Apokalisi 5 - Dɔnɔn kə̂ Siki: Tar kə̂ aw arə təbbə

Ngonn batə asə ta kɔru ta makəturu

¹ Goe tə̂ a, dəw kə̂ isi ngende-mbay tə̂ le, moo makəturu kə̂ n̂-kə to jia tə̂ kə̂ kɔl. Duja makəturu mə tə̂ ddəm gire tə̂ ddəm. N̂-lətə tɛɛ̂, loe siri.

² Moo marə anjə kə̂ nje-singa-mɔngu aw ila mbər kə singa nan: «Nân bba asə ta kɔru nɛ̂n kə̂ n̂-lətə nɛ̂n ta makəturu nəənn ngaâ ta təəyn wa?»

³ A mə dara tə̂ wase dɔ nangə tə̂ wase gəl nangə tə̂, dəw kâra kə̂ asə təəyn makəturu le ta kaa məɛ̂ koo goto.

⁴ M-nɔn nya, mba dəw kə̂ asə ta təəyn makəturu le ta kaa koo goto.

⁵ A marə tɔkə le kâra pa arəm nan: «Ə-nɔn ang. Oo, ənam kə̂ gəl Juda tə̂, ne kə̂ n̂-to dəw kə̂ gəl Dabbiti tə̂ kə̂ n̂-tətə ddɔ, nasə ta kɔru ta makəturu kə̂ tokə lətə loe siri le ddəm ta təəyn makəturu le ddəm.»

⁶ Maa lo ngaâ moo marə Ngonn batə ar dannâ mbɔr ngende-mbay tə̂ le, horo nɛ̂nje tə̂ sɔ kə̂ toje kəm baa le kə horo tɔkəje tə̂ le. Ngonn batə le ar tokə batə kə̂ n̂-tɔlɛ̂ mban to nɛ̂n-polo. Gajɛ̂ ee siri ngaâ kəmɛ̂ ee siri tɔ. Kəmɛ̂ kə̂ siri le toje to ndilje lə Lubba kə̂ siri kə̂ Lubba ulade dɔ nangə tə̂ tɔyn le.

⁷ Ngonn batə le nja kə kete aw taa makəturu le ji dəw tə̂ kə̂ isi ngende-mbay tə̂ le, jia tə̂ kə̂ kɔl.

⁸ N̂-taa makəturu le a, nɛ̂nje sɔ kə̂ toje kəm baa le kə tɔkəje kə̂ dɔjoo gire sɔ le ɔsuje məkəjə-gɔlde nangə̂ nɔɛ̂n tə̂. Konde kə əngo-narɛje kə̂ yambo ddusu toje jide tə̂ kâra kâra tɔyn. Yambo le to duju lə dəwje lə Lubba.

⁹ Daw dɔsuje pa kə̂ siki nan: «Asə ta taa makəturu le, ta kɔru nɛ̂n kə̂ n̂-lətə nɛ̂n tɛɛ̂. Mba n̂-tɔli to nɛ̂n-polo. Ə-ndoko dɔ dəwje tɔyn kə məsəi arə Lubba, dəwje kə̂ gəlde to dang dang tɔyn, njê kə̂ ndɔn-tarje ləde to dang dang tɔyn, kə njê kə̂ isije nangəje tə̂ ləde kâra kâra tɔyn.

¹⁰ Ə-ddade to dəwje kə̂ mə Bbe-kɔn tə̂ lə Lubba ddəm njê-poloje Lubba ddəm karə n̂-ddaje kula laa. Dâ kɔn-mbay dɔ nangə tə̂.»

¹¹ Maa lo bbay a, moo ndu anjəje tokə banya. Kɔrde asə doro doro, asə tura ang. N̂-gukuje dɔ ngende-mbay le ddəm nɛ̂nje kə̂ sɔ kə̂ toje kəm baa le ddəm tɔkəje le ddəm.

¹² Dɔsuje pa kə singa nan: «Ngonn batə kə̂ n̂-tɔlɛ̂ le, asə ta kinga singa-mɔngu, nɛ̂n-kinga kə kəm-karɛ. Nasə ta kinga singa, piti, kɔsu gaji, nasə karə dəwje walɛ̂je!»

¹³ Moo ndu nɛ̂nje tɔyn kə̂ Lubba ddade ngaâ toje mə dara tə̂, dɔ nangə tə̂, gəl nangə tə̂, dɔ ba-katə tə̂ kə mə ba-katə tə̂. Dɔsuje pa nan: «Maji karə piti, ndɔy-ri, kɔsu gaji kə singa-mɔngu, toje to lə ne kə̂ nisi ngende-mbay tə̂ le ddəm Ngonn batə le ddəm kə ndɔ kə ndɔ!»

¹⁴ Nɛ̂nje kə̂ sɔ kə̂ toje kəm baa le paje nan: «Amɛnn!» A tɔkəje le ɔsuje məkəjə-gɔlde nangə̂ ngaâ poloje ne kə̂ nisi ngende-mbay tə̂ le ddəm Ngonn batə le ddəm.