Apokalisi 4 - Dɔnɔn kə̂ Siki: Tar kə̂ aw arə təbbə

N̂-polo Lubba darâ

¹ Goe tə̂ a, moo ta-kəy kə̂ tokə kɔru mə dara tə̂. Ndu kə̂ pa səm tar kete ngaâ bbar tokə lə təbbə le, pa nan: «Aal kə nəənn, mâ tɔji nɛ̂n kə̂ a ddee goe tə̂.»

² Njangə baa njaa a, Ndil-mə-nda uwam a, moo marə ngende-mbay mə dara tə̂. Marə dəw isi dɔɛ tə̂.

³ Dəw le ndɔnrɛn tokə ərje kə̂ gatɛ̂ ngəng nya, kə̂ ria nan jaspə kə sarduwann. Ngaburandi kə̂ ndɔnrɛn tokə lə ər kə̂ ria nan emerodə guku dɔ ngende-mbay le.

⁴ Marə ngende-mbayje dɔjoo gire sɔ gukuje dɔ ngende-mbay le ngaâ tɔkəje dɔjoo gire sɔ isije dɔɛ tə̂ kâra kâra tɔyn. Dulaje kubbu kə̂ nda ngaâ dundaje əjɔkudɔ kə̂ n̂-dda kə andə-narɛ dɔde tə̂.

⁵ Təəl lə ndi, kɔru nɛ̂nje kə ndangə lə ndi inje ngende-mbay tə̂ kə̂ to dannâ le aw teeje. Puru-ngeelje siri kə̂ aw ɔnje kə singa toje nɔn ngende-mbay tə̂ le. Puru ngeeljeenn le toje to ndilje lə Lubba kə̂ siri le.

⁶ Marə nɛ̂n tokə lə ba-ər kə̂ kəmɛ̂ arɛ yərərə to nɔn ngende-mbay tə̂ le. Marə nɛ̂nje kə̂ toje kəm baa sɔ gukuje ngende-mbay kə̂ to dannâ le, kəmde to rɔde tə̂ tɔyn kete ddəm guku ddəm.

⁷ Dɔngɔr nɛ̂n kə̂ to kəm baa le unn da-rɔ ənam, joo laa unn da-rɔ ngonn mangə, mota laa unda kəm dəw, a sɔ laa unn da-rɔ təndə kə̂ aw in.

⁸ Bakə nɛ̂nje kə̂ sɔ kə̂ toje kəm baa le eeje misan misan. Kəmde to dɔ bakədeje tə̂ le ddəm kɔ bakədeje tə̂ le ddəm. Daw dɔsuje pa til kə kar, n̂-paje nan: «Əbbə-dəwje Lubba kə̂ Nje-singa-mɔngu maji tɔyn, maji tɔyn, maji tɔyn. Ne kə̂ n̂-to ləw, n̂-to bbasinɛn nəənn, kə̂ naw ddee.»

⁹ Kə kar tɔyn, bbo nɛ̂nje kə̂ sɔ le aw ɔsuje pa ta wal nɛ̂n, ta piti nɛ̂n, ta karə nɛ̂n wooyo ne kə̂ nisi dɔ ngende-mbay tə̂ ngaâ nisi kəm baa kə ndɔ kə ndɔ le a,

¹⁰ tɔkəje kə̂ dɔjoo gire sɔ le ɔsuje məkəjə-gɔlde nɔɛ̂n tə̂, ne kə̂ nisi ngende-mbay tə̂ le, n̂-walɛ̂je nɛ̂n, ne kə̂ nisi kə ndɔ kə ndɔ le. Dunguje əjɔkudɔje ləde nɔn ngende-mbay tə̂ le ngaâ n̂-paje nan:

¹¹ «Əbbə-dəwje Lubba ləje, asə ta karə dəwje pitije, karə dəwje walije, asə ta kinga singa-mɔngu, mba əi njaa ə-dda nɛ̂nje tɔyn, əi njaa ə-ndiki bba nɛ̂nje le toje.»