2 Kɔrɛntinyɛje 5 - Dɔnɔn kə̂ Siki: Tar kə̂ aw arə təbbə

¹ N-gərə, da-rɔje kə̂ nangə̂ nəənn kə̂ tokə kəy-kam baa to nɛ̂n kə̂ aw tuju. A marə kəy ləje kə̂ Lubba dda darâ to. To kəy kə̂ ji dəw â dda ang ngaâ a nayn kə ndɔ kə ndɔ.

² A jaw sɔmje nya mə kəy-kam tə̂ nəənn le, jaw ndiki ta kula da-rɔ kə̂ siki tokə lə kubbu dɔ ye tə̂ kə̂ nangə̂ nəənn le. Da-rɔ kə̂ siki le to kəy ləje kə̂ to darâ le.

³ Yeenn bba kubbu a to rɔje tə̂ bbo ja kisi rɔje baa ang.

⁴ Mba, kar tə̂ kə̂ n-naynje mə da-rɔ tə̂ nəənn kə̂ to kəy-kam bbay le, jaw sɔmje tokə nɛ̂n-koto â aw ɔɔyje nya. A n-ndiki ta kɔru da-rɔje kə̂ nangə̂ nəənn le kə ddang ang. N-ndiki ta kula marɛ̂ dɔɛ tə̂, karə təbbə taa turu nɛ̂n kə̂ a ta koy to koy le.

⁵ Lubba â gɔlje mba nɛ̂ɛnn le ngaâ narəje Ndil laa ta nginan nɛ̂n nɛ̂nje kə̂ n̂-gɔl mba tar ləje.

⁶ Yeenn a, rɔje nayn oy njururu ang bbay. A n-gərə to, kar kə̂ n-naynje mə da-rɔ tə̂ nəənn bbay le, jisi ddəw əw kə Əbbə-dəwje.

⁷ Mba mə-kunn â jaw nja ddəwe tə̂ bbo ddəw kəmje tə̂ kə̂ aw oo lo ang.

⁸ Tɔkɔrɔ njaa, rɔje oy njururu ang bbay ngaâ n-ndiki nya ta kinya da-rɔje nəənn le ta kaw kisi mbɔr Əbbə-dəwje tə̂.

⁹ Mba yeenn bba, le n-nayn mə da-rɔ tə̂ nəənn wase n-tee mə tə̂ kə ddang kara, nɛ̂n kə̂ n-ndiki to, karə nooje maji kəmɛ̂ tə̂.

¹⁰ Mba, a to tar ləje tɔyn ta kar nɔn sariya tə̂ lə Kristə, karə dəw kâra kâra inga kuka laa mba kula-dda kə̂ maji wase kə̂ maji ang kə̂ n̂-dda kə da-rɔɛ̂ le, kar tə̂ kə̂ n̂-nayn nɛ̂n dɔ nangə tə̂.

Kungu naan tə̂ lə Lubba kə dəwje

¹¹ N-gərə nɛ̂n kə̂ to bbəəl Əbbə-dəwje kə majɛ̂. Ngaâ, n-sangə ddəw ta dda karə dəwje ndikije tə̂ kə tar ləje. Lubba gərəje kə majɛ̂ ngaâ munda məm to ə-gərəjeje kəjə tə̂ ləse kə majɛ̂ tɔ.

¹² Jeje njaa n-ndiki ta təl pa tar dɔje tə̂ maji karəse ang ngaa. Jinya ddəw karə undaje guse mbaje. Baann bba â kasəje ta kila tar tə̂ lə dəwje kə̂ aw unda gude mba nɛ̂n kə̂ daw dooje kə kəmde, a dinya nɛ̂n kə̂ to mə dəw tə̂.

¹³ Bbo n-to tokə dəwje kə̂ dɔde goto a, n-to tokə baann mba Lubba. Â bbo n-to tokə dəwje kə̂ dɔde to tə̂ a, n-to tokə baann mbase.

¹⁴ Mba n-gərə to Kristə ndikije nya, jeje kə̂ n-gərə to dəw kâra baa kə̂ to Kristə le oy mba dəwje tɔyn, yeenn a, dəwje tɔyn oyje tɔ.

¹⁵ Noy mba dəwje tɔyn bba karə dəwje kə̂ isije kəm baa, isije kəm baa mba tar ləde njaa ang, a disije kəm baa mba dəw kə̂ oy ngaâ ndol mbade.

¹⁶ Mba yeenn bba, bbasinɛn nəənn jaw joo dəw kə kəm kə̂ to dang kə kəm kə̂ jooe nɛ̂n ddəw da-rɔ tə̂ ngaa. Bbo ləw, jaw joo Kristə ddəw da-rɔ tə̂ a, bbasinɛn nəənn, jaw jooe tokə baann ang ngaa.

¹⁷ Mba yeenn bba, bbo dəw dda mə-kâra kə Kristə a, dəw le ddee to dəw kə̂ n̂-ddɛɛ̂ tokə siki ngaa. Nɛ̂nje kə̂ ləw ndayje mban, a ooje: Nɛ̂n kə̂ siki ddee ngaa.

¹⁸ Lubba â dda nɛ̂njeenn tɔyn. Ne â nunguje naan tə̂ saa ddəw tə̂ lə Kristə ngaâ narəje kula kungu dəwje naan tə̂ saa karə n-ddaje.

¹⁹ Mba Lubba â təl ungu dəwje kə̂ duninya tə̂ naan tə̂ saa ddəw tə̂ lə Kristə. Naa lo kə majang tə̂ ləde ang. Nula tar kungu dəwje naan tə̂ saa məje tə̂.

²⁰ Jeje, Kristə â ulaje karə n-paje tar kə ria. Yeenn nayn to Lubba njaa aw bbarse ddəw tə̂ ləje. Jaw walse nya kə ri Kristə, maji karə unguje naan tə̂ kə Lubba.

²¹ Kristə dda majang kâra ang. A Lubba arə noto majang ləje. Yeenn bba karə n-ddeeje to dəwje kə̂ gatə gatə kəm Lubba tə̂ ddəw tə̂ lə Kristə.