2 Timɔte 3 - Dɔnɔn kə̂ Siki: Tar kə̂ aw arə təbbə

Ddutu ndɔ

¹ Maji karə ə-gərə nɛ̂n nəənn kə majɛ̂: Ddutu ndɔ a, lo a ngəng.

² Dəwje a toje to njê-nɛ̂n-ndikije, dâ ndikije narɛ nya, dâ boroje ngaâ dâ kooje rɔde bo, dâ tajije Lubba, dâ ddaje dɔ-ngəng kə njê-kujujede, dâ gərəje maji kə̂ n̂-dda kə de ang, dâ bbəəlje nɛ̂n lə Lubba ang.

³ Nɛ̂n kâra njaa osode tə̂ ang, dâ kooje kəm-to-ndoo lə dəw ang, dâ nanɛnje kə dəwje, dâ tɔje bbo kə̂ da-rɔde tə̂ ang, bbo dda dəw maji ang dɔrɔ â a ddade, dâ ndikije nɛ̂n kə̂ maji ang.

⁴ Dâ toje to njê-kunnje dɔ dəwje, dâ toje njê-wunguje, koo-rɔ-bo a dda karə dooje lo ang, rɔ-nəəl kə̂ nangə̂ nəənn â dâ ndikije bbo dâ ndikije Lubba ang.

⁵ Dâ ddaje nɛ̂n tokə nje-mə-kunn, a dâ mbətəje singa-mɔngu mə-kunn le. Maji karə ə-turu girii arə dəwjeenn le tɔ.

⁶ Marɛ̂je horode tə̂ aw andəje mə kəyje tə̂ ngaâ aw ingaje ddəw lə dɛnɛ̂nje kə̂ kəjə ləde sangə ang ngaâ ddaje arə dosoje bandə tə̂ ləde, to dɛnɛ̂nje kə̂ toje to njê-nɛ̂n-ddaje kə̂ maji ang ngaâ bbo nɛ̂nje kə̂ maji ang dang dang to məde tə̂.

⁷ Dɛnɛ̂njeenn le aw ndoje nɛ̂n kə ndɔ tɔyn, a ddəw kə̂ dâ kasəje ta gərə nɛ̂n tar kə̂ tɔkɔrɔ goto.

⁸ Ləw, Janɛs de kə Jambɛrɛs n̂-mbətəje tar lə Mɔyijə, ddəw kâra baa, dəwje nəənn aw mbətəje tar kə̂ tɔkɔrɔ tokə baann tɔ. N̂-toje to dəwje kə̂ kəjə ləde tuju ngaâ mə-kunn ləde to nɛ̂n kâra ang.

⁹ A dâ kawje ddəw əw ang, mba dəwje tɔyn a gərəje wooy ləde tokə ləw dəwje gərəje wooy lə Janɛs de kə Jambɛrɛs le.

Pɔl ndəjə Timɔte karə nuwa nɛ̂n kə̂ n̂-tɔjɛ̂ narə ngəng

¹⁰ A əi, ə-gərə nɛ̂n-tɔjuje ləm, pa-nja ləm, nɛ̂nje kə̂ bboe to məm tə̂ ta dda, mə-kunn ləm, kore-wur ləm, ndiki kə̂ m-ndiki dəwje kə kuwa kə̂ muwa marə ngəng.

¹¹ Ə-gərə dda kə̂ dəwje ddamje, ndoo kə̂ moo Antiyos, Ikoniyɔm kə Listərə. Dda kə̂ dəwje oso ddamje! A Əbbə-dəwje ɔrum mə nɛ̂nje tə̂ənn tɔyn.

¹² Dəwje kə̂ ddaje mə-kâra kə Jeju-Kristə ngaâ ndikije ta kula gəl rɔde naan tə̂ ang, dəwje a kulaje kəmde ndoo tə̂.

¹³ A dəwje kə̂ məde maji ang kə njê-kərə dəwje, dâ ddaje majang kə kete kete, dâ kərəje dəwje ngaâ dede njaa kara dəwje a kərəjede tɔ.

¹⁴ A əi, maji karə nɛ̂n kə̂ n̂-tɔji ngaâ oo a, to tɔkɔrɔ bba ə-ndiki tə̂ le uwa arə ngəng, mba ə-gərə dəwje kə̂ tɔjije nɛ̂n le kə majɛ̂.

¹⁵ Kar tə̂ kə̂ ə-nayn ngonn bbay njaa ə-gərə Makəturu kə̂ maji tɔyn. Makəturu le ee kə singa mba tɔji kəm-karɛ. Kəm-karɛ le a kaw səi karə inga kaji kə̂ Jeju-Kristə aw arə dəwje kə̂ unnje məde arɛ̂je.

¹⁶ Tar tɔyn kə̂ n̂-dda Makəturu tə̂ le in rɔ Lubba tə̂ ngaâ Makəturu le to mba tɔju dəwje tar kə̂ tɔkɔrɔ, mba karə dəw gərə majang laa, mba gɔl pa-nja lə dəw karə to kə dannâ, mba tɔju dəw ddəw kə̂ gatə gatə.

¹⁷ Baann bba karə dəw lə Lubba to ngɔsi ngaâ asə ta dda kulaje tɔyn kə̂ maji.