Apokalisi 17 - Dɔnɔn kə̂ Siki: Tar kə̂ aw arə təbbə

Sariya kə̂ dɔ Babilɔnn tə̂

¹ Goe tə̂ a, marə anjə kâra horo anjəje tə̂ kə̂ siri kə̂ uwaje əngoje siri jide tə̂ le ddee ngaâ pa arəm nan: «Ə-ddee, mâ tɔji sariya kə̂ dâ gangə dɔ dɛnɛ̂n tə̂ kə̂ to tɔkə nje-kaya kə̂ isi mbɔr tɔkə baje tə̂ le.

² Ne â tɔkə mbayje kə̂ dɔ nangə tə̂ ddaje nɛ̂n-kaya dɔɛ̂ tə̂ ngaâ dəwje kə̂ dɔ nangə tə̂ ayje bɛn kaya laa arə ddade.»

³ Goe tə̂ a, Ndil uwam ngaâ anjə le unnum aw səm mə kɔr tə̂, a moo marə dɛnɛ̂n isi dɔ marə da tə̂ kə̂ kasɛ. Rɔɛ̂ tɔyn to ri nɛ̂n-tajije kə̂ ta taji nɛ̂n Lubba dɔrɔ. Dɔɛ̂ ee siri a gajɛ̂ dɔku.

⁴ Dɛnɛ̂n le ula kubbu kə̂ kasɛ kə̂ kura ngaâ ndɔnrɛn. Nula nɛ̂n-mandəje kə̂ n̂-dda kə andə-narɛ kə kɔr ərje kə̂ gatɛ̂ ngəng kə mərəje. Nuwa əngo andə-narɛ jia tə̂. Nɛ̂n-yərəwje kə nɛ̂n-kayaje laa kə̂ asə koo kə kəm ang ddusuje mə əngo le.

⁵ N̂-dda marə ri əngo-nɔɛ̂n tə̂, to ri kə̂ dəw gərə kandɛ̂ ang. Ri le nan: «Babilɔnn bbe-bo, kɔn dɛnɛ̂n njê-kayaje, kɔn nɛ̂nje kə̂ dɔ nangə tə̂ kə̂ asə ta koo kə kəm ang.»

⁶ Moo dɛnɛ̂n le a, məsə dəwje lə Lubba kə məsə njê-tar-najije lə Jeju kə̂ nay le aw ddɛɛ̂ tokə lə koto. Koo kə̂ mooe a, məm unda dɔ binya nya.

⁷ Yeenn ngaâ anjə le pa arəm nan: «Məi aw unda dɔ binya mba ddi wa? Mâ pa nɛ̂n kə̂ iya rɔɛ̂ kə̂ dɔ dɛnɛ̂n tə̂ nəənn kə ye kə̂ dɔ da tə̂ kə̂ dɔɛ̂ ee siri ngaâ gajɛ̂ ee dɔku kə̂ nisi dɔɛ̂ tə̂ nəənn kari.

⁸ Da kə̂ ooe le to ləw, a n̂-to ang ngaa. Nâ kin tɔkə buwa tə̂ kə̂ sunrɛ̂ goto le tee ta kaw nayn kə kɔrɔ̂ nyɔm. Bbo dəwje kə̂ kunn-kutu duninya tə̂ nu duja ride makəturu təbbə tə̂ ang ooje da le a, məde a kunda dɔ binya. Mba n̂-to ləw, a n̂-to ang ngaa, a nâ təl kunda lo tee bbay.

⁹ «Kar tə̂ nəənn, maji karə nje-nɛ̂n-gərə ee kə kəm-karɛ tɔ bba: Dɔ da kə̂ siri le to ddingirije siri kə̂ dɛnɛ̂n le isi dɔɛ̂ tə̂, n̂-toje to tɔkə mbayje siri tɔ.

¹⁰ Njê kə̂ min osoje mban. Misan ləde aw ɔn mbay, a siri ləde nayn ddee ang bbay. Â bbo n̂-ddee a, nâ kisi mba gɔju kar baa.

¹¹ Da kə̂ to ləw bba goto ngaa le, ne njaa n̂-to tɔkə mbay kə̂ to jijoo laa le. N̂-to horo njê kə̂ siri tə̂ le tɔ. Naw ta nayn kə kɔrɔ̂ baa nyɔm.

¹² «Gaji da kə̂ dɔku kə̂ oo le to tɔkə mbayje dɔku kə̂ nayn ɔnje mbay ang bbay. A dâ kinga singa kə̂ ta kɔn nɛ̂n mbay mba gɔl kar kâra kə da le.

¹³ Dede dɔku tɔyn kəjə ləde kâra baa: Ta karə da le singa-mɔngu ləde kə singa ləde.

¹⁴ Dâ dda ddɔ kə Ngonn batə le, a Ngonn batə le a tətəde kə ddɔ, mba n̂-to Əbbə-əbbə-dəwjeje ddəm n̂-to Mbay-dɔ-mbayje ddəm. Njê kə̂ Lubba bbarde kə njê kə̂ n̂-mbərəde kə dəwje laa kə̂ eeje saa a tətəjede kə ddɔ tɔ.»

¹⁵ Goe tə̂ a, anjə le pa arəm bbay nan: «Maannje kə̂ dɛnɛ̂n nje-kaya le isi mbɔrɛ̂ tə̂ kə̂ oo le to dəwje dang dang. To dəwje kə̂ banya, njê kə̂ gəlde dang dang kə dəwje kə̂ ndɔn-tarje ləde to dang dang.

¹⁶ Gaji da kə̂ dɔku kə̂ oo le ddəm da le ddəm dâ mbətəje dɛnɛ̂n nje-kaya le, dâ taaje nɛ̂nje laa tɔyn ngaâ dâ kinyɛ̂je rɔɛ̂ baa. Dâ kusaje taal-rɔɛ̂ ngaâ dâ roeje kə puru.

¹⁷ Mba Lubba ula kəjə laa məde tə̂ karə n̂-ddaje nɛ̂n kə̂ məɛ̂ ndiki. Dâ ddaje nɛ̂n kə̂ kâra baa. Dâ kinyaje singa kɔn-mbay ləde ji da tə̂ le ndərəng ta karə tarje lə Lubba ddeeje to nɛ̂n kə̂ tɔkɔrɔ.

¹⁸ «Dɔbɔnyɛ̂, dɛnɛ̂n kə̂ ooe le to tɔkə bbe kə̂ ɔn dɔ tɔkə mbayje kə̂ dɔ nangə tə̂.»