Apokalisi 10 - Dɔnɔn kə̂ Siki: Tar kə̂ aw arə təbbə

Tar ngonn makəturu

¹ Goe tə̂ a, m-təl moo marə anjə kə̂ nje-singa-mɔngu in darâ aw ddisi. Mum taa rɔɛ̂ tɔyn tokə lə kubbu ngaâ ngaburandi guku dangara dɔɛ̂. Kəmɛ̂ ndoko tokə lə kar ngaâ gɔlɛ̂ kasɛ tokə lə ndɔn-puru.

² Nuwa marə ngonn makəturu kə̂ tokə təəyn jia tə̂. Nila gɔlɛ̂ kə̂ kɔl dɔ ba-katə tə̂, a nila gɔlɛ̂ kə̂ gəl dɔ nangə tə̂.

³ Nuru əkii kə taar tokə lə ənam kə̂ aw nɔn. Goe tə̂ a, ndi ndangə tɛɛ̂ siri.

⁴ Kar tə̂ kə̂ ndi le ndangə tɛɛ̂ siri le a, m-ndiki ta kuja tar kə̂ ndije le paje le makəturu tə̂, a moo marə ndu kə̂ in darâ nan: «Ə-ngəm məi tə̂ bbo uja makəturu tə̂ ang.»

⁵ Anjə kə̂ mooe ar dɔ ba-katə tə̂ ddəm dɔ nangə tə̂ ddəm le ula jia kə̂ kɔl kə darâ,

⁶ ngaâ nunda yo kə ri Lubba kə̂ nje-kisi kə ndɔ kə ndɔ, ne kə̂ n̂-dda dara kə nɛ̂nje tɔyn kə̂ toje tə̂, nangə kə nɛ̂nje tɔyn kə̂ toje tə̂, ba-katə kə nɛ̂nje tɔyn kə̂ toje tə̂. Anjə le pa nan: «Kar asə ngaa.

⁷ Kar tə̂ kə̂ anjə kə̂ to siri laa to təbbə a, a to ndɔ kə̂ nɛ̂n lə Lubba kə̂ iya rɔɛ̂ a ddee to nɛ̂n kə̂ tɔkɔrɔ tokə Lubba pa tarɛ̂ arə bbərə-kulaje laa kə̂ toje to njê-kilaje mbər tar laa le.»

⁸ Ndu kə̂ bbar darâ kə̂ moo le təl pa tar arəm bbay nan: «Aw taa ngonn makəturu kə̂ tokə təəyn kə̂ to ji anjə tə̂ kə̂ ar dɔ ba-katə tə̂ ddəm dɔ nangə tə̂ ddəm le.»

⁹ Maw kə rɔ anjə tə̂ le ngɔsi ngaâ m-duje karə narəm ngonn makəturu le. Nilam tə̂ nan: «Ə-taa usa. A katə kang kang məi tə̂. A a nəəl tai tə̂ tokə lə ubbu təjə.»

¹⁰ M-taa ngonn makəturu le ji anjə tə̂ le ngaâ musa a, nəəl tam tə̂ tokə ubbu təjə. A kakə muru a, atə məm tə̂ nu kang kang.

¹¹ Ngaa n̂-pa darəm nan: «Maji karə ə-təl ila mbər tar kə̂ Lubba pa dɔ dəwje tə̂ kə̂ banya bbay: Dəwje kə̂ bbeje tə̂, dəwje kə̂ gəlde dang dang, njê kə̂ ndɔn-tarje ləde to dang dang kə tɔkə mbayje.»