2 Timɔte 1 - Dɔnɔn kə̂ Siki: Tar kə̂ aw arə təbbə

Tar lapiya lə Pɔl

¹ Əman Pɔl, m-to nje-kaw-kula lə Jeju-Kristə, mba Lubba njaa ndiki tə̂ ngaâ bbarəm karə mila mbər tar təbbə kə̂ nunn ndue ta karə dəwje ddəw tə̂ lə Jeju-Kristə.

² M-dda makəturu nəənn mula nɛ̂n mari, əi ngonnəm Timɔte kə̂ m-ndikii nya. Maji karə Lubba kə̂ Bɔ, de kə Jeju-Kristə kə̂ to Əbbəjeje n̂-ddaje səi mə-maji, dooje kəm-to-ndoo ləi ngaâ darəje məi wul lɔm.

Tar wooyo lə Pɔl

³ Marə wooyo nya Lubba kə̂ maw pole kə kəjə kə̂ maji tɔyn go kamjedede tə̂. Kar tɔyn kə̂ maw duju Lubba, maw pa saa tar mbai til kə kar.

⁴ Məjə dɔ nɔn tə̂ kə̂ ə-nɔn a, maal təl kooi ddam nya, baann bba mâ kisi kə rɔ-nəəl.

⁵ Maw mole məm dɔ məi tə̂ kə̂ unn tokə tɔkɔrɔ le. To mə-kunn kə̂ Loyis kə̂ to kaije kə̂ dɛnɛ̂n kə kɔinje Ənis deeje nɛ̂n kete. Məjə tokə əi njaa kara unn məi tokə baann tɔ.

Nɛ̂nje kə̂ maji kə̂ dinya mə ji Timɔte tə̂

⁶ Yeenn le bba maw mole məi ta karə ə-dda arə gusu kə̂ Lubba ari le nayn kə singa kə ndɔ tɔyn, gusu kə̂ inga kar tə̂ kə̂ mila jim dɔi tə̂ le.

⁷ Mba to Ndil bbəəl â Lubba arəje ang. To Ndil singa, ndiki kə tɔ bbo kə̂ da-rɔje tə̂.

⁸ Yeenn bba, maji karə ə-dda rɔ-kul ta pa tar-naji lə Əbbə-dəwje karə dəwje ang ddəm ə-dda rɔ-kul ləm, əman kə̂ dilam kəy-kula tə̂ mbɛɛ̂ le ang ddəm. A maji karə oo səm ndoo mba Tar kə̂ Maji ddəw singa tə̂ kə̂ Lubba arəje.

⁹ Lubba kə̂ ajije njaa bbarje karə n-ddee to dəwje laa. Mba kula kə̂ maji kə̂ n-dda bba n̂-bbar nɛ̂n je ang. N̂-bbarje mba to nɛ̂n kə̂ n̂-gɔl kete ta dda ddəm mba mə-maji laa ddəm. N̂-dda kə je mə-maji le ddəw tə̂ lə Jeju-Kristə kete bba duninya to.

¹⁰ N̂-tɔju mə-maji laa le bbasinɛn ddəw tə̂ lə Nje-kajije Jeju-Kristə kə̂ ddee. Jeju njaa guru singa yo ngaâ tɔju təbbə kə̂ to kə ndɔ kə ndɔ kə ddaka ddəw Tar kə̂ Maji tə̂.

¹¹ Mba yeenn bba Lubba unnum to Nje-nɛ̂n-tɔju ddəm to nje-kaw-kula ddəm karə mila mbər Tar kə̂ Maji le.

¹² Gəle kə̂ nəənn le bba maw moo nɛ̂n ndoo. A rɔ-kule ddam ang, mba m-gərə dəw kə̂ munn məm marɛ̂ le kə majɛ̂ ngaâ m-gərə kə majɛ̂ to nee kə singa ta ngəm nɛ̂n kə̂ ninya mə jim tə̂ ndərəng ddutu ndɔ tə̂.

¹³ Maji karə tar kə̂ tɔkɔrɔ kə̂ m-pa mari le unn to nɛ̂n-ndaji. Ə-dda nɛ̂ɛnn le ddəw mə-kunn tə̂ kə ndiki ddəw mə-kâra tə̂ kə̂ n-dda kə Jeju-Kristə.

¹⁴ Maji karə ə-ngəm nɛ̂nje kə̂ maji kə̂ Lubba inya mə jii tə̂ le ddəw singa tə̂ lə Ndil-mə-nda kə̂ isi məje tə̂.

¹⁵ Ə-gərə maji to dəwje tɔyn kə̂ Aji tusumje Inyamje. Pijɛl de kə Ɛrmojɛnn kara dinyamje tɔ.

¹⁶ Maji karə Əbbə-dəwje oo kəm-to-ndoo lə njê kə̂ kə̂y lə Onejipɔr, mba n̂-dda narə minga singa kə ndɔ tɔyn ngaâ n̂-dda rɔ-kul mba kila kə̂ dilam kəy-kula tə̂ le ang.

¹⁷ Tee kə̂ n̂-tee Rɔm be a, n̂-sangəm kə singa ndərəng ningam.

¹⁸ Maji karə Əbbə-dəwje oo kəm-to-ndoo laa ndɔ tə̂ kə̂ Lubba a gangə nɛ̂n sariya. Ə-gərə nɛ̂nje kə̂ maji tɔyn kə̂ n̂-dda səm Epɛjə le kə majɛ̂.