Apokalisi 11 - Dɔnɔn kə̂ Siki: Tar kə̂ aw arə təbbə

Njê-tar-najije joo

¹ Darəm marə kabbara kə̂ to tokə kakə kɔju nɛ̂n ngaâ n̂-pa darəm nan: «In taar bbo ɔju kəy-polo Lubba kə bann kə̂ to tə̂. Ə-tura kɔr dəwje kə̂ aw poloje Lubba məɛ tə̂.

² A inya ndakə lo kə̂ ta kəy-polo tə̂ ddaka bbo ɔju ang. Mba darə ndakə lo le gəl-dəwje kə̂ toje to Jiipije ang. Dâ mbɔynje bbe kə̂ maji tɔyn le kə gɔlde nɛyn dɔsɔ gire joo.

³ Mâ karə njê-tar-najije ləm kə̂ joo ilaje mbər tar ləm kə kubbu-ndoo rɔde tə̂ ndɔ doro kâra, kɔr joo kə dɔmisan (1 260).»

⁴ Njê-tar-najije ləm kə̂ joo le toje to kakə olibəje kə̂ joo kə nɛ̂n-kunda lambeje kə̂ joo kə̂ toje nɔnʼm tə̂, əman Əbbə-dəwje kə̂ dɔ nangə tə̂ le.

⁵ Bbo dəw ndiki ta ddade maji ang a, puru tee tade tə̂ ro njê-baanje ləde le. Tɔkɔrɔ njaa, bbo dəw ndiki ta ddade maji ang a, maji karə dəw le oy tokə baann.

⁶ Deeje kə singa ta kutu kəm dara karə ndi ərə ang mə ndɔje tə̂ kə̂ daw dilaje nɛ̂n mbər tar lə Lubba. Deeje kə singa ta dda karə maannje təlje to məsə ngaâ ta dda karə nɛ̂n kəm-to-ndooje dang dang osoje dɔ nangə tə̂ tokə məde ndiki.

⁷ Bbo n̂-paje tar-naji le n̂-tungaje a, da kə̂ a kin mə tɔkə buwa tə̂ kə̂ sunrɛ̂ goto le a dda ddɔ kə de, singɛ̂ a kutade ngaâ nâ tɔlde.

⁸ Niinnde a nayn dɔ nangə tə̂ natâ mə tɔkə bbe tə̂ kə̂ n̂-tɔl Əbbədede tə̂ kakə-dəsə tə̂ le. Ddəw Ndil tə̂, dəwje undaje ri tɔkə bbe le nan Sɔdɔm ddəm Ejipitə ddəm.

⁹ Dəwje kə̂ bbeje tə̂ dang dang, dəwje kə̂ gəl-kujude dang dang, njê kə̂ ndɔn-tarje ləde to dang dang, dəwje kə̂ gəlde dang dang a ddeeje ta koo niinnde mba ndɔ mota kə gɛɛ̂n. Dâ kinya ddəw karə n̂-dubbu niinnde le ang.

¹⁰ Dəwje kə̂ dɔ nangə tə̂ a ddaje rɔ-nəəl mba koy ləde le. Dâ ddaje kusu, dâ kulaje kə nɛ̂nje baa karə naan, mba njê-kilaje mbər tar kə̂ joo nəənn le ddaje arə dəwje ooje ndoo nya.

¹¹ A go ndɔ tə̂ kə̂ mota kə gɛɛ̂n le a, marə ləl kə̂ aw arə təbbə in rɔ Lubba tə̂ ddee andə niinnde le ngaâ dinje darje taar. Yeenn bba bbəəl dda dəwje kə̂ aw oojede le nya.

¹² Njê-kilaje mbər tar lə Lubba le ooje marə ndu kə̂ in dara ngaâ pa arəde kə singa nan: «Inje kə taar nəənn!» Dinje kə darâ mə mum tə̂ kəm njê-baanje tə̂ ləde le.

¹³ Kar tə̂ənn njaa, nangə yəkə kə singa. Bbo n̂-kayn mə tɔkə bbe le dɔku a, dəbbə bbe le kâra njaa guru arə dəwje doro siri (7 000) oyje mba nangə kə̂ yəkə le. Bbəəl dda kəsə dəwje kə̂ naynje kəm baa ngaâ dɔsuje gaji Lubba kə̂ darâ.

¹⁴ Nɛ̂n kəm-to-ndoo kə̂ to joo laa le nday mban. A nɛ̂n kəm-to-ndoo kə̂ to mota laa aw ddee mbɔr ang baa.

Təbbə kə̂ to siri laa bbar

¹⁵ Goe tə̂ a, anjə kə̂ to siri laa to təbbə. Ndu bbar kə singa darâ nan: «Bbasinɛn, kɔn-mbay dɔ nangə tə̂ nəənn təl mə ji Əbbəjeje tə̂ kə mə ji Mesi tə̂ laa. Nâ kɔn-mbay kə ndɔ kə ndɔ.»

¹⁶ Tɔkəje dɔjoo gire sɔ kə̂ isije ngende-mbay tə̂ ləde nɔn Lubba tə̂ le teeje osoje nangə̂, dəbbəje kəmde nangə̂ nɔn Lubba tə̂ ngaâ walje Lubba,

¹⁷ n̂-paje nan: «Əbbəjeje Lubba kə̂ nje-singa-mɔngu, əi kə̂ ə-to bbokənɛn ddəm ə-to ləw ddəm, jari wooyo, mba ddəw tɔkə singa-mɔngu tə̂ ləi, ə-dda arə kɔn-mbay to ləi ngaa.

¹⁸ Gəl-dəwje kə̂ toje to ləi ang ddaje wungu, a bbasinɛn, kar wungu ləi asə ngaa. Kar gangə sariya dɔ dəwje tə̂ kə̂ oyje asə ngaa. To kar kə̂ â kuka nɛ̂n njê-kulaje ləi kə̂ toje to njê-kilaje mbər tar ləi, njê kə̂ toje to dəwje ləi kə njê kə̂ aw bbəəlje rii, dede kə̂ n̂-toje to dəwje kə̂ ngaji, kə dede kə̂ n̂-toje to dəwje kə̂ bo. To kar kə̂ â tuju nɛ̂n dəwje kə̂ aw tujuje nangə.»

¹⁹ Ta-kəy-polo Lubba kə̂ to mə dara tə̂ ɔru ngaâ sanduku dɔnɔn ubba mə kəy-polo tə̂ laa le. Ndi təəl, ndu dəwje bbar, ndi ndangə, nangə yəkə ngaâ kɔju gayn kə singa.