Apokalisi 16 - Dɔnɔn kə̂ Siki: Tar kə̂ aw arə təbbə

Tar dɔ əngoje tə̂ siri

¹ Moo marə ndu bbar tokə bo kəy-polo Lubba tə̂ le ngaâ pa arə anjəje kə̂ siri le nan: «Awje aw mbəlje əngo wunguje lə Lubba kə̂ siri le dɔ nangə tə̂!»

² Anjə kə̂ to dɔngɔrɛ̂ aw mbəl wungu kə̂ mə əngo tə̂ laa dɔ nangə tə̂. Do kə̂ maji ang ddəm aw to nya ddəm oso rɔ dəwje tə̂ kə̂ əndaji lə da le to rɔde tə̂ ngaâ aw poloje ətaar kə̂ ndaji da le.

³ Anjə kə̂ to joo laa mbəl wungu kə̂ mə əngo tə̂ laa le mə ba-katə tə̂. Ba-katə le təl tokə lə məsə dəw kə̂ oy arə nɛ̂nje kə̂ kəm tɔyn kə̂ toje mə ba-katə tə̂ lə oyje.

⁴ Anjə kə̂ to mota laa mbəl wungu kə̂ mə əngo tə̂ laa mə baje tə̂ kə ddutu dɔ maannje tə̂ arə mannje le turuje to məsə.

⁵ Moo ndu anjə kə̂ ɔn dɔ maannje pa nan: «Əi kə̂ ə-to bbokənɛn ddəm ə-to ləw ddəm ə-maji tɔyn ddəm ə-to gatə gatə ɔju dɔ sariyaje kə̂ ə-gangə nəənn.

⁶ N̂-kaynje məsə dəwje ləi ddəm məsə njê-kilaje mbər tar ləi ddəm. Mba yeenn bba arəde məsə karə dayje. Nɛ̂ɛnn â asə ta dda kə de.»

⁷ Goe tə̂ a, moo marə ndu kə̂ bbar bann tə̂ le nan: «Tɔkɔrɔ njaa, Əbbə-dəwje Lubba kə̂ nje-singa-mɔngu, sariyaje ləi to sariyaje kə̂ tɔkɔrɔ ddəm gatə gatə ddəm.»

⁸ Anjə kə̂ to sɔ laa mbəl wungu kə̂ əngo tə̂ laa dɔ kar tə̂. Darə ddəw kar le karə puru laa ɔn dəwje.

⁹ Puru kar kə̂ tunga nya le ɔn dəwje le. N̂-tajije ri Lubba kə̂ ee kə singa dɔ nɛ̂n kəm-to-ndooje tə̂ nəənn tɔyn le. A n̂-turuje məde mba kɔsu gajɛ̂ ang.

¹⁰ Anjə kə̂ to min laa mbəl wungu kə̂ mə əngo tə̂ laa dɔ ngende-mbay tə̂ lə da le. Yeenn ngaâ lo tuka ndul dɔ bbe-kɔn tə̂ lə da le. Kəm-to-ndoo uta dɔ dəwje arə dəwje ngəərje ngangəde.

¹¹ N̂-tajije ri Lubba kə̂ darâ mba ndoo kə̂ daw dooje ddəm mba do kə̂ maji ang kə̂ oso rɔde tə̂ le ddəm. A n̂-tusuje kula-ddadeje kə̂ maji ang dinyaje ang.

¹² Anjə kə̂ to misan laa mbəl wungu kə̂ mə əngo tə̂ laa mə tɔkə ba tə̂ kə̂ ria nan Əparatə. Maann le ii mba kinya ddəw karə tɔkə mbayje kə̂ inje ər kəm kar tə̂ aw ddeeje.

¹³ Ngaâ, moo ndilje kə̂ maji ang mota, ndil kə̂ dɔngɔr in mə kil da tə̂ kə̂ unn da-rɔ mar le tee, ndil kə̂ to joo laa in mə kil da tə̂ kə̂ kâra le, mota laa in mə kil nje-kila mbər tar tə̂ kə̂ tɔkɔrɔ ang le daw teeje. Ndilje kə̂ maji ang kə̂ mota le undaje rɔ ənginaynje.

¹⁴ To ndilje kə̂ maji ang kə̂ aw ddaje nɛ̂n-mɔrije. Dawje ta kinga tɔkə mbayje kə̂ dɔ nangə tə̂ tɔyn ta mbɔnde nginan nɛ̂n ddɔ kə̂ tɔkə ndɔ tə̂ lə Lubba kə̂ nje-singa-mɔngu.

¹⁵ Əbbə-dəwje pa nan: «Oo, maw ddee tokə lə nje-bboko. Maji arə dəw kə̂ isi kəm baa bbo tibbi ang ngaâ ngəm kubbu rɔɛ̂ tə̂. Baann bba nâ nja rɔɛ̂ baa karə dəw ooe a to nɛ̂n-rɔ-kul ang.»

¹⁶ Ndilje kə̂ maji ang le mbɔnje mbayje le lo tə̂ kə̂ daw bbar kə tar ebərə nan Armagedɔn.

¹⁷ Anjə kə̂ to siri laa mbəl wungu kə̂ mə əngo tə̂ laa mə ləl tə̂. Marə ndu bbar kə singa ngende-mbay tə̂ kə̂ kəy-polo Lubba tə̂ le nan: «Bbayɛ̂ ngaa!»

¹⁸ Ndi təəl nya nya, marə ndu bbar nya, ndi ndangə nya nya ngaâ nangə yəkə kə singa. Ləw baa kə̂ dəwje toje dɔ nangə tə̂, ndɔ kâra nangə nayn yəkə tokə baann ang bbay.

¹⁹ Babilɔnn kə̂ to bbe-bo le kayn loe mota ngaâ tɔkə bbeje lə gəl-dəwje osoje. Yeenn ngaâ Lubba ole məɛ̂ dɔ Babilɔnn bbe-bo tə̂ le ngaâ arə bɛn kə̂ to wungu laa kə̂ aw ɔn to puru mə əngo tə̂ dəwje kə̂ mə bbe tə̂ le ayje.

²⁰ Dɔ dərə-maannje tɔyn aynje ngaâ ddingirije gotoje.

²¹ Kɔjuje kə̂ ngɔnguje nya ngaâ ɔɔyje asə nɛ̂n kə̂ kilo dɔsɔ inje darâ gaynje dɔ dəwje tə̂ ngaâ dəwje le tajije ri Lubba mba nɛ̂n ndoo kə̂ kɔju le dda kə̂ de le, mba to nɛ̂n kəm-to-ndoo kə̂ to bbəəl nya.