Apokalisi 13 - Dɔnɔn kə̂ Siki: Tar kə̂ aw arə təbbə

Tar dɔ daje tə̂ joo

¹ Goe tə̂ a, moo marə da in mə ba-katə tə̂ tee. Gajɛ̂ ee dɔku, a dɔɛ̂ ee siri. Əjɔkudɔ dɔku toje dɔ gajɛ̂je tə̂ le kâra kâra ngaâ n̂-dda rije kə̂ toje to ri taji Lubba dɔɛ̂je tə̂ le kâra kâra tɔyn.

² Da kə̂ mooe le unn da-rɔ kakə. Gɔlɛ̂ tokə gɔl ənjakəmnjar, a tɛɛ̂ tokə ta ənam. Tɔkə da kə̂ unn da-rɔ mar le arɛ̂ singa-mɔngu laa kə ngende-mbay laa kə singa kə̂ ngəng nya.

³ Marə dɔɛ̂ le kâra tokə nɛ̂n kə̂ inga do kə̂ asə karə noy nɛ̂n. A do kə̂ asə karə noy nɛ̂n le ərə. Dəwje kə̂ dɔ nangə tə̂ tɔyn ooje nɛ̂ɛnn le a, gangə singade ngaâ unnje go da le.

⁴ Dəwje tɔyn ɔsuje məkəjə-gɔlde nangə̂ nɔn da tə̂ kə̂ unn da-rɔ mar le, mba singa kə̂ narə da kə̂ in mə ba-katə tə̂ tee le. Dede tɔyn dɔsuje məkəjə-gɔlde nangə̂ nɔn da tə̂ kə̂ in mə ba-katə tə̂ tee le ngaâ n̂-paje nan: «Nân bba asə naan kə da le wa? Nân bba asə ta ddɔ saa wa?»

⁵ Darə ddəw da le karə pa tar-boroje ddəm karə taji Lubba ddəm. Darɛ̂ singa karə n̂-dda nɛ̂njeenn mba nɛyn dɔsɔ gire joo.

⁶ Nunn kutu taji Lubba, taji ria, taji lo-kisi laa, taji dəwje tɔyn kə̂ isije darâ.

⁷ Darɛ̂ ddəw karə n̂-dda ddɔ kə dəwje lə Lubba ngaâ ta tətəde kə ddɔ. Darɛ̂ singa dɔ dəwje tə̂ kə̂ gəl-kujude dang dang tɔyn, dɔ dəwje tə̂ kə̂ bbeje tə̂ tɔyn kə dɔ dəwje tə̂ kə̂ ndɔn-tarje ləde toje dang dang tɔyn kə dɔ dəwje tə̂ kə̂ gəlde dang dang tɔyn.

⁸ Dəwje tɔyn kə̂ dɔ nangə tə̂ a poloje da kə̂ in mə ba-katə tə̂ tee le. To njê kə̂ ləw baa kə̂ Lubba dda duninya, ride goto makəturu təbbə tə̂ lə Ngonn Batə kə̂ n̂-tɔlɛ̂ to nɛ̂n-polo le.

⁹ Dəw kə̂ mbia to a, maji karə oo tar nəənn!

¹⁰ Bbo dəw kə̂ to ta karə duwɛ̂ bbərə tə̂ a, dâ kuwɛ̂ bbərə tə̂. Bbo dəw kə̂ to karə n̂-tɔlɛ̂ kə tɔkə kiya a, dâ tɔlɛ̂ kə tɔkə kiya. Kar nəənn to kar kə̂ ta karə dəwje lə Lubba tɔje wurde ngaâ uwaje mə-kunn ləde arə ngəng.

Da kə̂ in mə nangə tə̂ tee

¹¹ Goe tə̂ a, moo marə da dang bbay unda lo mə nangə tə̂ tee. Gajɛ̂ ee joo tokə gaji ngonn batə. A naw pa tar tokə tɔkə da kə̂ unn da-rɔ mar le.

¹² Naw dda kula kə singa kə̂ da kə̂ in mə maann tə̂ tee ee nɛ̂n le dɔ kəmɛ̂ tə̂ njaa. N̂-dda narə nangə kə dəwje kə̂ isije dɔ nangə tə̂ aw ɔsuje məkəjə-gɔlde nɔn da tə̂ kə̂ in mə maann tə̂ tee le, ne kə̂ do laa asə karə noy nɛ̂n bba do le ərə le.

¹³ N̂-dda tɔkə nɛ̂n-mɔrije ndərəng, narə puru in darâ oso dɔ nangə tə̂ kəm dəwje tə̂.

¹⁴ Nərə dəwje kə̂ dɔ nangə tə̂ ddəw nɛ̂n-mɔrije tə̂ kə̂ darɛ̂ singa karə n̂-dda dɔ kəm da tə̂ kə̂ in mə maann tə̂ tee le, narə dəwje le ddaje marə kɔr kə̂ unn da-rɔ da kə̂ inga do tɔkə kiya, a nayn kəm baa le.

¹⁵ Darɛ̂ singa karə nula kəwn mə ətaar tə̂ kə̂ ndaji da kə̂ unn da-rɔ da kə̂ in mə maann tə̂ tee le. Ətaar kə̂ ndaji da le a pa tar ngaâ a dda karə n̂-tɔl dəwje tɔyn kə̂ a mbətəje ta kɔsu məkəjə-gɔlde nangə̂ nɔɛ̂n tə̂.

¹⁶ Da le uwa dəwje tɔyn njaa kə singa arə n̂-dda marə əndaji mə jide tə̂ kə̂ kɔl, ang a, əngo-nɔnde tə̂: Njê kə̂ bo kə njê kə̂ tɛn, njê-nɛ̂n-kingaje kə njê-ndooje, bbərəje kə bbərəje ang.

¹⁷ Dəw kə̂ əndaji le to rɔɛ̂ tə̂ ang a, a kasə ndoko nɛ̂n ang ddəm a kasə labbə nɛ̂n ang ddəm. Əndaji le to ri da le, ang a, nimɔrɔ ria.

¹⁸ Kar tə̂ nəənn, maji karə kəm dəw arɛ. Dəw kə̂ to nje-nɛ̂n-gərə a, a gərə kandə nimɔrɔ lə da le, mba to nimɔrɔ lə marə dəw. Nimɔrɔ le to kɔr misan kə dɔmisan gire misan (666).