Apokalisi 1 - Dɔnɔn kə̂ Siki: Tar kə̂ aw arə təbbə

Kunn-kutu tar

¹ Makəturu nəənn pa tar dɔ nɛ̂nje tə̂ kə̂ Lubba arə Jeju-Kristə tɔju Jan, karə n̂-tɔju njê-kulaje laa karə n̂-gərəje nɛ̂n kə̂ nayn ngɔsi baa ta ddee. Kristə ula anjə laa arə nje-kula laa Jan karə tɔjɛ̂ nɛ̂njeenn le karə n̂-gərə.

² Jan pa tar-naji nɛ̂nje tɔyn kə̂ noo le. N̂-pa nan, nɛ̂n kə̂ noo le to tar lə Lubba njaa â Jeju-Kristə tee nɛ̂n kə ddaka.

³ Maji arə dəw kə̂ tura makəturu nəənn. Maji arəde, de dəwje kə̂ dooje tarje kə̂ Lubba tee nɛ̂n kə ddaka nəənn ngaâ n̂-ngəmje tarje kə̂ n̂-dda makəturu tə̂ le. Mba kar kə̂ nɛ̂njeenn le a teeje nɛ̂n le nayn ngɔsi.

Jan ula kə lapiya arə Egilisije siri kə̂ Aji

⁴ Əman Jan, mula kə makəturu nəənn marə dəwje kə̂ Egilisije tə̂ siri kə̂ nangə tə̂ kə̂ Aji. Maji karə Lubba kə̂ to bbokənɛn nəənn, kə̂ to ləw, kə̂ aw ddee dda kə se mə-maji ngaâ narə məse wul lɔm. Maji karə ndilje kə̂ siri kə̂ arje nɔn ngende-mbay tə̂ laa ddaje kə se tokə baann.

⁵ Maji karə Jeju-Kristə kə̂ to nje-tar-naji kə̂ gatə gatə, ne kə̂ n̂-to dɔngɔr dəw kə̂ ndol horo dəwje tə̂ kə̂ oyje ddəm n̂-to Mbay-dɔ-mbayje kə̂ nangə̂ nəənn ddəm n̂-dda kə se mə-maji ngaâ narə məse wul lɔm tɔ. Jeju-Kristə le ndikije ngaâ ɔruje mə majangje tə̂ ləje ddəw məse tə̂.

⁶ N̂-ddaje to dəwje kə̂ mə Bbe-kɔn tə̂ laa ddəm njê-poloje Bɔɛ̂je Lubba ddəm. Maji karə piti kə singa-mɔngu toje to laa, ndɔ kə ndɔ. Amɛnn.

⁷ Ooje, naw ddee mə mum tə̂! Dəwje tɔyn a kooeje. Njê kə̂ ɔsɛ̂je kə ninga njaa kara a kooeje tɔ. Gəl-dəwje tɔyn a nɔnje mbɛɛ̂. A to tokə baann njaa! Amɛnn.

⁸ Əbbə-dəwje Lubba pa nan: «M-to Alpa ddəm Omega ddəm. M-to ne kə̂ n̂-to bbokənɛn, ne kə̂ n̂-to ləw kə ne kə̂ naw ddee. M-to nje-singa-mɔngu.»

Jan oo Kristə mə piti tə̂ laa

⁹ Əman ngokɔnse Jan, moo ndoo kə se kâra baa. Əman kə sese tɔyn n-ddeeje to dəwje kə̂ mə Bbe-kɔn tə̂ lə Jeju ngaâ jaw juwaje jarə ngəng ddəw tə̂ laa. Duwam dulam dɔ dərə-ba tə̂ kə̂ ria nan Patəmos mba tar lə Lubba kə̂ mila mbəre ddəm mba tar-naji lə Jeju kə̂ maw pa ddəm.

¹⁰ Kə ndɔ lə Əbbə-dəwje, Ndil-mə-nda uwam a, moo marə ndu bbar kə singa gom tə̂ guku. Ndu le bbar tokə lə təbbə kə̂ dəw aw to.

¹¹ Ndu le pa nan: «Nɛ̂n kə̂ aw oo nəənn, ə-dda makəturu tə̂ ta ula nɛ̂n arə Egilisije kə̂ siri nəənn: Ula nɛ̂n arə Egilisi kə̂ Epɛjə, Ismirnə, Pɛrgam, Tiyatir, Sardə, Piladɛlpi kə Lawodise.»

¹² M-turu rɔm ta koo dəw kə̂ aw pa səm tar le a, moo nɛ̂n-kunda lambeje siri kə̂ n̂-dda kə andə-narɛ kə̂ lambeje to dɔɛ tə̂.

¹³ Horo nɛ̂n-kunda lambeje tə̂ le, moo marə nɛ̂n kə̂ unn da-rɔ dəw. Nula kubbu kə̂ ngal ngaâ n̂-tɔ karɛ̂ kə nɛ̂n-kuwa-bbər kə̂ n̂-dda kə andə-narɛ.

¹⁴ Biin-dɔɛ̂ nda bal bal tokə lə bin, ang a, tokə lə əəl kə̂ ria nan əkəəw. Kandə kəmɛ̂ to tokə lə puru kə̂ aw ɔn.

¹⁵ Gɔlɛ̂ tokə lə njamnji kə̂ dula purô darə ndɔnrɛn ngaâ ndue bbar tokə lə kɔru tɔkə ba kə̂ aw ula.

¹⁶ Nuwa əndɛtɛrɛndɛnje siri jia tə̂ kə̂ kɔl. Tɔkə kiya kə̂ tɛɛ̂ joo kəm atə tee tɛɛ̂ tə̂ ngaâ kəmɛ̂ ndoko tokə lə kar kə̂ ɔsu kə singa nya.

¹⁷ Mooe a, m-tee moso kɔ gɔlɛ̂ tə̂ tokə dəw kə̂ oy. A nila jia kə̂ kɔl dɔm tə̂ ngaâ n̂-pa nan: «Ə-bbəəl ang, m-to dɔngɔr dəw ddəm dɔbɔyn dəw ddəm.

¹⁸ M-to nje-kisi kəm baa. Ləw moy, a bbasinɛn misi kəm baa kə ndɔ kə ndɔ. Mee kə singa dɔ yo tə̂ ddəm dɔ lo tə̂ lə dəwje kə̂ oyje ddəm.

¹⁹ Nɛ̂n kə̂ aw oo nəənn, nɛ̂n kə̂ aw to nəənn kə nɛ̂n kə̂ a ddee goe tə̂, maji karə ə-dda makəturu tə̂.

²⁰ Nɛ̂n kə̂ iya rɔɛ̂ ɔju dɔ əndɛtɛrɛndɛnje siri kə̂ oo jim tə̂ kə̂ kɔl kə nɛ̂n-kunda lambeje siri kə̂ n̂-dda kə andə-narɛ le gəle tokə be: Əndɛtɛrɛndɛnje kə̂ siri le tɔju anjəje kə̂ Egilisije tə̂ kə̂ siri le, a nɛ̂n-kunda lambeje kə̂ siri le toje to Egilisije kə̂ siri le tɔ.»