Apokalisi 21 - Dɔnɔn kə̂ Siki: Tar kə̂ aw arə təbbə

Dara kə̂ siki kə nangə kə̂ siki

¹ Goe tə̂ a, moo dara kə̂ siki kə nangə kə̂ siki. Mba dara kə̂ dɔngɔr kə nangə kə̂ dɔngɔr ikije ngaâ ba-katə goto ngaa.

² Ngaâ moo tɔkə bbe kə̂ maji tɔyn kə̂ to Jerujalɛm kə̂ siki kə̂ in rɔ Lubba tə̂ darâ aw ddisi. Tɔkə bbe le to tokə lə dɛnɛ̂n kə̂ dda mandə ngaâ ar dɔgɔlɛ̂ tə̂ aw nginan ngawɛ̂je.

³ Moo ndu bbar kə singa ngende-mbay tə̂ le nan: «Bbasinɛn, kəy lə Lubba to horo dəwje tə̂ ngaa. Nâ dda bbe kə̂ de ngaâ dâ toje to dəwje laa. Ne Lubba njaa nâ kisi kə de ngaâ nâ to Lubba ləde.

⁴ Nâ bɔru maann-nɔn tɔyn kəmde tə̂. Yo a goto ngaa. Ndoo, əkii kə nɛ̂n kəm-to-ndoo a gotoje, mba nɛ̂nje kə̂ ləw ndayje mban.»

⁵ Ngaâ dəw kə̂ isi ngende-mbay tə̂ le pa nan: «Oo! M-dda nɛ̂nje tɔyn tokə siki ngaa.» N̂-pa nan: «Uja tarje nəənn makəturu tə̂. Mba tarje ləm to tarje kə̂ tɔkɔrɔ ngaâ asəje karə dəw unda məɛ̂ dɔɛ tə̂.»

⁶ Ngaâ n̂-pa narəm nan: «Bbayɛ̂ ngaa! M-to Alpa kə Omega, m-to kunn-kutu nɛ̂n ddəm dɔbɔyn nɛ̂n ddəm. Dəw kə̂ kunda ɔɛ̂n a, əman, mâ karɛ̂ maann kə̂ aw arə təbbə nay baa. To maann kə̂ aw in mə nangə tə̂ aw tee.

⁷ Dəw kə̂ tətə ddɔ a, mâ karə nɛ̂njeenn le ddeeje to laa. Mâ to Lubba laa ngaâ nâ to ngonnəm.

⁸ A njê-bbəəlje, njê kə̂ tusuje mə-kunn inyaje, njê-nɛ̂n-ddaje kə̂ maji ang, njê-tɔlje dəwje, njê-ddaje lo-to-majang, njê-maalje, njê-poloje kɔr kə njê-ngəmje tɔyn, lo ləde to mə ndakə puru kə supərə tə̂. Yeenn to yo kə̂ gɔl joo laa.»

Jerujalɛm kə̂ siki

⁹ Goe tə̂ a, anjə kâra horo njê kə̂ siri tə̂ kə̂ uwaje əngo nɛ̂n kəm-to-ndooje kə̂ siri jide tə̂ le ddee pa arəm nan: «Ə-ddee arə m-tɔji nje-ngaw le, dɛnɛ̂n lə Ngonn batə le.»

¹⁰ Ndil uwam ngaâ anjə le unnum aw səm dɔ ddingiri tə̂ kə̂ bo kə̂ ndəw. N̂-tɔjum Jerujalɛm kə̂ to tɔkə bbe kə̂ maji tɔyn kə̂ in darâ rɔ Lubba tə̂ aw ddisi le.

¹¹ Ndoko lə Lubba dda arə Jerujalɛm le ndɔnrɛn. Ndɔnrɛn laa le tokə ndɔnrɛn lə kɔr ər kə̂ gatɛ̂ ngəng kə lə kɔr ər kə̂ ria nan jaspə kə̂ arɛ yərərə.

¹² Ndoko kə̂ dila n̂-guku nɛ̂n dɔ tɔkə bbe le ndəər ddəm ndəw ddəm. Ta-ndoko le ee dɔku gire joo. Anjəje dɔku gire joo arje ta-ndokoje tə̂ le kâra kâra. N̂-dda rije ta-ndokoje tə̂ le. To ri gəl ngann Ijarayɛlje kə̂ dɔku gire joo.

¹³ Ta-ndokoje lə mota toje ər kəm kar tə̂, mota toje ər kandə tə̂ lə kar, mota ər dagoo, mota ər bəər.

¹⁴ Dɔsu ndoko le dɔ ərje tə̂ dɔku gire joo kə̂ dungu nɛ̂n gɔlɛ̂ ngaâ n̂-dda ri njê-kaw-kulaje kə̂ dɔku gire joo kə̂ toje to lə Ngonn batə le kar ərje tə̂ kə̂ dɔku gire joo le kâra kâra.

¹⁵ Anjə kə̂ aw pa səm tar le uwa marə nɛ̂n kə̂ daw dɔju nɛ̂n nɛ̂n jia tə̂. Nɛ̂n le to tokə lə karə waa. N̂-dda kə andə-narɛ. Nuwa nɛ̂n le ta kɔju nɛ̂n tɔkə bbe le, ta-ndokoje le kə ndoko le.

¹⁶ Mbo-kar bbe le ee sɔ. Ngal laa kə tatə laa asə naan. Anjə le ɔju bbe le kə karə kə̂ jia tə̂ le, a ngal laa, tatə laa kə ndəw laa asə metere kɔr joo (200) gɔl doro dɔku gire joo (12 000).

¹⁷ Nɔju ndoko kə gusu kə̂ dəwje aw ɔjuje nɛ̂n nɛ̂n a, ngal asə gɔju metere kɔr kâra kə dɔsɔ gire sɔ (144).

¹⁸ Dɔsu ndoko le kə ər kə̂ maji kə̂ ria nan jaspə, a n̂-dda tɔkə bbe le kə andə kə̂ yərəw ɔru ang kə̂ kəmɛ̂ arɛ yərərə.

¹⁹ N̂-dda kar ər kə̂ dɔsu nɛ̂n gɔl ndoko le kə ərje dang dang kə̂ gatɛ̂ ngəng darə kura. N̂-dda kar dɔngɔr ər le kə ər kə̂ ria nan jaspə, n̂-dda joo laa kə sapir, mota laa kə kalseduwann, sɔ laa kə emerodə,

²⁰ min laa kə sardonikis, misan laa kə sarduwann, siri laa kə krijolitə, jijoo laa kə beril, jikara laa kə̂ topajə, dɔku laa kə krijoparajə, dɔku gire kâra laa kə yasɛntə, dɔku gire joo laa kə ametistə.

²¹ Ta-ndokoje kə̂ dɔku gire joo le toje to mərəje dɔku gire joo. Ta-doko kâra a, n̂-dda kə mərə kâra baa. N̂-dda natə tɔkə bbe le kə andə kə̂ maji kə̂ kəmɛ̂ arɛ yərərə.

²² A moo kəy-polo Lubba mə tɔkə bbe tə̂ le ang. Mba Əbbə-dəwje Lubba kə̂ Nje-singa-mɔngu njaa, de kə Ngonn batə â n̂-toje to kəy-polo Lubba kə̂ mə tɔkə bbe tə̂ le.

²³ Bbe le aw ndiki karə kar ɔsu wase karə nɛyn nda bba karə məɛ̂ ndoko ang. Mba ndoko lə Lubba â aw dda arə məɛ̂ aw ndoko ngaâ Ngonn batə le â to lambe kə̂ mə tɔkə bbe tə̂ le.

²⁴ Gəl-dəwje a njaje lo-karɛ tə̂ lə tɔkə bbe le ngaâ tɔkə mbayje kə̂ dɔ nangə tə̂ a ddeeje kə nɛ̂n-pitije ləde məɛ tə̂.

²⁵ Ta-ndokoje le a kutuje ndɔ kâra ang, mba lo tə̂ənn til a goto ngaa.

²⁶ Dəwje a ddeeje kə nɛ̂n-pitije kə nɛ̂n-kingaje lə gəl-dəwje mə bbe tə̂ le.

²⁷ Nɛ̂n-yərəw kâra a kandə mə bbe tə̂ le ang nyɔm. Dəw kə̂ nje-dda nɛ̂n kə̂ asə koo kə kəm ang wase nje-ngəm a kandə mə bbe tə̂ le ang tɔ. Njê kə̂ n̂-dda ride makəturu təbbə tə̂ lə Ngonn batə njaa kə karəde baa â a kandəje mə bbe tə̂ le.