2 Piyɛr 3 - Dɔnɔn kə̂ Siki: Tar kə̂ aw arə təbbə

Əbbə-dəwje a təl ddee dɔ nangə tə̂

¹ Ngakɔnʼmje kə̂ m-ndikise nya, ooje, makəturu kə̂ to joo laa ngaa â mula nɛ̂n marəse nəənn. Mə makəturuje tə̂ le joo kəm, m-ndiki ta kole məse dɔ marə nɛ̂nje tə̂, mba ndol nɛ̂n dɔse karə kəjə ləse to kə majɛ̂.

² Maji karə oleje məse dɔ tarje tə̂ lə njê-kilaje mbər tar lə Lubba kə̂ unnje rɔde tɔyn arɛ̂je, oleje məse dɔ ndu tə̂ kə̂ Əbbə-dəwje kə̂ to Nje-kaji-dəwje unn ngaâ njê-kaw-kulaje pa arəse le.

³ Dɔngɔr nɛ̂n, maji karə ə-gərəje to ddutu ndɔje tə̂ a, dəwje kə̂ aw njaje ddəw bbo tə̂ kə̂ da-rɔde tə̂ a kundaje lo teeje. Dâ kɔjujese koko nɛ̂n.

⁴ Dâ paje nan: «Jeju kə̂ unn ndue nan na təl ddee le ee dda wa? Mba kajejedede oyje, a ləw baa njaa nɛ̂nje tɔyn naynje kə lo-tode tokə ye kə̂ kunn-kutu nɛ̂nje tə̂ le.»

⁵ Dəwjeenn le, dede njaa n̂-ndikije tə̂ bba darə məde oy to ləw baa njaa ddəw tar tə̂ kə̂ ta Lubba tə̂, dara kə nangə toje. N̂-dda narə nangə in mə maann tə̂ tee.

⁶ Ddəw maann tə̂ le njaa tɔ â, dɔ nangə kə ləw tuju. Maann taa dɔ nangə le.

⁷ A ddəw tar kə̂ tɛɛ̂ tə̂ ne Lubba le njaa naw ngəm nɛ̂n dara kə nangə kə̂ bbokənɛn nəənn ta nginan nɛ̂n ndɔ kə̂ puru a kɔnde. Dara kə nangə le a nginanje ndɔ kə̂ nâ gangə nɛ̂n sariya dɔ njê-nɛ̂n-ddaje tə̂ kə̂ maji ang kə ndɔ kə̂ nâ tuju nɛ̂n de nyɔm.

⁸ A ngakɔnʼmje kə̂ m-ndikise nya, marə nɛ̂n to kə̂ ta karə məse oy ang: Kəm Əbbə-dəwje tə̂, ndɔ kâra to tokə bbal doro kâra, a bbal doro kâra to tokə ndɔ kâra.

⁹ Marə dəwje aw paje nan Əbbə-dəwje aw tila nya bba ta dda nɛ̂n kə̂ nunn ndue ta dda le. A nɛ̂ɛnn to tokə baann ang. Naw tɔ wure mbase, mba n̂-ndiki ta karə dəw kâra nayn kə kɔrɔ̂ ang. N̂-ndiki ta karə dəwje tɔyn njaa turuje ddəw ləde.

¹⁰ Ndɔ lə Əbbə-dəwje a ddee tokə ddee lə nje-bboko. Ndɔɛ̂ tə̂ənn le, dara a kɔtu. Kar kɔtu laa a, kɔrɛ̂ a bbar kə singa nya. Puru a kɔn nɛ̂nje kə̂ mə dara tə̂ ngaâ nangə kə nɛ̂nje kə̂ dɔ nangə tə̂ a gotoje.

¹¹ Nɛ̂njeenn tɔyn a gotoje, yeenn a, maji karə nɛ̂n-yərəw ɔru pa-nja ləse ang ngaâ ə-ngəmje rɔse mba Lubba.

¹² Maji karə ə-nginanje ddee le ndɔ lə Lubba le ta ə-ddaje arəje ndɔ le ddee njangə. Mba ndɔɛ̂ le puru a kɔn dara, puru a kɔn nɛ̂nje kə̂ darâ ngaâ a lɛɛnje.

¹³ A jeje, jaw nginanje dara kə̂ siki kə nangə kə̂ siki kə̂ Lubba unn ndue ta dda le. Nɛ̂n-dda kə̂ gatə gatə a to tə̂.

¹⁴ Mba yeenn bba, ngakɔnʼmje kə̂ m-ndikise nya, kar tə̂ kə̂ aw nginanje ndɔ le bbay le, maji karə ə-ddaje singa karə marə nɛ̂n-yərəw ɔruse ang ddəm karə marə tar to dɔse tə̂ ang ddəm ngaâ ta ə-naynje kə mə-wul-lɔm kə Lubba.

¹⁵ Maji karə ə-gərəje to tɔ kə̂ Əbbəjeje aw tɔ wure le to mba karə ingaje nɛ̂n kaji. Tar nəənn le â ngokɔnje Pɔl kə̂ n-ndike nya dda makəturu tə̂ arəse ddəw kəm-karɛ tə̂ kə̂ Lubba arɛ̂.

¹⁶ To tarje kə̂ naw pa makəturuje tə̂ tɔyn kə̂ naw dda dɔ tarje tə̂ nəənn le. Marə tarje kə̂ to kətərə ta gərə kandɛ̂ to makəturuje tə̂ laa le. A marə dəwje kə̂ gərəje nɛ̂n ang ddəm sangəje ang ddəm aw turuje kandə tarje le ngaâ aw paje dang tokə daw ddaje kə kəsə tarje kə̂ mə Makəturu tə̂ lə Lubba le. Nɛ̂nje kə̂ daw ddaje baann le, dede njaa daw bbarje yo kə dɔde tə̂.

¹⁷ Yeenn a, see ngakɔnʼmje kə̂ m-ndikise nya, ə-gərəje mban: Maji karə arje dɔ gɔlse tə̂. Arəje njê-nɛ̂n-ddaje kə̂ maji ang ərəse arə ə-ndəəmje ddəw ang ngaâ ə-tusuje mə-kunn ləse le inyaje ang.

¹⁸ A maji karə ə-sangəje kə kete kete ddəw mə-maji tə̂ lə Əbbəjeje kə̂ Nje-kajije Jeju-Kristə ddəm ddəw gərə tə̂ kə̂ ə-gəreje ddəm. Maji karə piti to laa, bbasinɛn nəənn nyɔm kə ləw. Amɛnn!