje kə njê kə̂ aw aalje sundaje le a, n̂-toje tokə be: Dulaje dɔ-kubbu-ddɔje kə̂ kasɛ tokə lə puru ddəm ndul tokə lə kəm dara ddəm tokə lə supərə ddəm nɔn-gude tə̂. Dɔ sundaje le tokə lə dɔ ənam. Puru kə sa kə supərə in tade tə̂ aw tee.

¹⁸ Nɛ̂n kəm-to-ndooje kə̂ mota nəənn le: Puru, sa kə supərə kə̂ aw teeje ta sundaje tə̂ le tɔlje dəbbə dəwje kâra horo dəbbə dəwje tə̂ kə̂ mota le.

¹⁹ Mba singa sundaje le to mə kilde tə̂ ddəm bbɔngude tə̂ ddəm. Bbɔngude undaje rɔ li. Bbɔngude le dɔɛ̂ to dɔɛ̂ le â daw ddaje nɛ̂n dəwje maji ang.

²⁰ A kəsə dəwje kə̂ nɛ̂n kəm-to-ndooje nəənn le tɔljede ang le inyaje ddəw polo kɔrje kə̂ n̂-ddaje kə jide njaa le ang. N̂-naynje daw poloje ndilje kə̂ maji ang, daw poloje kɔrje kə̂ n̂-ddaje kə andə kə narɛ kə tungu kə ər kə kakə. Kɔrje kə̂ aw ooje lo ang ddəm aw ooje tar ang ddəm aw njaje ang ddəm le.

²¹ Dinyaje ddəw tɔl dəw ang ddəm ddəw əmbilije ləde ang ddəm ddəw kaya ang ddəm ddəw bbokoje ləde ang ddəm.