2 Kɔrɛntinyɛje 3 - Dɔnɔn kə̂ Siki: Tar kə̂ aw arə təbbə

Nje-kula dɔnɔn kə̂ siki

¹ Jeje njaa ja təl pa tar ləje maji karə dəwje bbay wa? Ja duju ta karə n̂-dda makəturu dɔje tə̂ darəse wase karə ə-ddaje makəturu dɔje tə̂ arəjeje bbay tokə marɛ̂je aw dujuje le wa?

² Sese â ə-toje to makəturu ləje kə̂ n̂-dda məje tə̂. Dəwje tɔyn gərəje makəturu le ngaâ n̂-turaje.

³ Sese njaa ə-toje to makəturu kə̂ Kristə dda ngaâ ula jije jee njê-kulaje tə̂ arə n-ddee nɛ̂n. N̂-dda kə maann nɛ̂n-dda makəturu ang, n̂-dda kə Ndil lə Lubba kə̂ nje-kisi kəm baa. N̂-dda bəkərə-ər tə̂ ang. N̂-dda da-rɔse tə̂, bbəngərəse tə̂.

⁴ Nɛ̂ɛnn dda arə məje oso pɔn nɔn Lubba tə̂ ddəw tə̂ lə Kristə.

⁵ Jeje njaa jasə ta dda kula nəənn le ang. Lubba â dda arə jasə ta dda kula kə̂ jaw dda le.

⁶ Ne â n̂-dda narə jasə ta to njê-kula dɔnɔn kə̂ siki le. Dɔnɔn kə̂ siki le in mə Ndu tə̂ kə̂ duja makəturu tə̂ to kuja ang. To dɔnɔn kə̂ in rɔ Ndil tə̂. Mba Ndu kə̂ duja makəturu tə̂ aw kə dəw kə yo tə̂, a Ndil aw arə təbbə.

⁷ A kula lə Ndu kə̂ aw aw kə dəw ta yo tə̂ ngaâ duja gɔlɛ̂ kâra kâra dɔ Bəkərə-ərje tə̂ le ndoko nya. Yeenn bba ngann Ijarayɛlje asəje ta kaa kəm Mɔyijə ang, mba kəmɛ̂ ndoko nya. A ndoko lə kəm Mɔyijə le a nday to nday.

⁸ Kula lə Ndil a ndoko nya kuta yeenn ang tokə baânn wa?

⁹ Bbo kula lə ndu kə̂ aw gangə sariya-yo dɔ dəwje tə̂ ləw ndoko a, kula kə̂ aw dda arə dəw aw ddee gatə gatə kəm Lubba tə̂ a ndoko kuta yeenn ang wa?

¹⁰ Yeenn a, nɛ̂n kə̂ ndoko ləw le ndoko ang ngaa ɔju dɔ nɛ̂n kə̂ bbasinɛn nəənn kə̂ ndoko nya uta le.

¹¹ Mba bbo nɛ̂n kə̂ aw nday to nday ndoko ləw a, nɛ̂n kə̂ a nayn kə ndɔ kə ndɔ a ndoko kuta.

¹² Junda məje tokə baann le arə məje oso pɔn.

¹³ Jeje jaw dda tokə Mɔyijə kə̂ ɔnn kəmɛ̂ kə ta-kubbu le ang. Mɔyijə le dda baann mba ngann Ijarayɛlje a kooje kɔtu lə ndoko kə̂ to nɛ̂n kə̂ aw nday to nday kə̂ to kəmɛ̂ tə̂ le.

¹⁴ A ddəw nɛ̂n-gərə ləde utu ngaa. Ndərəng bbokənɛn nəənn, bbo daw turaje makəturu Dɔnɔn kə̂ Ləw le a, tokə nɛ̂n kə̂ ta-kubbu le nayn kə lo-toe bbay, tokə kɔru ang. Mba dəw kə̂ unn məɛ̂ arə Kristə bba ta-kubbu le a kɔru kəmɛ̂ tə̂.

¹⁵ Ndərəng bbokənɛn nəənn, bbo daw turaje Makəturu-Ndu lə Mɔyijə a, tokə nɛ̂n kə̂ marə kubbu aw ɔku ddəw nɛ̂n-gərə ləde bbay.

¹⁶ A bbo dəw təl kə rɔ Əbbə-dəwje tə̂ a, ta-kubbu le ɔru kə ddang.

¹⁷ Mba Əbbə-dəwje to Ndil. Lo kə̂ Ndil lə Əbbə-dəwje to tə̂ a, dəw dda bbərə tə̂ ang ngaa.

¹⁸ Jeje tɔyn kə̂ marə nɛ̂n ɔnn kəmje ang, ndoko lə Əbbə-dəwje aw təəl rɔje tə̂ tokə lə nɛ̂n-koo-rɔ. N̂-turuje narə n-to tokə laa, jaw ndoko kə kete kete tokə lə Əbbə-dəwje kə̂ to Ndil.