2 Tesalonisinyɛje 2 - Dɔnɔn kə̂ Siki: Tar kə̂ aw arə təbbə

Nɛ̂n kə̂ a tee kete bba Jeju a təl ddee

¹ Ngakɔnje, tar kə̂ ɔju dɔ ddee lə Əbbəjeje Jeju-Kristə kə tar mbɔn-naan ləje rɔɛ̂ tə̂ le, nɛ̂n kə̂ jaw dujuse â nəənn:

² Marə dəw a kin pa karəse nan Lubba â pa tar arɛ̂ wase jeje â n-pa tar wase jeje â jula kə makəturu n-pa nan ndɔ ddee lə Əbbə-dəwje asə ngaa. Arəje kəjə ləse aw yo aw nɛ̂n ang ddəm arəje bbəəl ddase ang ddəm.

³ Dang bba arəje marə dəw ərəse kə marə gusu ang. Dɔngɔrɛ̂, dəwje a kunnje kutu dda dɔ-kətərə kə Lubba bba. Ngaâ dəw kə̂ mbətə ta dda nɛ̂n kə turu ndu Lubba a tɔju rɔɛ̂ kə ddaka. Ne le Lubba undɛ̂ karə n̂-nayn kə kɔrɔ̂ nyɔm.

⁴ Ne le, nâ kin ta mbətə nɛ̂nje tɔyn kə̂ dəwje aw poloje kə nɛ̂n tɔyn kə̂ daw bbar nan lubba. Nâ kaw ndərəng kaw kisi mə Kəy-polo Lubba tə̂ ngaâ nâ dda rɔɛ̂ to Lubba njaa.

⁵ Oleje məse ang wa? Kar tə̂ kə̂ m-nayn nɛ̂n horose tə̂ bbay le, m-pa tar nəənn marəse.

⁶ A bbasinɛn nəənn, ə-gərəje nɛ̂n kə̂ aw ɔku ddəw nje-mə-majang le bbay, ndərəng karə kar laa asə bba nâ tee.

⁷ Mba singa-mɔngu lə Nje-mə-majang le aw dda kula lo-kiyɛ̂ tə̂ mban. Yeenn a, bbo dəw kə̂ aw ɔkɛ̂ ddəw le njaa goto a, nâ dda kula laa kə ddaka ngaa.

⁸ Yeenn ngaâ nâ tɔju rɔɛ̂ kə ddaka ngaâ Əbbə-dəwje Jeju a tɔlɛ̂ kə ləl tɛɛ̂, nâ tuje kə ndoko laa kə̂ nâ ddee nɛ̂n.

⁹ Satan a karə singa-mɔngu nje-mə-majang le bba a ddee nɛ̂n. Nâ dda nɛ̂n-mɔrije dang dang tɔyn kə nɛ̂nje kə̂ dum dɔ koo ta kərə nɛ̂n dəwje.

¹⁰ Nâ dda nɛ̂nje kə̂ gatə gatə ang ta kərə nɛ̂n dəwje kə̂ aw awje ta nayn kə kɔrɔ̂. Mba n̂-mbətəje ta taa ddəm ta ndiki tar kə̂ tɔkɔrɔ kə̂ a kajide ddəm

¹¹ Mba yeenn bba, Lubba ula marə singa-mɔngu kə̂ aw dda arə dəwje aw ndəəmje ddəw, bba karə n̂-ndikije tə̂ kə tar ngəm le.

¹² Yeenn bba Lubba a gangə sariya dɔ dəwje tə̂ kə̂ mbətəje ta koo məde tə̂ kə tar kə̂ tɔkɔrɔ, a nɛ̂n-dda kə̂ gatə gatə ang â dingaje rɔ-nəəl ddəwe tə̂.

Lubba bbar dəwje karə uwaje arə ngəng

¹³ See ngakɔnje kə̂ Əbbə-dəwje ndikise nya, to tar ləje ta karə wooyo Lubba mbase kə ndɔ tɔyn, mba Lubba mbərəse kunn-kutu duninya tə̂ nu karə ingaje kaji ddəw Ndil tə̂ kə̂ aw dda arə ə-ddeeje maji tɔyn kə ddəw məse tə̂ kə̂ unnje arəje tar kə̂ tɔkɔrɔ.

¹⁴ Mba yeenn bba Lubba bbarse ddəw Tar tə̂ kə̂ Maji kə̂ jila mbəre jarəse karə ingaje piti lə Əbbəjeje Jeju-Kristə.

¹⁵ Yeenn bba, ngakɔnje, maji karə uwaje arəje ngəng, ə-ngəmje nɛ̂nje kə̂ n-tɔjuse kə taje wase ddəw makəturu tə̂.

¹⁶ Bɔjeje Lubba ndikije ngaâ ddəw mə-maji tə̂ laa n̂-dda narə jubba singa kə ndɔ tɔyn ngaâ narə junda məje dɔɛ̂ tə̂ kə majɛ̂. Yeenn a, n-dujude, ne de kə Əbbəjeje Jeju-Kristə njaa karə

¹⁷ n̂-ddaje darə ubbaje singa ngaâ darəse singa dda nɛ̂nje tɔyn kə̂ maji ddəw kulaje tə̂ tɔyn kə̂ aw ddaje ddəm ddəw tarje tə̂ tɔyn kə̂ aw paje ddəm.