Apokalisi 20 - Dɔnɔn kə̂ Siki: Tar kə̂ aw arə təbbə

Tar bbal kə̂ doro kâra (1 000)

¹ Goe tə̂ a, moo marə anjə in darâ aw ddisi. Nuwa ngaw kele ta tɔkə buwa kə̂ sunrɛ̂ goto le kə kula njamji kə̂ ɔɔy jia tə̂.

² Nuwa da kə̂ unn da-rɔ mar, kə̂ to li kə̂ ləw, kə̂ to əsu, kə̂ to Satan le ngaâ n̂-tɔɛ̂ kə kula njamji mba bbal doro kâra (1 000)

³ Nilɛ̂ tɔkə buwa tə̂ kə̂ sunrɛ̂ goto le ngaâ nutu tɛɛ̂, n̂-lətə ta buwa le dɔɛ̂ tə̂ mba karə nərə gəl-dəwje ang ngaa ndərəng mba bbal doro kâra le. Goe tə̂ a, dâ tute mba marə kar ngaji.

⁴ Goe tə̂ a, moo ngende-mbayje. Darə singa dəwje kə̂ isije dɔɛ̂ tə̂ karə n̂-gangəje sariya. Moo ndil dəwje kə̂ n̂-tɔlde mba tar-naji lə Jeju kə̂ n̂-paje ddəm mba tar lə Lubba ddəm. Moo ndil dede kə̂ n̂-mbətəje ta kɔsu məkəjə-gɔlde nɔn da tə̂ le ddəm nɔn ətaar tə̂ kə̂ ndaji da tə̂ le ddəm dɔsu əndaji əngo-nɔnde tə̂ ang ddəm mə jide tə̂ ang ddəm le tɔ. N̂-ndolje ngaâ dɔnje mbay kə Kristə asə bbal doro kâra (1 000).

⁵ Kəsə dəwje kə̂ oyje ndolje ang ndərəng bbal doro kâra le asə. Yeenn to dɔngɔr ndol lə dəwje kə̂ oyje.

⁶ Maji arəde, de dəwje kə̂ dɔngɔr ndol lə dəwje kə̂ oyje, deeje horode tə̂. N̂-toje to dəwje lə Lubba njaa! Yo kə̂ gɔl joo laa ee kə singa dɔde tə̂ ang. Dâ toje to njê-poloje lə Lubba ddəm lə Kristə ddəm ngaâ dâ kɔnje saa mbay bbal doro kâra le.

Koso lə Əsu

⁷ Bbo bbal doro kâra le tunga a, dâ kɔru Satan kəy-kula tə̂,

⁸ ngaâ nâ kaw kərə gəl-dəwje kɔyn nangə tə̂ kə̂ sɔ tɔyn, yeenn pa nan Gogə kə Magogə. Nâ mbɔn dəwje le mba dda nɛ̂n ddɔ. Kɔrde banya tokə ənangara ta ba-katə.

⁹ N̂-taaje dɔ nangə tɔyn ngaâ n̂-gukuje dɔ gɔng lə dəwje Lubba ddəm tɔkə bbe kə̂ Lubba ndiki nya ddəm. A puru in darâ ddisi ngaâ ɔnde.

¹⁰ Ngaâ dila Əsu kə̂ nje-kərəde le mə ndakə puru kə supərə tə̂, lo tə̂ kə̂ da le kə nje-kila mbər tar kə̂ tɔkɔrɔ ang le eeje tə̂. Dâ kooje ndoo nya, kar kə til, bbal kə bbal.

Dɔbɔyn Sariya

¹¹ Goe tə̂ a, moo tɔkə ngende-mbay kə̂ nda kə dəw kə̂ isi dɔɛ tə̂. Nangə kə dara ɔtuje aynje nɔɛ̂n tə̂ kə ddang arə dəw təl oode ang ngaa.

¹² Ngaâ moo dəwje kə̂ oyje, njê kə̂ ngaji kə njê kə̂ bo, darje taar nɔn ngende-mbay tə̂ le. N̂-təəyn makəturuje, a n̂-təl n̂-təəyn marə makəturu bbay, to makəturu təbbə. Ngaâ n̂-gangə sariya dɔ dəwje tə̂ kə̂ oyje asə kəm kula-ddade, tokə ye kə̂ n̂-dda makəturuje tə̂ le.

¹³ Ba-katə tee kə niinn dəwje kə̂ nayn məɛ̂ tə̂. Ngaâ yo kə lo lə dəwje kə̂ oyje teeje kə̂ niinn dəwje kə̂ toje məɛ̂ tə̂ arə n̂-gangə sariya dɔde tə̂ kâra kâra asə kəm kula-ddade.

¹⁴ Goe tə̂ a, dungu yo kə lo lə dəwje kə̂ oyje le mə ndakə puru tə̂. Ndakə puru le to yo kə̂ gɔl joo laa.

¹⁵ Dəw kə̂ dinga ria makəturu təbbə tə̂ le ang a, dilɛ̂ ndakə puru tə̂ le.