3 Jan 1 - Dɔnɔn kə̂ Siki: Tar kə̂ aw arə təbbə

Tar lapiya

¹ Əman tɔkə le, m-dda makəturu nəənn mari əi Gayus kə̂ m-ndikii kə ndiki kə̂ tɔkɔrɔ.

² Ngokɔnʼm kə̂ m-ndikii nya, m-duju Lubba karə nɛ̂nje tɔyn njaa maji to maji ari. M-duju tɔ karə rɔi kara to kə majɛ̂ tokə lə kəwn ləi kə̂ aw to kə majɛ̂ le.

Tar nja lə Gayus ddəw tar tə̂ kə̂ tɔkɔrɔ

³ Minga rɔ-nəəl nya ddəw tə̂ ləi, mba marə ngakɔnjeje teeje nəənn ngaâ n̂-paje tar-naji ləi nan ə-nayn ddəw tar tə̂ kə̂ tɔkɔrɔ ngaâ aw nja ddəw tar tə̂ kə̂ tɔkɔrɔ le.

⁴ Bbo maw moo tar dɔ ngannəm tə̂ kə̂ aw njaje ddəw tar tə̂ kə̂ tɔkɔrɔ a, marə nɛ̂n kə̂ a karəm rɔ-nəəl kuta yeenn goto.

⁵ Ngokɔnʼm kə̂ m-ndikii nya, ə-to gatə gatə ddəw nɛ̂n tə̂ kə̂ aw dda mba ngakɔinje ngaâ njê-mbaje njaa kara aw umande tɔ.

⁶ N̂-paje tar ndiki kə̂ ə-ndiki dəwje lo mbɔn-naan tə̂ lə njê-mə-kunnje. Maji karə umande mba tə̂ ləde kə daw dawje tə̂ kə gusu kə̂ a karə Lubba rɔ-nəəl.

⁷ Mba ɔju dɔ Kristə â dosoje nɛ̂n ddəw-boô dawje ngaâ n̂-mbətəje ta karə dəwje kə̂ gərəje Lubba ang arəde marə nɛ̂n.

⁸ To tar ləje ta kuwa dəwje kə̂ baann kə rɔje tə̂. Baann bba ja toje to njê-kula marədeje mba tar kə̂ tɔkɔrɔ.

Tar kə̂ dɔ Diyoterepə de kə Demetrus tə̂

⁹ Mula kə gɔju makəturu marə Egilisi. A Diyoterepə kə̂ ndiki ta karə ne njaa bba nee dɔ nɛ̂nje tə̂ tɔyn le aa lo kə tar tə̂ ləje le ang.

¹⁰ Yeenn a, ndɔ kə̂ m-tee horose tə̂ a, mâ kole məse dɔ kula-ddɛɛ̂ tə̂, mba Diyoterepə le tuju rije. Dɔɛ̂ tə̂ bbay, n̂-təl n̂-mbətə ta kuwa ngakɔnjeje kə̂ mə Kristə tə̂ kə rɔɛ̂ tə̂. Nɔku ddəw dəwje kə̂ ndiki ta kuwade kə rɔde tə̂ ddəm n̂-tubbade lo mbɔn-naan tə̂ ddəm.

¹¹ Ngokɔnʼm kə̂ m-ndikii nya, kula-dda kə̂ maji â ə-ndaji bbo kula-dda kə̂ maji ang â ə-ndaji ang. Dəw kə̂ dda maji to dəw lə Lubba. Dəw kə̂ dda maji ang gərə Lubba ang.

¹² Demetrus to dəw kə̂ dəwje tɔyn paje tar laa maji. Tar kə̂ tɔkɔrɔ kə̂ naw nja ddəwe tə̂ kara pa tar-naji laa tɔ. Jeje kara jaw pa tar-naji laa kə majɛ̂. Ə-gərə to tar-naji ləje to tar kə̂ tɔkɔrɔ.

Dɔbɔyn tar

¹³ Tarje to nya karə m-dda makəturu tə̂ mari. A, m-ndiki ta dda makəturu le kə kakə kuja makəturu ang.

¹⁴ Mba munda məm to mâ təl kooi bbasinɛn baa, a ja tɔn tam dɔ tarje tə̂ənn bbay.

¹⁵ Maji karə mə-wul-lɔm nayn səi! Njê-buwa-kuraje ləi ddaije lapiya. Ə-dda lapiya njê-buwa-kuraje ləje kâra kâra tɔyn tɔ.