2 Kɔrɛntinyɛje 8 - Dɔnɔn kə̂ Siki: Tar kə̂ aw arə təbbə

Tar karə nɛ̂n kə mə-kâra

¹ Ngakɔnje, n-ndiki ta dda karə ə-gərəje mə-maji kə̂ Lubba dda kə Egilisije kə̂ Maseduwann.

² Nɛ̂n kəm-to-ndooje nya ingajede njaa, a rɔde nəəlde nya. N̂-ndooje nya njaa, a darəje nɛ̂n kə nangə̂ baa.

³ Kəmʼm tə̂ njaa, darəje nɛ̂nje kə̂ asə gude, darəje darə uta dɔɛ̂ kə mə-ndiki ləde njaa.

⁴ Dumanje kə je nya nya mba karə n-dda kə de mə-maji jarə dumanje dəwje lə Lubba.

⁵ N̂-ddaje nɛ̂n kə̂ uta dɔ ye kə̂ junda məje karə n̂-ddaje: Dunnje rɔde darə Əbbə-dəwje ngaâ dunnje rɔde darəjeje tɔ ddəw mə-ndiki tə̂ lə Lubba.

⁶ Mba yeenn bba, n-duju Titə nya karə dda kula mə-maji kə̂ nunn kute bbeê ləse nəənn le ndərəng nɔsu kɔnyɛ̂.

⁷ Nɛ̂nje tɔyn toje rɔse tə̂ nya mban. Nɛ̂nje tokə lə mə-kunn, gusu pa tar, nɛ̂n-gərə dang dang, bbo kula kə ndiki kə̂ ə-ndikijeje. Yeenn a, maji karə ə-ddaje kula mə-maji nəənn le nya nya tɔ.

⁸ To ndu â munn marəse ang. Â bbo m-pa tar bbo dda kula kə̂ to mə marə dəwje marəse a, yeenn to ddəw â marəse karə sese kara ə-tɔjuje ndiki ləse kə̂ tɔkɔrɔ kə ddaka.

⁹ Mba ə-gərəje mə-maji lə Əbbəjeje Jeju-Kristə kə̂ to nje-nɛ̂n-kinga, bba təl dda rɔɛ̂ to nje-ndoo mba tar ləse, bba karə ndoo laa dda arə ə-ddeeje to njê-nɛ̂n-kingaje.

¹⁰ M-ndiki ta pa kəjə ləm kə̂ dɔ tar tə̂ nəənn. To tar kə̂ a ddase maji. Kaal nɛ̂n, sese â ə-toje to dəwje kə̂ dɔngɔr kə̂ ndikije ta mbɔn nɛ̂n ngaâ ə-toje to dəwje kə̂ dɔngɔr kə̂ mbɔnje nɛ̂n le.

¹¹ Yeenn a, bbasinɛn nəənn maji karə ə-ddaje kula nəənn le ə-tungaje. Maji karə bbo kə̂ to məse tə̂ ta dda nɛ̂n nəənn le njaa ə-ddaje nɛ̂n kula le ə-tungaje. Ə-ddaje arə asə guse.

¹² Bbo dəw ee kə kəjə kə̂ maji ta karə nɛ̂n nɛ̂n kə̂ to jia tə̂ a, Lubba a koo nɛ̂n le maji kəmɛ̂ tə̂. Nɛ̂n kə̂ to ji dəw tə̂ ang â Lubba a duju ang.

¹³ Kəjə ləje to karə otoje nɛ̂nje ləse tɔyn umanje nɛ̂n ngakɔnse ta ə-təlje isije to ndoo ndoo ang. N-ndiki ta karə asəje naan.

¹⁴ Bbasinɛn nəənn, nɛ̂nje kə̂ to jise tə̂ nya le asə ta kuman nɛ̂n dəwje kə̂ nɛ̂n dude. Â bbo ndɔ kə̂ nɛ̂n duse ngaâ dede nɛ̂n to jide tə̂ nya a, dâ kumanje nɛ̂n se tɔ. Baann bba â kasəje naan.

¹⁵ Ddəw kâra baa tokə Makəturu lə Lubba pa nan: «Dəw kə̂ inga nɛ̂n nya, inga nɛ̂n uta dɔɛ̂ kâra ang ngaa dəw kə̂ inga nɛ̂n nya ang, marə nɛ̂n due ang.»

Titə kə marə njê-mə-kunnje dawje Kɔrɛntə

¹⁶ Jarə wooyo Lubba kə̂ ila bbo kumanse mə Titə tə̂ tokə ləje le tɔ.

¹⁷ N̂-ndiki tə̂ ta dda nɛ̂n kə̂ n-duje le ngaâ nunn məɛ̂ tɔyn ta dda. Ne njaa nin kə dɔɛ̂ baa naw rɔse tə̂.

¹⁸ Julɛ̂ kə marə ngokɔnje kə̂ Egilisije tɔyn aw piteje mba kula kə̂ naw dda mba Tar kə̂ Maji le.

¹⁹ Uta tɔyn, Egilisije â unnɛ̂ karə naw kə je nja tə̂ ləje, karə n-dda kula mə-maji nəənn. To kula kə̂ darəje n-dda karə arə piti Əbbə-dəwje njaa ddəm karə tɔju kəjə ləje kə̂ maji ddəm.

²⁰ Nɛ̂n-mbɔn kə̂ kɔrɛ̂ bo nya kə̂ dinya jije tə̂ karə n-dda nɛ̂n kula le, n-ndiki karə dəwje paje tar kə̂ maji ang dɔɛ tə̂ ang.

²¹ Mba jaw sangə ddəw ta dda nɛ̂n kə̂ maji kəm Əbbə-dəwje tə̂ kə karɛ̂ baa ang, kəm dəwje tə̂ tɔ.

²² Jula marə ngokɔnje kə de tɔ. Joo a, bbo dda kula to məɛ̂ tə̂, ddəw nɛ̂nje tə̂ dang dang kə̂ naw dda. Bbasinɛn nəənn njaa kara naw tɔju bbo dda kula kə̂ to məɛ̂ tə̂ le, mba nunda məɛ̂ dɔse tə̂ nya.

²³ Titə to nje-buwa-nja ləm ddəm nje-kula marəm ddəm horose tə̂. A ngakɔnje kə̂ dannɛ̂je le toje to njê-kaw-kulaje kə̂ Egilisije â ulajede arə daw ddaje kula kə̂ aw arə piti Kristə.

²⁴ Yeenn bba, maji karə ə-tɔjuje ndiki kə̂ ə-ndikijede kəm Egilisije tə̂, karə n̂-gərəje to guje kə̂ jaw junda mbase le to kə ddəwe.