2 Kɔrɛntinyɛje 6 - Dɔnɔn kə̂ Siki: Tar kə̂ aw arə təbbə

¹ Jaw dda kula kə Lubba le. Mba yeenn bba n-walse nya karə mə-maji kə̂ Lubba dda kə se le to baa ang.

² Mba Lubba pa nan: «Kar kə̂ maji asə a, m-dda nɛ̂n kə̂ ə-duju le. Ndɔ kaji dəwje asə a, m-ddee mumain.» Oo, kar kə̂ maji â nəənn. Oo, ndɔ kaji dəwje â nəənn.

³ N-dda marə nɛ̂n jarə dəw tuka gɔlɛ̂ tə̂ oso kâra ang, bba karə dəw inga marə tar kə̂ maji ang ta pa dɔ kula tə̂ ləje le ang.

⁴ A mə nɛ̂nje tə̂ tɔyn, n-tɔju to n-to njê-kulaje lə Lubba njaa. Juwa jarə ngəng mə nɛ̂n kəm-to-ndooje tə̂, mə nɛ̂n-singaje tə̂ kə mə nɛ̂n-bbəəlje tə̂.

⁵ Dəwje tundajeje, dilajeje kəy-kula tə̂, wooy dda dəwje dɔje tə̂, kula ɔru singaje, n̂-ddaje darə n-tibbi ang, joso labbə.

⁶ A n-ngəm rɔje, n-tɔju nɛ̂n-gərə ləje, n-tɔ wurje, n-dda maji kə dəwje, Ndil-mə-nda umanje, n-ndiki dəwje kə məje tɔyn,

⁷ n-pa tar kə̂ tɔkɔrɔ, Lubba arəje singa-mɔngu laa. Junn nɛ̂n-dda kə̂ gatə gatə to nɛ̂n-dda ddɔ ləje ddəm to dər ləje ddəm.

⁸ Dəwje aw waljeje ddəm daw dabbəjeje ddəm. Daw tajijeje ddəm daw dɔsuje gajije ddəm. Jaw pa tar kə̂ tɔkɔrɔ, a daw doojeje to njê-ngəmje.

⁹ Dəwje gərəjeje kə majɛ̂, a daw doojeje tokə dəwje kə̂ n̂-gərəjede ang. Dəwje oojeje to dəwje kə̂ a ta koy to koy, a ooje, jisi kəm baa. Dəwje aw tundajeje, a n̂-tɔljeje ang.

¹⁰ Dəwje aw ddaje arə rɔje nəəlje ang, a jaw jisi kə rɔ-nəəl kə ndɔ tɔyn. Dəwje aw oojeje to njê-ndooje, a jaw dda jarə dəwje nya aw ddeeje to njê-nɛ̂n-kingaje. Dəwje oojeje to marə nɛ̂n ləje goto, a jee kə nɛ̂n tɔyn.

¹¹ Ngakɔnje kə̂ Kɔrɛntə, n-pa tar kə̂ tɔkɔrɔ kə ddaka jarəse mban. Junn məje tɔyn jarəse.

¹² Jeje junn məje jarəse. A sese â ə-mbətəje ta kunn məse karəje.

¹³ Yeenn a, maw pa tar kə se tokə nganəm njaa. Maji karə sese kara unnje məse arəjeje tɔ.

Maji karə nje-mə-kunn ngəm rɔɛ̂ mba Lubba

¹⁴ Daw mbɔn daje naan tə̂ joo bba daw dda nɛ̂n kula. A dəwje kə̂ ooje məde tə̂ ang le, maji karə ə-mbɔnje naan kə de tokə baann ang. Ddi bba a mbɔn nɛ̂n kə̂ gatə gatə kə nɛ̂n kə̂ maji ang naan tə̂ wa? Lo-karɛ a dda mə-kâra kə lo ndul tokə baânn wa?

¹⁵ Kristə de kə Əsu dâ koo-ta-naan tokə baânn wa? Wase, ddi bba a mbɔn nje-mə-kunn kə nje-mə-kunn ang naan tə̂ wa?

¹⁶ Ddi bba a mbɔn kəy-polo Lubba kə kɔrje naan tə̂ wa? Mba jeje, n-to kəy-polo Lubba kə̂ nje-kisi kəm baa. Lubba le njaa pa nan: «Mâ kisi horode tə̂ ddəm mâ nja horode tə̂ ddəm. Mâ to Lubba ləde ngaâ dâ toje to dəwje ləm.»

¹⁷ Mba yeenn bba, Əbbə-dəwje pa bbay nan: «Ə-teeje horode tə̂ kə ddang ta isije dang. Ɔruje nɛ̂n-yərəw kâra kə jise ang, a əman, mâ taase kə̂ rɔm tə̂.»

¹⁸ Əbbə-dəwje kə̂ Nje-singa-mɔngu pa bbay nan: «Mâ to Bɔsese, a sese, â toje to ngannəm kə̂ dingaw kə ngannəm kə̂ dɛnɛ̂n.»