2 Tesalonisinyɛje 3 - Dɔnɔn kə̂ Siki: Tar kə̂ aw arə təbbə

Tar duju Lubba mba Pɔl

¹ Ngakɔnje, ta kutu nɛ̂n dɔɛ̂ a, maji karə ə-dujuje Lubba mbaje bba karə tar lə Əbbə-dəwje taa lo njangə baa ngaâ karə dəwje pitije tar le tokə dəwje aw pitije bbeê ləse le.

² Ə-dujuje Lubba tɔ karə ɔruje ji njê-mə-majangje tə̂ ddəm ji dəwje tə̂ kə̂ maji ang ddəm. Mba to dəwje tɔyn njaa bba ooje məde tə̂ kə Lubba ang.

³ A Əbbə-dəwje aw dda nɛ̂n kə turu ndue. Nâ karə ubbaje singa ngaâ nâ ngəmse karə Nje-mə-majang le ɔruse ang.

⁴ Ddəw tə̂ lə Əbbə-dəwje, jaw junda məje dɔse tə̂ to aw ddaje nɛ̂nje kə̂ n-dujuse karə ə-ddaje le ngaâ â ddaje kaw nɛ̂n kə kete kete.

⁵ Maji karə Əbbə-dəwje tɔjuse ddəw karə ə-ndikije Lubba ngaâ karə Kristə dda arə ə-tɔje wurse.

Pɔl duju karə dəwje ddaje kula

⁶ Ngakɔnje, n-dujuse nya kə ri Əbbəjeje Jeju-Kristə karə aynje ngakɔnje kə̂ toje to njê-dabbəje, kə̂ aw ddaje nɛ̂nje kə̂ toje dang kə nɛ̂nje kə̂ n-tɔjuse.

⁷ Sese njaa kara, ə-gərəje gusu kə̂ ta ndaji nɛ̂n nɛ̂n-ddaje ləje. Mba kar tə̂ kə̂ n-nayn horose tə̂ le, n-dabbə ang.

⁸ N-duju dəw jarə arəje nɛ̂n-kusa baa ang. N-dda kula jarə ngəng, joo ndoo til kə kar, bba karə n-ddee to nɛ̂n-koto dɔ marə dəw tə̂ kâra horose tə̂ ang.

⁹ Tɔkɔrɔ, jee kə ddəw ta dujuse karə umanjeje njaa. A n-ndiki ta dda rɔje to nɛ̂n-kɔju-marɛ̂ karə ə-ndajijeje.

¹⁰ Mba kar tə̂ kə̂ jee nɛ̂n horose tə̂ le, n-pa jarəse n-pa nan: «Bbo dəw ndiki kula ang a, maji karə dəw le usa nɛ̂n ang tɔ.»

¹¹ A joo nan marə dəwje horose tə̂ aw ddaje dabbə. N̂-ddaje kula ang, a tar lə dəwje â daw dulaje tade kə tə̂.

¹² Dəwje kə̂ baann le, junn ndu nəənn jarəde, n-ndəjəde kə ri Əbbəjeje Jeju-Kristə karə n̂-ddaje kula ddekeke, ta dede njaa dingaje nɛ̂n nɛ̂n-kusa tade.

¹³ A see ngakɔnje, maji karə ə-ddaje maji kə dəwje bbo arəje rɔse nyase ddəwe tə̂ ang.

¹⁴ Bbo marə dəw mbətə ta dda nɛ̂n kə turu ndu kə̂ jarəse makəturu tə̂ nəənn a, ɛɛ̂je kə majɛ̂, ə-ddaje saa mə-kâra ang arəje rɔɛ̂ wul.

¹⁵ Ooeje to nje-baan ləse ang, a maji karə ə-ndɔruje mbia tokə ngokɔnse njaa.

Dɔbɔyn lapiya

¹⁶ Maji karə Əbbə-dəwje kə̂ to nje-mə-wul-lɔm arə məse wul lɔm kə ndɔ tɔyn, mə nɛ̂nje tə̂ tɔyn. Maji karə Əbbə-dəwje nayn kə se tɔyn!

¹⁷ Əman Pɔl njaa muja tar lapiya nəənn kə jim. Yeenn to gusu kə̂ maw munda nɛ̂n jim makəturuje tə̂ ləm kâra kâra tɔyn. Əndaji makəturu ləm tokə baann.

¹⁸ Maji karə mə-maji lə Əbbəjeje Jeju-Kristə nayn kə se tɔyn!