Apokalisi 12 - Dɔnɔn kə̂ Siki: Tar kə̂ aw arə təbbə

Tar lə dɛnɛ̂n kə tar lə da kə̂ unn da-rɔ mar

¹ Marə tɔkə nɛ̂n ubba mə dara tə̂. Marə dɛnɛ̂n ula kar rɔɛ̂ tə̂ tokə kubbu, nɛyn to kɔ gɔlɛ̂ tə̂ ngaâ əndɛtɛrɛndɛnje dɔku gire joo toje dɔɛ̂ tə̂ tokə əjɔkudɔ.

² Nuwa səm ngaâ naw nduru ndo, naw nuru əkii mba ndo le aw toe nya.

³ Marə nɛ̂n dang təl ubba mə dara tə̂ bbay. Marə tɔkə da kə̂ unn da-rɔ mar, rɔɛ̂ kasɛ̂ tokə lə puru, dɔɛ̂ siri a gajɛ̂ dɔku. Əjɔkudɔje siri toje dɔɛ̂je tə̂ kə̂ siri le.

⁴ Bbo n̂-kayn horo əndɛtɛrɛndɛnje kə̂ darâ loe mota a, bbɔngu tɔkə da le saa dəbbə əndɛtɛrɛndɛnje loe kâra tilade nangə̂. Tɔkə da le ddee ar nɔn dɛnɛ̂n tə̂ kə̂ aw nduru ndo le aw nginan ta bbo nuju be njaa a, kunn ngonn kə̂ nuje le kusɛ̂ kure kə loe baa.

⁵ Dɛnɛ̂n le uju ngonn kə̂ dingaw. Ngonn le â a kɔnn gəl-dəwje tɔyn kə singa kə̂ ngəng nya. Dunn ngonn le daw saa mbɔr Lubba tə̂, mbɔr ngende-mbay tə̂ laa.

⁶ A dɛnɛ̂n le ayn aw mə kɔr tə̂, lo tə̂ kə̂ Lubba gɔl arɛ̂ karə n̂-ngəmɛ̂ kə nɛ̂n-kusa tə̂ mba ndɔ doro kâra kə kɔr joo gire dɔmisan (1 260).

⁷ Ddɔ in mə dara tə̂. Misɛl de kə anjəje laa n̂-ddɔje kə tɔkə da kə̂ unn da-rɔ mar le. Da le kə anjəje laa n̂-ddɔje kə de tɔ.

⁸ A singa da le uta lə Misɛl le ang. Yeenn bba, da le kə anjəje laa, ddəw kə̂ dâ naynje nɛ̂n darâ goto ngaa.

⁹ Dunn tɔkə da le, ne li kə̂ ləw baa kə̂ daw bbarɛ̂ nan Əsu, Satan, ne nje-kərə dəwje kə̂ dɔ nangə tə̂ tɔyn le, ne kə anjəje laa le n̂-tutade n̂-tilade dɔ nangə tə̂.

¹⁰ Moo marə ndu bbar kə singa mə dara tə̂ nan: «Bbasinɛn Lubba ajije ngaa, n̂-tɔju singa-mɔngu kə kɔn-mbay laa ngaa. Mesi laa tɔju singa laa ngaa. Mba duta ne nje-kunda tar dɔ ngakɔnje tə̂ le dilɛ̂ nangə̂ mban, ne kə̂ naw nunda tar dɔde tə̂ nɔn Lubba tə̂ til kə kar le.

¹¹ A ngakɔnje le təteje kə ddɔ ddəw məsə Ngonn Batə tə̂ kə ddəw tar tə̂ lə Lubba kə̂ n̂-paje tar-najɛ̂. Kisi ləde kəm baa nəəlde ang ngaa arə yo â n̂-ndingaje.

¹² Mba yeenn bba, see daraje kə see dəwje kə̂ isije darâ, maji karə arəje rɔse nəəlse. Nangə kə ba-katə, kəm-to-ndoo to ləse. Mba Əsu ddisi kə dɔse tə̂ kə wungu kə̂ to bbəəl nya, mba n̂-gərə to ndɔ laa nayn nya ang ngaa.»

¹³ Tɔkə da le oo kutɛ̂ kə̂ dutɛ̂ dilɛ̂ dɔ nangə tə̂ mban le a, nunn kutu tubba dɛnɛ̂n kə̂ uju ngonn kə̂ dingaw le.

¹⁴ A darə dɛnɛ̂n le ubba bakɛ̂ joo tokə lə bakə tɔkə təndə karə nin nɛ̂n naw nɛ̂n mə kɔr tə̂, lo tə̂ kə̂ n̂-gɔl mbɛɛ̂, karə darɛ̂ nɛ̂n-kusa tə̂ n̂-gəmɛ̂ nɛ̂n, ddəw əw kə li le. Nâ nayn baann lo tə̂ənn mba bbal mota kə gɛɛ̂n.

¹⁵ Yeenn ngaâ li le tɔmɔn maann tokə lə ba go dɛnɛ̂n tə̂ le karə maann le uwɛ̂ ɔtu saa.

¹⁶ A nangə ddee uman dɛnɛ̂n le. Nangə təəyn tɛɛ̂ uru nɛ̂n ba kə̂ tɔkə da le tɔmɔn le.

¹⁷ Wungu ɔn da le dɔ dɛnɛ̂n tə̂ le ngaâ təl kə dɔ kəsə dəwje tə̂ kə̂ toje to ngaka dɛnɛ̂n le aw dda ddɔ kə de. To dede kə̂ daw ngəmje nduje lə Lubba kə tar-najije lə Jeju.

¹⁸ Goe tə̂ a, tɔkə da le aw ar dɔ ənangara ba-katə tə̂.