2 Kɔrɛntinyɛje 9 - Dɔnɔn kə̂ Siki: Tar kə̂ aw arə təbbə

Lubba ndiki dəw kə̂ aw arə nɛ̂n kə rɔ-nəəl

¹ Nɛ̂n kə̂ ta kuman nɛ̂n dəwje lə Lubba le, to marə nɛ̂n kə̂ ta dda makəturu to dda mbɛɛ̂ karəse ang.

² M-gərə kəjə kə̂ maji kə̂ to məse tə̂ arə maw munda nɛ̂n gum marə dəwje kə̂ Maseduwann, m-pa nan, kaal baa njaa, Egilisije kə̂ Akay gɔlje rɔde ta karə nɛ̂n. Ngaâ bbo karə nɛ̂n kə̂ to məse tə̂ le dda arə nya lə Egilisije ddaje bbo ta karə nɛ̂n tɔ.

³ Mula ngakɔnje marəse karə ə-gɔlje rɔse tokə m-pa marəse le, bba karə guje kə̂ junda mbase le təl to nɛ̂n kə̂ baa ang.

⁴ Bbo njê kə̂ Maseduwann ddeeje səm ngaâ gərəje to ə-gɔlje rɔse ang a, məje kə̂ junda dɔse tə̂ le a təl to nɛ̂n-rɔ-kul ləje ddəm ləse ddəm.

⁵ Mba yeenn bba, moo maji ta duju ngakɔnje le karə awje rɔse tə̂ kete, karə n̂-gɔlje nɛ̂n-mbɔn kə̂ unnje nduse ta mbɔn le. Yeenn bba bbo m-tee ngaâ nɛ̂nje le toje dɔ naan tə̂ lo kâra a, a tɔju to arəje nɛ̂nje le kə mə-kâra bbo arəje kə̂ mə kə̂ joo ang.

⁶ Maji karə ə-gərəje: Dəw kə̂ dubbu nɛ̂n tɛn baa, a kuja nɛ̂n tɛn baa tɔ. A dəw kə̂ dubbu nɛ̂n nya, a kuja nɛ̂n nya tɔ.

⁷ Maji karə dəw kâra kâra arə nɛ̂n kə̂ ne njaa nəjə məɛ̂ tə̂ ta karə, bbo narə kə kəjə-tar ang ddəm dɔ singa tə̂ ang ddəm. Mba Lubba ndiki dəw kə̂ arə nɛ̂n kə rɔ-nəəl.

⁸ Lubba ee kə singa ta karəse nɛ̂nje kə̂ maji dang dang tɔyn baa kə nangə̂. Baann bba karə nɛ̂n to jise tə̂ kə ndɔ tɔyn ddəm marə nɛ̂n kâra duse ang ddəm ngaâ karə ingaje marɛ̂ dɔɛ tə̂ ə-ddaje nɛ̂n-kulaje kə̂ maji tɔyn.

⁹ Ddəw kâra baa tokə Makəturu lə Lubba pa nan: «Narə nɛ̂n nya nya njê-ndooje. Gatə gatə laa aw to kə ndɔ kə ndɔ.»

¹⁰ Lubba kə̂ to nje-karə kandə-ko nje-nɛ̂n-dubbu ngaâ aw arɛ̂ nɛ̂n-kusa tɛɛ̂ le, a karəse kandə-ko tɔ. Nâ dda karə kandə-ko le banya ngaâ nâ dda karə nɛ̂n-dda ləse kə̂ gatə gatə banya.

¹¹ Nâ dda karə ingaje nɛ̂n nya nya, bba karə arəje nɛ̂n kə mə-kâra, baann bba dəwje nya a karəje wooyo Lubba mba nɛ̂n-mbɔn ləse kə̂ ja kaw nɛ̂n karəde kə rise le.

¹² Mba kula nɛ̂n-mbɔn nəənn le aw uman dəwje lə Lubba njaa a bbayɛ̂ ang. Aw dda arə daw darəje wooyo Lubba nya.

¹³ Dâ kooje nɛ̂n kə̂ ə-ddaje nəənn le ngaâ dâ kɔsuje gaji Lubba mba aw ddaje nɛ̂n kə turu ndu Tar kə̂ Maji lə Kristə ddəm mba mə-kâra kə̂ aw ddaje kə de ddəm kə kəsə dəwje lə Lubba tɔyn ddəm ddəw nɛ̂n tə̂ kə̂ aw arəjede le.

¹⁴ Dâ tɔjuje ndiki kə̂ n̂-ndikise ddəw duju tə̂ kə̂ daw dujuje Lubba mba tar ləse, mba mə-maji kə̂ Lubba dda kə se tokə bo nya le.

¹⁵ Maji karə jarəje wooyo Lubba mba narəje nɛ̂n kə̂ garɛ̂ goto!