Apokalisi 8 - Dɔnɔn kə̂ Siki: Tar kə̂ aw arə təbbə

Ngonn batə ɔru nɛ̂nje kə̂ to siri laa kə̂ n̂-lətə nɛ̂n ta makəturu

¹ Kar kə̂ Ngonn batə le ɔru nɛ̂nje kə̂ n̂-lətə nɛ̂n ta makəturu kə̂ to siri laa le a, lo to nyɛnɛnɛ mə dara tə̂, ngɔsi kə gɔju gɔl kar kâra.

² Moo anjəje kə̂ siri kə̂ arje nɔn Lubba tə̂ le. Darəde təbbəje siri.

³ Marə anjə dang bbay ddee ar mbɔr bann tə̂ le. Nuwa marə ngonn jo ro dukann kə̂ n̂-dda kə andə jia tə̂. Darɛ̂ dukann tokə banya karə n̂-ro dɔ bann tə̂ kə̂ n̂-dda kə andə kə̂ to nɔn ngende-mbay tə̂ le ddəm karə n̂-ddee kə dujuje lə dəwje lə Lubba tɔyn nɔn Lubba tə̂ le ddəm.

⁴ Sa dukann le kə dujuje lə dəwje lə Lubba le inje ji anjə tə̂ le ubba nɔn Lubba tə̂.

⁵ Anjə le unn ngonn jo ro dukann le ungu puru kə̂ dɔ bann tə̂ le məɛ tə̂ ddusu ngaâ bi ila dɔ nangə tə̂. Njangə baa a, ndi ndangə, kɔru ndu nɛ̂nje bbar, ndi təəl ngaâ nangə yəkə.

Təbbəje kə̂ toje to dɔngɔrɛ̂ sɔ bbarje

⁶ Anjəje siri kə̂ uwaje təbbəje siri jide tə̂ le aw gɔlje rɔde ta to.

⁷ Anjə kə̂ dɔngɔr to təbbə laa. A kɔju kə puru poleje naan kə məsə ngaâ gaynje dɔ nangə tə̂. Bbo n̂-kayn nangə kə kakəje kə̂ dɔ nangə tə̂ loe mota a, puru ɔn dəbbə nangə le kâra, ɔn dəbbə kakəje le kâra ngaâ ɔn kamje kə muje kə̂ təbbə tɔyn.

⁸ Anjə kə̂ to joo laa to təbbə laa. A marə nɛ̂n tokə tɔkə ddingiri kə̂ aw ɔn puru tee oso mə ba-katə tə̂. Dəbbə ba-katə le təl to məsə.

⁹ Bbo n̂-kayn horo nɛ̂nje kə̂ Lubba dda kə̂ toje mə maannje tə̂ loe mota a, marə dəbbe kâra oy ngaâ tɔkə toje kə̂ toje dɔ ba-katə tə̂, marɛ̂ kâra horo toje tə̂ mota tuju.

¹⁰ Anjə kə̂ to mota laa to təbbə laa. A marə tɔkə əndɛtɛrɛndɛn kə̂ aw ɔn puru tokə puru-ngeel in darâ oso. Bbo n̂-kayn horo baje kə̂ dɔ nangə tə̂ loe mota a, əndɛtɛrɛndɛn le oso dɔ dəbbə ba tə̂ le kâra ddəm loje tə̂ kə̂ maannje aw inje tə̂ aw teeje ddəm.

¹¹ Ri əndɛtɛrɛndɛn le nan «Nɛ̂n kə̂ atə.» Dəbbə maannje kə̂ noso dɔɛ̂ tə̂ le atə ngaâ dəwje nya kə̂ ayje maannje kə̂ atə le oyje.

¹² Anjə kə̂ to sɔ laa le to təbbə laa. Bbo n̂-kayn mə kar, mə nɛyn kə mə əndɛtɛrɛndɛnje loe mota mota a, dunda dəbbə kar le kâra, dəbbə nɛyn kâra kə dəbbə əndɛtɛrɛndɛnje kâra karə n̂-ndokoje ang. Yeenn bba, karâ wase til tə̂ kara, lo a ndoko tɔyn ang.

¹³ Maa lo bbay a, moo kɔru marə təndə kə̂ aw in mə dara tə̂ taar nu. Əəl le uru əkii kə singa nan: «Nɛ̂n kəm-to-ndoo, nɛ̂n kəm-to-ndoo, nɛ̂n kəm-to-ndoo a to lə dəwje kə̂ dɔ nangə tə̂ ɔju dɔ kəsə anjəje kə̂ mota kə̂ a toje təbbəje ləde le!»