Apokalisi 6 - Dɔnɔn kə̂ Siki: Tar kə̂ aw arə təbbə

Ngonn batə ɔru nɛ̂nje misan kə̂ n̂-lətə nɛ̂n ta makəturu le

¹ Goe tə̂ a, moo Ngonn batə le ɔru nɛ̂n kə̂ to dɔngɔrɛ̂ kə̂ n̂-lətə nɛ̂n ta makəturu loe siri le. A nɛ̂nje kə̂ toje kəm baa le, moo əkii lə marɛ̂ kâra bbar tokə ndi kə̂ ndangə nan: «Ə-ddee!»

² Maa lo a, moo sunda kə̂ nda. Dəw kə̂ aal sunda le uwa giri-kɔndɔrɔ jia tə̂. Darɛ̂ əjɔkudɔ ngaâ naw to nje-tətə-ddɔ njaa ta tətə ddɔ.

³ Ngonn batə le ɔru nɛ̂n kə̂ n̂-lətə nɛ̂n ta makəturu le kə̂ to joo laa a, nɛ̂nje kə̂ toje kəm baa le, moo əkii le joo ləde nan: «Ə-ddee!»

⁴ A marə sunda kə̂ kasɛ tokə lə purujeenn tee. Dəw kə̂ aal sunda le, darɛ̂ singa karə nɔru mə-wul-lɔm dɔ nangə tə̂ kə ddang, karə ta dəwje tɔlje naan. Darɛ̂ tɔkə kiya kə̂ ngal tɔ.

⁵ Ngonn batə le ɔru nɛ̂n kə̂ n̂-lətə nɛ̂n ta makəturu le kə̂ to mota laa a, nɛ̂nje kə̂ toje kəm baa le, moo əkii lə mota ləde nan: «Ə-ddee!» A moo marə sunda kə̂ ndul. Dəw kə̂ aal sunda le uwa kilo jia tə̂.

⁶ Moo kɔru nɛ̂n tokə ndu dəw horo nɛ̂nje tə̂ kə̂ sɔ kə̂ toje kəm baa le nan: «Narɛ kula lə dəw kə̂ ndɔ kâra asə ndoko kilo ble kâra baa, a asə ndoko kilo ɔrjə mota. A inya ubbu kə bɛn arə to kə lo-toe.»

⁷ Ngonn batə le ɔru nɛ̂n kə̂ n̂-lətə nɛ̂n ta makəturu le kə̂ to sɔ laa a, nɛ̂nje kə̂ toje kəm baa le, moo əkii lə sɔ ləde nan: «Ə-ddee!»

⁸ A moo marə sunda kə̂ rɔɛ̂ tokə lə kam. Ri dəw kə̂ aal sunda le nan Yo. Ngaâ lo lə dəwje kə̂ oy aw unn goe. Bbo n̂-kayn dɔ nangə loe sɔ a, darəde singa karə n̂-tɔlje dəwje kə̂ dəbbə nangə tə̂ le loe kâra. Dâ tɔlje dəwje le kə tɔkə kiya ddəm bbo ddəm rɔ-to kə̂ maji ang ddəm ngaâ dâ karəje daje kə̂ muû kə̂ dɔ nangə tə̂ tɔlde tɔ.

⁹ Ngonn batə le ɔru nɛ̂n kə̂ n̂-lətə nɛ̂n ta makəturu le kə̂ to min laa a, moo ndil dəwje kɔ bann tə̂. To ndil dəwje kə̂ n̂-tɔlde mba tar lə Lubba kə tar-naji kə̂ n̂-paje.

¹⁰ Daw duruje əkii kə taar nan: «Əbbə-dəwje, əi kə̂ ə-maji tɔyn ngaâ ə-to dəw kə̂ tɔkɔrɔ, â nginan ndərəng ndɔ kə̂ dda bba â gangə sariya dɔ dəwje tə̂ kə̂ dɔ nangə tə̂ nəənn, ta kila barə ləje mba tɔl kə̂ n̂-tɔlje le wa?»

¹¹ Yeenn ngaâ darəde tɔkə kubbu kə̂ nda, kə̂ ngal kâra kâra tɔyn. Ngaâ, n̂-pa darəde karə n̂-nginanje ngaji, karə kɔr nje-kula marədeje kə kɔr ngakɔndeje utu naan bba. Mba dede kara dâ tɔlde tokə ləde tɔ.

¹² Maa lo ngaâ moo Ngonn batə le ddee ɔru nɛ̂n kə̂ n̂-lətə nɛ̂n ta makəturu le kə̂ to misan laa. A nangə yəkə kə singa. Kar tuka ndul tokə kubbu kuwa-ndoo, a nɛyn ddee tokə lə məsə.

¹³ Əndɛtɛrɛndɛnje inje darâ gaynje nangə̂ tokə kandə pigə kə̂ nayn sangəje ang bbay ngaâ tɔkə ləl aw yəkə kakɛ̂ arə aw gayn.

¹⁴ Dara nday tokə rakə kə̂ daw kə. Ddingirije kə dɔ dərə-maannje gotoje loje tə̂ ləde.

¹⁵ Tɔkə mbayje kə̂ dɔ nangə tə̂, njê-kɔn-bbeje, njê-kɔnje dɔ mbambaje, njê-nɛ̂n-kingaje, njê-singa-mɔnguje, bbərəje kə bbərəje ang, diyaje rɔde bolo ddingirije tə̂ kə horo ərje tə̂.

¹⁶ N̂-paje darə ddingirije kə ərje le nan: «Osoje dɔje tə̂, ɔnnje dɔje arəje ne kə̂ nisi dɔ ngende-mbay tə̂ nooje ang karə n-tee ta wungu tə̂ lə Ngonn batə le.

¹⁷ Mba tɔkə ndɔ wungu ləde asə ngaa. Nân bba a nayn wa?»