Apokalisi 7 - Dɔnɔn kə̂ Siki: Tar kə̂ aw arə təbbə

Lubba uja əndaji əngo-nɔn dəwje tə̂ (144 000)

¹ Goe tə̂ a, moo anjəje sɔ. Darje kəkəl nangə tə̂ kə̂ sɔ. Duwaje ləlje kə̂ sɔ kə̂ aw ulaje dɔ nangə tə̂ darə kâra njaa kara ula dɔ nangə tə̂ ang ddəm dɔ ba-katə tə̂ ang ddəm dɔ kakəje tə̂ ang ddəm.

² Moo marə anjə dang in ər kəm kar tə̂ ngaâ uwa nɛ̂n-kuja əndaji lə Lubba kə̂ nje-kisi kəm baa jia tə̂. Nila ko narə anjəje sɔ kə̂ darəde ddəw karə n̂-tujuje nangə ddəm ba-katə ddəm le. N̂-pa nan:

³ «Ə-tujuje nangə ang ddəm ba-katə ang ddəm kakəje ang ddəm. Ə-nginanje arə juja əndaji əngo-nɔn njê-kulaje tə̂ lə Lubba ləje bba.»

⁴ Moo kɔr dəwje kə̂ duja əndaji əngo-nɔnde tə̂ le. Deeje doro kɔr kâra kə dɔsɔ gire sɔ (144 000) To dəwje kə̂ inje horo gəl-dəwje tə̂ tɔyn kə̂ Ijarayɛl.

⁵ Njê kə̂ gəl Juda tə̂ kə̂ əndaji to rɔde tə̂ doro dɔku gire joo (12 000), njê kə̂ gəl Rubɛnn tə̂ doro dɔku gire joo (12 000), njê kə̂ gəl Gadə tə̂ doro dɔku gire joo (12 000),

⁶ njê kə̂ gəl Ajɛr tə̂ doro dɔku gire joo (12 000), njê kə̂ gəl Nepetali tə̂ doro dɔku gire joo (12 000), njê kə̂ gəl Manase tə̂ doro dɔku gire joo (12 000),

⁷ Njê kə̂ gəl Simenyɔ tə̂ doro dɔku gire joo (12 000), njê kə̂ gəl Lebi tə̂ doro dɔku gire joo (12 000), njê kə̂ gəl Isakar tə̂ doro dɔku gire joo (12 000),

⁸ njê kə̂ gəl Jabulɔn tə̂ doro dɔku gire joo (12 000), njê kə̂ gəl Jojɛpə tə̂ doro dɔku gire joo (12 000), njê kə̂ gəl Bɛnjamɛn tə̂ doro dɔku gire joo (12 000). Dede tɔyn kə̂ dɔsu əndaji nɔnde tə̂.

Dəwje tokə banya arje nɔn ngende-mbay tə̂

⁹ Goe tə̂, maa lo bbay a, moo dəwje tokə banya. Dəw asə turade ang. Dinje horo dəwje tə̂ kə̂ gəlde dang dang tɔyn, horo njê kə̂ bbeje tə̂ dang dang, horo njê kə̂ nangəje tə̂ dang dang kə horo njê kə̂ ndɔn-tarje ləde to dang dang. Darje nɔn ngende-mbay tə̂, nɔn Ngonn batə tə̂ le. Dulaje tɔkə kubbu kə̂ nda ngaâ duwaje kam mburu jide tə̂.

¹⁰ Daw duruje əkii nan: «Lubba ləje kə̂ isi ngende-mbay tə̂ de kə Ngonn batə â dajijeje.»

¹¹ Yeenn ngaâ anjəje tɔyn kə̂ gukuje dɔ ngende-mbay le ddəm dɔ tɔkəje le ddəm dɔ nɛ̂nje kə̂ toje kəm baa kə̂ sɔ le ddəm dosoje nangə̂ nɔn ngende-mbay tə̂ le, n̂-dəbbəje kəmde nangə̂ ngaâ n̂-poloje Lubba.

¹² N̂-paje nan: «Amɛnn! Piti, kɔsu gaji, kəm-karɛ, wooyo, ndɔy-ri, singa-mɔngu kə singa toje to lə Lubba ləje kə ndɔ kə ndɔ. Amɛnn!»

¹³ Yeenn ngaâ marə tɔkə le kâra dujum nan: «Dəwje kə̂ ulaje kubbu kə̂ nda nəənn toje to nân wa? Dinje dda wa?»

¹⁴ Milɛ̂ tə̂ m-pa nan: «Əbbəmje, əi â ə-gərə.» Yeenn ngaâ n̂-pa narəm nan: «To dəwje kə̂ ndayje mə tɔkə nɛ̂n-singaje tə̂. N̂-tokoje kubbuje ləde kə məsə ngonn batə darə nda.

¹⁵ Mba yeenn bba, darje nɔn ngende-mbay tə̂ lə Lubba daw poleje til kə kar mə kəy tə̂ kə̂ daw pole tə̂. Ne kə̂ nisi ngende-mbay tə̂ le, nâ ngəmde.

¹⁶ Bbo a ddade ang ngaa ddəm kunda a kɔnde ang ngaa ddəm. Kar a kɔsude ang ngaa ddəm lo a tungade ang ngaa ddəm.

¹⁷ Mba ngonn batə kə̂ ee dɔ ngende-mbay tə̂ le a ngəmde tokə lə nɛ̂n-kuulje ngaâ nâ kaw kə de loje tə̂ kə̂ maannje kə̂ aw arə təbbə inje kə tə̂ bba aw teeje. Ngaâ Lubba a bɔru maann-nɔn kəmde tə̂ tɔyn.»