2 Jan 1 - Dɔnɔn kə̂ Siki: Tar kə̂ aw arə təbbə

Tar lapiya

¹ Əman tɔkə le, m-dda makəturu nəənn mari, əi kɔn-baay kə̂ Lubba bbari kə ddaka ddəm marə nganni kə̂ m-ndikide kə ndiki kə tɔkɔrɔ ddəm. Əman kə karəm baa ang. Dəwje tɔyn kə̂ gərəje tar kə̂ tɔkɔrɔ ndikise tɔ,

² mba tar kə̂ tɔkɔrɔ le to məje tə̂ ngaâ a nayn kə je kə ləw.

³ Lubba kə̂ Bɔ kə Jeju-Kristə Ngonn lə Bɔy Lubba, ddəw tar tə̂ kə̂ tɔkɔrɔ kə ddəw ndiki tə̂, dâ ddaje mə-maji kə je, dâ kooje kəm-to-ndoo ləje ngaâ dâ karəje məje wul lɔm.

Tar ndiki naan

⁴ Moo marə nganni kə̂ aw njaje ddəw tar tə̂ kə̂ tɔkɔrɔ tokə ndu lə Bɔy Lubba pa arəje le. Minga rɔ-nəəl nya mba nganni le.

⁵ Oo, kɔn-baay, nɛ̂n kə̂ m-duji â nəənn: Maji karə n-ndikije naan horo naan tə̂. To ndu kə̂ siki â m-dda makəturu tə̂ mari ang. To ndu kə̂ jingaje kunn-kute tə̂ njaa.

⁶ Ndiki naan to ngəm ndu lə Lubba. Yeenn to ndu kə̂ ooje tarɛ̂ kunn-kute tə̂ ləw baa. Baann bba â njaje ddəw ndiki tə̂.

⁷ Njê-kərəje dəwje tokə banya taaje lo dɔ nangə tə̂. N̂-paje nan Jeju-Kristə unn da-rɔ dəw bba ddee nɛ̂n ang. Dede le n̂-toje to njê-kərəje dəwje kə njê-baanje lə Kristə.

⁸ Aaje rɔse, mba karə nɛ̂n kə̂ jinga ddəw kula tə̂ ləje tuju ang, yeenn bba karə ingaje kuka kə̂ bo.

⁹ Dəw kə̂ nayn dɔ nɛ̂n-tɔju tə̂ lə Kristə ang, aw ddəw əw, n̂-mbətə Lubba ngaa. Dəw kə̂ nja go nɛ̂n-tɔju tə̂ lə Kristə to dəw kə̂ dda mə-kâra kə Bɔ ddəm Ngonn ddəm.

¹⁰ Bbo dəw ddee rɔse tə̂ ngaâ tɔjuse marə nɛ̂n-tɔju kə̂ dang a, ə-ddɛɛ̂je lapiya ang ddəm ə-tɛɛ̂je kə kəy ləse ang ddəm.

¹¹ Dəw kə̂ ddɛɛ̂ lapiya, dda saa mə-kâra dɔ kula-ddɛɛ̂ tə̂ kə̂ maji ang le.

Dɔbɔyn tar

¹² Tarje toje nya ta dda makəturu tə̂ karəse. A m-ndiki ta dda makəturu tə̂ kə jim ang. Mba munda məm ta kaw rɔse tə̂ kə da-rɔm, ta pa tarje le karəse kə tam njaa, bba karə rɔ-nəəl ləje to tɔyn.

¹³ Ngann lə ngokɔin kə̂ dɛnɛ̂n kə̂ Lubba mbəre le, ddaije lapiya.