2 Kɔrɛntinyɛje 7 - Dɔnɔn kə̂ Siki: Tar kə̂ aw arə təbbə

¹ See ngakɔnʼmje kə̂ m-ndikise nya, Lubba unn ndue ta dda nɛ̂njeenn tɔyn mba tar ləje. Yeenn a, maji karə jeje njaa jɔru nɛ̂n-yərəwje tɔyn da-rɔje tə̂ kə kəjə tə̂ ləje kə ddang. Maji karə n-ddaje singa ta ddee maji tɔyn ddəw bbəəl Lubba tə̂.

Rɔ-nəəl lə Pɔl

² Maji karə unnje məse arəjeje. Jeje, n-dda dəw maji ang kâra ang, n-tuju dəw kâra ang, jərə dəw kâra jusɛ̂ ddəw gusu tə̂ ang.

³ M-pa yeenn ta gangə nɛ̂n sariya dɔse tə̂ ang, mba m-pa marəse mban: N-ndikise nya, le n-nayn kəm baa wase joy kara n-ndikise nya.

⁴ Munda məm tɔyn kə dɔse tə̂. Maw munda gum mbase nya. Wurum oso pɔn ddəm maw minga rɔ-nəəl nya ddəm mə nɛ̂n kəm-to-ndooje tə̂ ləje.

⁵ Mba kar kə̂ n-tee Maseduwann be njaa nɛ̂n kəm-to-ndooje dang dang tɔyn ingajeje. Juwa rɔje ang. Dəwje uruje dɔje tə̂ kə kɔl ngaâ jisi kə bbəəl məje tə̂.

⁶ A Lubba kə̂ nje-wul mə dəwje kə̂ singade ɔru wul məje ddəw ddee tə̂ lə Titə.

⁷ Ddəw ddee tə̂ laa kâra baa ang. Ddəw məɛ̂ tə̂ kə̂ ə-wulje tɔ. N̂-pa tar maaləm kə̂ ddase nya, tar nɔn kə̂ aw nɔnʼmje kə tar to kə̂ ə-toje ngɔsi ngɔsi mba mayn tar dɔm tə̂ le. Mba yeenn bba, rɔm təl nəələm uta bbay.

⁸ Bbo le makəturu kə̂ m-dda marəse le dda arə rɔse nəəlse ang kara, yeenn jɔkəm ang. Le jɔkəm njaa kara, m-gərə to makəturu le dda arə rɔse nəəlse ang mba gɔju kar baa.

⁹ A bbasinɛn rɔm nəələm. Rɔse kə̂ nəəlse ang le â rɔm nəələm mbɛɛ̂ ang. Rɔm nəələm, mba rɔse kə̂ nəəlse ang le dda arə ə-turuje məse. Rɔse kə̂ nəəlse ang le to ddəw mə-ndiki tə̂ lə Lubba. Yeenn a, n-dda marə nɛ̂n kə̂ maji ang kâra kə se ang.

¹⁰ Mba rɔ-katə kə̂ to ddəw mə-ndiki tə̂ lə Lubba aw dda arə dəw aw turu məɛ̂ ngaâ inga kaji. Yeenn jɔku dəw le ang. A rɔ-katə kə̂ in dɔ nangə tə̂ nəənn aw dda arə dəw aw inga yo.

¹¹ Ooje: Nɛ̂nje kə̂ rɔ-katə kə̂ Lubba ndiki tə̂ dda rɔse tə̂ a nəənn: Ə-toje ngɔsi ngɔsi ta dda kula. Ə-toje ngɔsi ngɔsi ta duju karə dɔru tar dɔse tə̂. Bbo ooje nɛ̂n-dda kə̂ maji ang a, aw arəse wungu nya. Bbəəl aw to məse tə̂ nya. Maal təl koom aw ddase nya. Bbo dda kula to məse tə̂ nya. Aw ə-gangəje sariya dɔ dəw tə̂ kə̂ dda majang. Uta tɔyn, ə-tɔjuje to aw ngəmje rɔse ddəw nɛ̂n tə̂ənn le.

¹² Yeenn bba, bbo m-dda makəturu le marəse a, m-dda ɔju dɔ dəw kə̂ dda nje-marɛ̂ maji ang ddəm ɔju dɔ dəw kə̂ nje-marɛ̂ ddɛɛ̂ maji ang le ddəm. A m-dda ta tɔju kəm Lubba tə̂ to ə-toje ngɔsi ta dda nɛ̂n njangə njangə mbaje.

¹³ Nɛ̂ɛnn le dda arə məje oso pɔn. Dɔ ye tə̂ənn bbay, rɔje nəəlje nya mba rɔ-nəəl lə Titə kə̂ sese tɔyn njaa ə-ddaje arə məɛ̂ wul.

¹⁴ Mba gum kə̂ munda ngaji mbase kəmɛ̂ tə̂ le təl to nɛ̂n-rɔ-kul ləm ang. Jeje jaw pa tar kə̂ tɔkɔrɔ kə ndɔ tɔyn jarəse, yeenn bba guje kə̂ jaw junda mbase kəm Titə tə̂ le ddee to nɛ̂n kə̂ to kə dɔgɔlɛ̂ njaa.

¹⁵ Bbo məɛ̂ ole dɔ gusu tə̂ kə̂ ooje nɛ̂n tɛɛ̂ kə gusu tə̂ kə̂ ə-tɛɛ̂je nɛ̂n kə rɔse tə̂ kə bbəəl ddəm kə rɔ-kisa ddəm a, ndiki laa kə̂ naw ndikise le təl bo nya bbay.

¹⁶ Rɔm nəələm nya mba masə ta kunda məm dɔse tə̂ mə nɛ̂nje tə̂ tɔyn.