2 Timɔte 4 - Dɔnɔn kə̂ Siki: Tar kə̂ aw arə təbbə

Dɔbɔyn ndəjəje lə Pɔl

¹ Maw duji kəm Lubba tə̂ kə kəm Jeju-Kristə tə̂ kə̂ a gangə sariya dɔ dəwje tə̂ kə̂ isije kəm baa ddəm dəwje tə̂ kə̂ oyje ddəm, maw duji kə ri Kristə kə̂ a təl ddee kɔn-mbay,

² karə ila mbər tar lə Lubba, ə-təl dɔɛ̂ tə̂ kə kar tɔyn kə kar kə̂ maji ddəm maji ang ddəm. Maji karə ə-tɔjude majang ləde, ə-ndangəde, ə-dda arə dubbaje singa. Maji karə ə-tɔ wuri ddəwe tə̂ ta arə bbo nɛ̂n-tɔju ddai.

³ Mba marə kar aw ddee, karɛ̂ tə̂ənn le, nɛ̂n-tɔju kə̂ maji tɔyn a nəəl dəwje ang ngaa. Dâ kaaje lo kə bbo kə̂ da-rɔde tə̂, bbo koo tar kə̂ məde ndiki ta koo â a ddade kə ndɔ tɔyn ngaâ dâ bbarje njê-nɛ̂n-tɔjuje kə dɔ naan tə̂ dɔ naan tə̂.

⁴ Dâ kutuje mbide karə tar kə̂ tɔkɔrɔ ngaâ dâ tukaje mbide ta koo nɛ̂n əsuje kə̂ ləw kə̂ to tar kə̂ tɔkɔrɔ ang.

⁵ A əi, maji karə ə-gərə dɔ jii ddəw nɛ̂nje tə̂ tɔyn, ə-tɔ wuri mə nɛ̂n kəm-to-ndooje tə̂, ila mbər Tar kə̂ Maji. Ə-dda kula lə Lubba kə majɛ̂.

⁶ Əman, kar kə̂ dâ kunnum karə to nɛ̂n-polo asə mban ngaâ m-nayn ngɔsi baa ta koy ngaa.

⁷ M-dda ddɔ kə̂ maji, mayn ngɔru m-tee mban, m-ngəm mə-kunn ləm.

⁸ Bbasinɛn, Lubba ngəm nɛ̂n kə̂ maji mbam to kuka ləm, nɛ̂n kə̂ maji kə̂ to mba dəwje kə̂ gatə gatə. Əbbə-dəwje kə̂ to nje-gangə sariya kə̂ gatə gatə a karəm nɛ̂n kə̂ maji le ndɔ gangə sariya tə̂. Nâ karəm kə karəm baa ang, nâ karə dəwje tɔyn kə̂ aw ndikije tar ddee laa le tɔ.

Dɔbɔyn tar lə Pɔl

⁹ Maji karə ə-dda gan ə-ddee ingam kə ngɔru.

¹⁰ Mba Demas tusum inyam mba bbo nɛ̂nje kə̂ nangə̂ kə̂ bbokənɛn nəənn. Naw Tesalonikə. Keresan aw nangə tə̂ kə̂ Galasi ngaâ Titə aw nangə tə̂ kə̂ Dalmasi.

¹¹ Luku kə̂ karɛ̂ baa â nayn səm. Ə-ddee kə Markə jii tə̂, mba n̂-to dəw kə̂ asə ta kulɛ̂ karə dda kula lə Lubba.

¹² Mula Tisikə Epɛjə.

¹³ Bbo a ta ddee a, ə-ddee kə kubbu-kul kə̂ minya rɔ Karpus tə̂, tɔkə bbe tə̂ kə̂ Torowas. Ə-ddee kə makəturuje tɔ, uta tɔyn Makəturu-əndaar.

¹⁴ Alɛkəjandərə kə̂ to nje-dda-kɔru ddam maji ang nya. Əbbə-dəwje a təl nɛ̂n karɛ̂ asə kula-ddɛɛ̂.

¹⁵ Əi kara maji karə aa rɔi rɔɛ̂ tə̂, mba n̂-mbətə tarje ləje kə̂ n-pa nyɔm njaa.

¹⁶ Ndɔ kə̂ mɔru nɛ̂n naji ləm lo sariya tə̂ to dɔngɔrɛ̂ le, dəw kâra umanʼm ang. Dede tɔyn n̂-tusumje dinyamje. Maji karə Lubba aa lo kə nɛ̂n tə̂ kə̂ n̂-ddajeenn ang.

¹⁷ A Əbbə-dəwje njaa umanʼm ngaâ arəm singa, mba karə mila mbər tar laa nya marə dəwje ngaâ ta karə dəwje kə̂ toje to Jiipije ang kara tar laa oso mbide tə̂ tɔ ngaâ nɔrum ta ənam tə̂.

¹⁸ Əbbə-dəwje a kɔrum ta nɛ̂nje tə̂ kə̂ maji ang tɔyn ngaâ nâ kajim karə mandə mə Bbe-kɔn tə̂ laa darâ. Maji karə piti to laa kə ndɔ kə ndɔ. Amɛnn.

Dɔbɔyn Lapiya lə Pɔl

¹⁹ Ə-dda lapiya Pirisika de kə Akilas arəm, ə-dda lapiya njê kə̂ kəy lə Onejipɔr arəm tɔ.

²⁰ Erastə nayn Kɔrɛntə. Minya Toropim kə rɔ-to bbe tə̂ kə̂ Milɛ.

²¹ Ə-dda gan ə-ddee kete bba karə nɛyn-kul tee. Ebul kə Pudɛnn kə Linus kə Kolodiya kə ngakɔnjeje tɔyn, n̂-ddaije lapiya.

²² Maji karə Əbbə-dəwje ngəmi! Maji karə mə-maji lə Əbbə-dəwje nayn kə se!