Apokalisi 2 - Dɔnɔn kə̂ Siki: Tar kə̂ aw arə təbbə

Makəturu kə̂ dula nɛ̂n darə Egilisi kə̂ Epɛjə

¹ «Ə-dda makəturu ula nɛ̂n arə anjə kə̂ Egilisi tə̂ kə̂ Epɛjə ə-pa nan: «Tar kə̂ dəw kə̂ uwa əndɛtɛrɛndɛnje siri jia tə̂ kə̂ kɔl ngaâ aw nja horo nɛ̂n-kunda lambeje tə̂ siri kə̂ n̂-dda kə andə-narɛ pa â nəənn:

² M-gərə kula-ddai, ndoo kə̂ aw oo kə wuri kə̂ aw tɔ. M-gərə to â kasə ta tɔ wuri dɔ njê-mə-majangje tə̂ ang. Dəwje kə̂ aw ddaje rɔde to njê-kaw-kulaje le, ə-nande oo, a n̂-toje to njê-kaw-kulaje ang ngaâ ə-tee kə gəl ngəm ləde kə ddaka.

³ «Ə-tɔ wuri nya ngaâ oo ndoo mba rim, a rɔi nyai ddəwe tə̂ ang.

⁴ «A nɛ̂n kə̂ m-mbətə səi â nəənn: Ə-ndikim tokə ye kə̂ kete ang.

⁵ Maji karə ole məi dɔ pa-nja tə̂ ləi kə̂ dɔngɔr. Ə-turu məi bbo ə-təl kula-ddai tə̂ kə̂ dɔngɔr le. Bbo baann ang a, mâ ddee rɔi tə̂, ta mâ kɔru nɛ̂n-kunda lambe ləi lo-toe tə̂ kə ddang.

⁶ A nɛ̂n kə̂ maji kə̂ ə-dda â nəənn: Ə-mbətə kula-ddaje lə dəwje kə̂ unnje go Nikola tokə əman tɔ.

⁷ «Dəw kə̂ mbia to a, maji karə oo tar kə̂ Ndil-mə-nda pa arə Egilisije. «Dəw kə̂ tətə ddɔ a, mâ karɛ̂ kandə kakə kə̂ aw arə dəw təbbə karə nusa. Kakə le to mə paradis tə̂ lə Lubba.»

Makəturu kə̂ dula nɛ̂n darə Egilisi kə̂ Ismirnə

⁸ «Ə-dda makəturu ula nɛ̂n arə anjə kə̂ Egilisi tə̂ kə̂ Ismirnə: «Tar kə̂ dəw kə̂ to dɔngɔr dəw ddəm dɔbɔyn dəw ddəm nɛ̂n kə̂ noy ngaâ n̂-təl nisi kəm baa n̂-pa â nəənn:

⁹ M-gərə nɛ̂n-singaje kə̂ aw ingai kə ndoo kə̂ ə-ndoo. A kə̂ tɔkɔrɔ tə̂, ə-to nje-nɛ̂n-kinga. M-gərə tarje kə̂ maji ang kə̂ dəwje kə̂ toje to Jiipije ang, a aw ddaje rɔde to Jiipije aw paje dɔi tə̂. N̂-toje to dəwje kə̂ mə mbɔn-naan tə̂ lə Satan.

¹⁰ Â koo ndoo, a arə bbəəle ddai ang. Əsu a kila marə dəwje ləse kəy-kula tə̂ mba nan nɛ̂n se. Dâ dda singa kə se ndɔ dɔku. Maji karə uwa arə ngəng ndərəng oy nɛ̂n a, mâ kari təbbə kə̂ to kə ndɔ kə ndɔ to əjɔkudɔ.

¹¹ «Dəw kə̂ mbia to a, maji karə oo tar kə̂ Ndil-mə-nda pa arə Egilisije. Dəw kə̂ tətə ddɔ a, a koy yo kə̂ gɔl joo laa ang ngaa.»

Makəturu kə̂ dula nɛ̂n darə Egilisi kə̂ Pɛrgam

¹² «Ə-dda makəturu ula nɛ̂n arə anjə kə̂ Egilisi tə̂ kə̂ Pɛrgam ə-pa nan: «Tar kə̂ dəw kə̂ uwa tɔkə kiya kə̂ tɛɛ̂ joo ngaâ atə pa â nəənn:

¹³ M-gərə lo kə̂ ə-dda bbe tə̂ kə majɛ̂: Ngende-mbay lə Satan to tə̂ənn. A dɔ ndɔ tə̂ kə̂ n̂-tɔl nɛ̂n Antipas kə̂ to nje-tar-naji ləm kə̂ gatə gatə bbeê ləse kə̂ Satan dda bbe tə̂ le njaa kara ə-nayn gom tə̂ nyɔm bbo ə-tusu məi kə̂ unn arəm le inya ang.

¹⁴ A marə nɛ̂nje kə̂ m-mbətə səi â nəənn: Marə dəwje kə̂ unnje go nɛ̂n-tɔju lə Balaam eeje rɔi tə̂ənn. Ləw, Balaam le tula Balak karə nərə ngann Ijarayɛlje narə usaje da kə̂ n̂-polo nɛ̂n kɔrje ngaâ karə n̂-ddaje nɛ̂n-kayaje.

¹⁵ Ddəw kâra baa, dəwje kə̂ unnje go nɛ̂n-tɔju lə Nikola eeje rɔi tə̂ənn tɔ.

¹⁶ Yeenn a, to tar ləi ta turu məi. Baann ang a, mâ ddee rɔi tə̂ njangə baa mba ddɔ kə dəwjeenn le kə tɔkə kiya kə̂ tee tam tə̂ nəənn.

¹⁷ «Dəw kə̂ mbia to a, maji karə oo tar kə̂ Ndil-mə-nda pa arə Egilisije. «Dəw kə̂ tətə ddɔ a, mâ karɛ̂ mann kə̂ to lo-kiyɛ̂ tə̂ ngaâ mâ karɛ̂ ər-nda kə̂ n̂-dda marə ri kə̂ siki dɔɛ̂ tə̂. To ri kə̂ dəw kâra gərə ang. Dəw kə̂ dunda ri le dɔɛ̂ tə̂ bba a gərə ri le.»

Makəturu kə̂ dula nɛ̂n darə Egilisi kə̂ Tiyatir

¹⁸ «Ə-dda makəturu ula nɛ̂n arə anjə kə̂ Egilisi tə̂ kə̂ Tiyatir: «Tar kə̂ Ngonn lə Lubba, ne kə̂ kəmɛ̂ aw ndoko tokə lə puru ngaâ gɔlɛ̂ ndɔnrɛn tokə lə andə-narɛ pa â nəənn:

¹⁹ M-gərə kula-ddai, ndiki ləi, mə-kunn ləi, maji kə̂ aw dda kə dəwje kə wuri kə̂ aw tɔ. Kulaje kə̂ aw dda guku nəənn uta yeje kə̂ kete.

²⁰ A nɛ̂n kə̂ m-mbətə səi â to kinya kə̂ inya Jejabɛl kə̂ dda rɔɛ̂ to nje-kila mbər tar lə Lubba arə tɔju ddəw kə̂ maji ang njê-kulaje ləm. Nərəde narə n̂-ddaje kaya ngaâ dusaje da kə̂ n̂-polo nɛ̂n kɔrje.

²¹ Minya marə kar marɛ̂ karə n̂-turu məɛ̂. A n̂-ndiki ta kinya ddəw kaya laa le ang.

²² Mba yeenn bba, mâ kunnɛ̂ kilɛ̂ tuwa rɔ-to tə̂ karə noo ndoo nya, ne de kə njê kə̂ aw ddaje lo-to-majang saa. Bbo dinyaje nɛ̂n-ddaje ləde le ang a, nɛ̂ɛnn le a kingade.

²³ Mâ tɔl ngannɛ̂. Yeenn bba Egilisije tɔyn a gərəje to m-to dəw kə̂ aw gərə kəjəje lə dəwje ddəm bbo nɛ̂nje kə̂ to mə dəwje tə̂ ddəm. Mâ dda nɛ̂n kə se kâra kâra tɔyn asə kəm kula-ddase.

²⁴ «A see kəsə dəwje kə̂ Tiyatir, sese kə̂ ə-mbətəje ta kunn go nɛ̂n-tɔju kə̂ maji ang le ngaâ ə-mbətəje ta ndo nɛ̂n kə̂ dəwje le aw bbarje nan ‹nɛ̂nje lə Satan kə̂ iyaje rɔde› le, mâ kunda marə nɛ̂n-koto dɔse tə̂ ang.

²⁵ A maji karə uwaje arə ngəng ndərəng ndɔ kə̂ mâ ddee nɛ̂n.

²⁶ Dəw kə̂ tətə ddɔ ngaâ dda kulaje ləm ndərəng ɔsu kɔnyɛ̂ a, mâ karə nɔn dɔ gəl-dəwje.

²⁷ Nâ kɔn dɔde ngəng nya ngaâ nâ gurude tokə lə dəw aw guru jo kə̂ dubba kə anji.

²⁸ Mâ karɛ̂ singa tokə bɔmje arəm le ngaâ mâ karɛ̂ əndɛtɛrɛndɛn kə̂ ta lo-karɛ tə̂.

²⁹ «Dəw kə̂ mbia to a, maji karə oo tar kə̂ Ndil-mə-nda pa arə Egilisije.»