Apokalisi 19 - Dɔnɔn kə̂ Siki: Tar kə̂ aw arə təbbə

Pa sɔn bbar mə dara tə̂

¹ Goe tə̂ a, moo marə ndu bbar bo tokə ndu dəwje kə̂ banya mə dara tə̂ nan: «Aleluya! Kaji, piti kə singa-mɔngu toje to lə Lubba ləje.

² Mba sariyaje laa kə̂ naw gangə toje kə̂ dɔgɔlɛ̂ ddəm toje gatə gatə ddəm. N̂-gangə sariya dɔ tɔkə dɛnɛ̂n nje-kaya tə̂ kə̂ tuju dɔ nangə kə kaya laa ngaâ nila barə məsə njê-kulaje laa kə̂ n̂-tɔlde le dɔɛ̂ tə̂.»

³ Ngaa n̂-təl n̂-paje bbay nan: «Aleluya! Sa-puru kə̂ ɔn tɔkə bbe le aw tu kə ndɔ kə ndɔ.»

⁴ Tɔkəje kə̂ dɔjoo gire sɔ le kə nɛ̂nje kə̂ toje kəm baa kə̂ sɔ le ɔsuje məkəjə-gɔlde nangə̂ ngaâ poloje Lubba kə̂ isi ngende-mbay tə̂ laa. N̂-paje nan: «Amɛnn! Aleluya!»

⁵ Ngaâ, marə ndu bbar ngende-mbay tə̂ le nan: «Ɔsuje gaji Lubba ləje, see njê-kulaje laa tɔyn, see njê kə̂ ngaji kə see njê kə̂ bo kə̂ aw bbəəleje!»

⁶ Moo marə ndu tokə ndu dəwje kə̂ banya ddəm tokə kɔru tɔkə maann ddəm tokə kɔru ndi kə̂ ndangə kə singa ddəm. Ndu le pa nan: «Aleluya! Mba Əbbə-dəwje Lubba, Nje-singa-mɔngu aw ɔn bbe ngaa.

⁷ N-ddaje rɔ-nəəl, jarəje rɔje nəəlje, n-piteje, mba kar kusu taa-naan lə Ngonn batə le asə ngaa, dɛnɛ̂n laa le gɔl rɔɛ̂ mban.

⁸ Darə nula kubbu lɛɛn kə̂ ndɔnrɛn kə̂ nɛ̂n-yərəw ɔru ang.» Mba kubbu lɛɛn le to kula-ddaje kə̂ gatə gatə kə̂ dəwje lə Lubba ddaje.

⁹ Anjə le pa arəm nan: «Uja tar nəənn makəturu tə̂: ‹Maji arə dəwje kə̂ n̂-bbarde kusu taa-naan tə̂ lə Ngonn batə!› » Goe tə̂ a, n̂-pa narəm nan: «To tarje lə Lubba njaa.»

¹⁰ M-tee moso kɔ gɔlɛ̂ tə̂ ta pole, a n̂-pa narəm nan: «Ə-dda nɛ̂ɛnn ang! M-to nje-kula mari ddəm nje-kula mar ngakɔinje kə̂ aw ngəmje tar-najije lə Jeju ddəm. Lubba â maji karə ə-pole!» Tar-najije lə Jeju toje to tarje kə̂ ddeeje dɔ njê-kilaje mbər tarje tə̂ lə Lubba bba aw paje.

Dəw kə̂ aal sunda kə̂ nda

¹¹ Goe tə̂ a, moo dara təəyn, a moo sunda kə̂ nda. Dəw kə̂ aal sunda le ria nan: «Dəw kə̂ aw dda nɛ̂n kə dɔgɔlɛ̂, Dəw kə̂ tɔkɔrɔ.» Naw gangə sariya ngaâ naw dda ddɔ ddəw nɛ̂n tə̂ kə̂ gatə gatə.

¹² Kəmɛ̂ to tokə puru kə̂ aw ɔn. Əjɔkudɔ tokə banya toje dɔɛ̂ tə̂. N̂-dda marə ri rɔɛ̂ tə̂, a ne kə̂ karɛ̂ baa njaa n̂-gərə ri le.

¹³ Ngaâ nula kubbu kə̂ ngal kə̂ to məsə tɔyn. Ria nan «Tar lə Lubba.»

¹⁴ Njê-ddɔje kə̂ darâ isije dɔ sundaje tə̂ kə̂ nda ngaâ aw ɔruje goe. Dulaje kubbu lɛɛn kə̂ kura, kə̂ nda kə̂ nɛ̂n-yərəw ɔru ang.

¹⁵ Marə tɔkə kiya kə̂ atə in ta dəw tə̂ kə̂ aal sunda le tee ta tuka nɛ̂n gəl-dəwje. Nâ kɔn dɔde karə ngəng nya. Nâ tɔju wungu lə Lubba kə̂ to nje-singa-mɔngu, wungu laa kə̂ aw ɔn puru, ddəw mbɔyn tə̂ kə̂ nâ mbɔynde kə gɔlɛ̂ tokə lə kandə binyə mə nɛ̂n-kore-maann binyə tə̂.

¹⁶ N̂-dda marə ri kubbu tə̂ laa kə̂ ngal le ddəm binge tə̂ ddəm nan: «Mbay-dɔ-mbayje kə Əbbə-əbbə-dəwjeje.»

¹⁷ Goe tə̂ a, moo marə anjə ar taar mə kar tə̂. Nuru əkii kə singa narə əəlje tɔyn kə̂ aw ilaje mə dara tə̂ nan: «Ə-ddeeje ə-mbɔnje naan mba tɔkə kusu lə Lubba,

¹⁸ mba kɔn taal tɔkə mbayje, taal mbayje lə mbambaje kə taal njê-singa-mɔnguje. Taal sundaje kə taal njê kə̂ aalje sundaje le, taal dəwje tɔyn, bbərəje kə bbərəje ang, taal dəwje kə̂ ngaji kə dəwje kə̂ bo.»

¹⁹ Goe tə̂ a, moo da le kə tɔkə mbayje kə̂ dɔ nangə tə̂ kə mbambaje ləde. N̂-mbɔnje naan ta ddɔ kə dəw kə̂ isi dɔ sunda tə̂ le, ne kə mbambaje laa.

²⁰ Duwa da le kə nje-kila mbər tar kə̂ tɔkɔrɔ ang le. Ne kə̂ dda nɛ̂n-mɔrije nɔɛ̂n tə̂ bba nərə nɛ̂n njê kə̂ əndaji da laa to əngo-nɔnde tə̂ ngaâ aw poloje ətaar laa le. Dungude joo kəm, kəm baa ndakə puru supərə tə̂ kə̂ aw ɔn.

²¹ N̂-tɔl kəseje kə tɔkə kiya kə̂ in ta dəw tə̂ kə̂ isi dɔ sunda tə̂ tee le ngaâ əəlje tɔyn ɔnje taalde arə məde ndann.