2 Kɔrɛntinyɛje 2 - Dɔnɔn kə̂ Siki: Tar kə̂ aw arə təbbə

¹ Mba yeenn bba, moo maji ta təl kaw rɔse tə̂ ang, mba rɔse a təl nəəlse ang.

² Mba sese â asəje ta dda karə rɔm nəələm. Â bbo m-dda marə rɔse nəəlse ang a, nân bba a dda karə rɔm nəələm bbay wa?

³ Mba yeenn bba, m-dda nɛ̂n makəturu kə̂ keteenn le marəse, mba bbo m-tee rɔse tə̂ a, â ddaje karə rɔm nəələm ang. Mba sese â, â kasəje ta dda karə rɔm nəələm. M-gərə kə majɛ̂ to, rɔ-nəəl ləm to rɔ-nəəl ləse tɔyn tɔ.

⁴ Makəturu kə̂ kete le, m-dda marəse kə mə-kɔn kə maann-nɔn, wurum a ta ti. Ta dda karə rɔse nəəlse ang bba m-dda nɛ̂n makəturu le marəse ang. M-dda karə ə-gərəje to m-ndikise nya.

Tar kɔru tar dɔ dəw tə̂

⁵ Bbo marə dəw dda arə rɔ nje-marɛ̂ nəəle ang a, to əman â n̂-dda səm ang. To sese tɔyn â narə rɔse nəəlse ang. A ta kɔju tar ang a, n̂-dda narə rɔ marə dəwje horose tə̂ nəəlde ang njaa.

⁶ Â bbo dəwje nya horose tə̂ gangəje sariya dɔɛ̂ tə̂ mban a, asə.

⁷ Mba yeenn bba, maji karə ɔruje tar dɔɛ̂ tə̂ ngaâ arɛ̂je ndəjə arə məɛ̂ wul. Baann ang a, â ddaje karə rɔɛ̂ nəəle ang uta dɔɛ̂.

⁸ Yeenn a, m-dujuse karə ə-tɔjɛ̂je ndiki kə̂ ə-ndikeje.

⁹ M-dda makəturu le marəse tɔ ta nan nɛ̂n se koo se ə-naynje aw ddaje nɛ̂nje tɔyn kə̂ m-dujuse karə ə-ddaje le njaa wa?

¹⁰ Bbo ɔruje tar dɔ dəw tə̂ a, əman kara mɔru tar dɔɛ̂ tə̂ tɔ. Bbo mɔru tar dɔ dəw tə̂ le a, tar tɔyn kə̂ mɔru dɔɛ̂ tə̂ le, mɔru mba tar ləse kəm Kristə tə̂.

¹¹ Yeenn bba ta kinya karə Satan taa ddəw ləje ang. Mba n-gərə nɛ̂n kə̂ naw sangə kə majɛ̂.

Pɔl aw Torowas

¹² Kar tə̂ kə̂ m-tee tɔkə bbe tə̂ kə̂ Torowas ta kila mbər Tar kə̂ Maji lə Kristə le, Əbbə-dəwje ɔru ddəw arəm kə̂ majɛ̂ njaa.

¹³ A wurum oso nangə̂ ang, mba minga ngokɔnʼm Titə ang. Yeenn bba minya dəwje kə̂ Torowas le a maw Maseduwann.

Jeju-Kristə tətə ddɔ

¹⁴ Jarəje wooyo Lubba, kə̂ dda arə ddəw tə̂ lə Kristə jee horo dəwje tə̂ kə̂ aw ɔsuje nja kə go kulɛ̂ go Kristə tə̂ kə̂ tətə ddɔ le. Ddəw tə̂ ləje, narə dəwje gərəje Kristə loje tə̂ tɔyn, tokə yambo kə̂ banyɛ̂ taa lo tɔyn.

¹⁵ Kəm Lubba tə̂, n-toje tokə lə bayn yambo lə Kristə horo dəwje tə̂ kə̂ aw ingaje kaji ddəm horo dəwje tə̂ kə̂ aw naynje kə kɔrɔ̂ ddəm.

¹⁶ Ənga marɛ̂je, bayn yambo le to bayn yo kə̂ aw aw kə dəw karə oy. A ənga marɛ̂je to bayn təbbə kə̂ aw aw kə dəw karə inga təbbə. Nân bba a kasə ta dda kula be nəənn wa?

¹⁷ Mba dəwje nya ddaje tar lə Lubba to nɛ̂n-kinga narɛ ləde. A jeje n-toje tokə ləde ang. Jula nɛ̂n naan tə̂ ang. Lubba â ulaje arə jaw pa tar le nɔn Lubba tə̂, ddəw mə-kâra tə̂ kə̂ n-dda kə Kristə.