2 Kɔrɛntinyɛje 12 - Dɔnɔn kə̂ Siki: Tar kə̂ aw arə təbbə

Nɛ̂nje kə̂ Lubba tɔju kə ddaka arə Pɔl

¹ To tar ləm ta kunda gum wa? Yeenn to marə nɛ̂n kâra ang njaa. A bbasinɛn mâ pa tar nɛ̂nje kə̂ moo tokə lə ninjeenn kə tar nɛ̂nje kə̂ Əbbə-dəwje tɔju kə ddaka arə moo.

² Dda bbal dɔku gire sɔ ngaa, m-gərə marə dəw kə̂ unn məɛ̂ arə Kristə kə̂ Lubba unnɛ̂ aw saa ndərəng ddutu dara tə̂. Se ndile â naw nɛ̂n wase nunnɛ̂ kə da-rɔɛ̂ tɔyn njaa wa kara m-gərə ang. Lubba â gərə.

³ Se Lubba unnɛ̂ kə da-rɔɛ̂ njaa tɔyn wase nunn ndile a ninya da-rɔɛ̂ kara m-gərə ang, Lubba â gərə.

⁴ Dəw le, Lubba unnɛ̂ aw nɛ̂n paradis tə̂ arə noo marə tarje kə̂ dəw a kuman ta pa pin ddəm darə ddəw dəw karə pa ang ddəm.

⁵ Mâ kunda gum mba dəw nəənn le, a əman, singam kə̂ goto â mâ kunda gum mbɛɛ̂.

⁶ Bbo m-ndiki ta kunda gum a, mâ to nje-wooy ang, mba tar kə̂ tɔkɔrɔ njaa â mâ pa. A mâ dda yeenn ang, mba karə dəwje inje pitimje a inyaje kula kə̂ maw dda wase tar kə̂ maw pa.

⁷ Nɛ̂nje kə̂ Lubba tɔju kə̂ ddaka arə moo le to nɛ̂nje kə̂ maji kə̂ dum dɔ dəw. Mba yeenn bba, karə moo rɔm bo nya ang a, dula marə nɛ̂n rɔm tə̂, Satan ula marə dəw laa karə undam, bba karə moo rɔm bo nya ang.

⁸ M-duju Əbbə-dəwje gɔl mota karə nɔru nɛ̂ɛnn le rɔm tə̂ kə ddang.

⁹ A n̂-pa narəm nan: «Mə-maji kə̂ m-dda səi njaa asi. Kar tə̂ kə̂ singa dəw goto bba maw tɔju singa-mɔngu ləm.» Yeenn bba, m-ndiki nya ta kunda gum mba singam kə̂ goto, bba karə singa-mɔngu lə Kristə to dɔm tə̂.

¹⁰ Mba yeenn bba, rɔm nəələm nya mə karje tə̂ kə̂ singam goto, mə nɛ̂n-tajije tə̂, mə nɛ̂n-singaje tə̂, mə ndooje tə̂ kə̂ dəwje aw ulaje kəmʼm tə̂, mə nɛ̂n-bbəəlje tə̂ kə̂ aw ingamje ɔju dɔ Kristə. Mba, mə kar tə̂ kə̂ singam goto bba maw mubba singa.

Pɔl aw əjə tar mba njê-mə-kunnje kə̂ Kɔrɛntə

¹¹ Ə-ddaje arə m-ddee tokə nje-wooy ngaa. Sese â to tar ləse ta pa tar ləm maji. Mba le m-to marə nɛ̂n ang kara, njê-kaw-kulaje kə̂ ooje rɔde to nutamje le, utamje kə̂ marə nɛ̂n kâra ang.

¹² M-tɔ wurum mə nɛ̂nje tə̂ tɔyn kə̂ ingamje, m-dda nɛ̂nje kə̂ dum dɔ koo kə nɛ̂n-mɔrije dang dang bbeê ləse. Yeenn tɔju to m-to nje-kaw-kula njaa.

¹³ Ddi â kəsə Egilisije ingaje utase wa? M-dda bba m-ddee to nɛ̂n-koto dɔse tə̂ ang. Â bbo yeenn to nɛ̂n kə̂ gatə gatə ang â m-dda a, ɔruje tarɛ̂ dɔm tə̂!

¹⁴ M-nayn ngɔsi baa ngaa ta kaw rɔse tə̂, to gɔl mota laa ngaa. A mâ kaw to nɛ̂n-koto dɔse tə̂ ang. Mba sese â maw sangəse bbo nɛ̂n-kinga ləse ang. To tar lə ngannje ta ngəm nɛ̂n dang mba koto nɛ̂n njê-kujude ang, to tar lə njê-kujude ta ngəm nɛ̂n dang mbade.

¹⁵ Əman, m-ndiki ta tuju nɛ̂nje ləm ddəm ta tuju singam ddəm tɔyn mbase. Â ndikimje nya ang, mba ndiki kə̂ m-ndikise nya le wa?

¹⁶ M-to nɛ̂n-koto dɔse tə̂ ang njaa. A marə dəwje paje nan, m-to nje-gusu, m-dda marə osoje jim tə̂ ddəw gusu tə̂.

¹⁷ Dəwje kə̂ mulade marəse le, marə marɛ̂ kâra horode tə̂ ərəse usase wa?

¹⁸ M-duju Titə nya karə aw rɔse tə̂, ne kə marə ngokɔnje kâra. Titə le ərəse usase wa? Əman je saa joo kəm n-dda nɛ̂n kə kəjə kə̂ kâra baa ddəm junn ddəw kə̂ kâra baa ddəm.

¹⁹ Aw əjəje ləw baa to jaw ko rɔje nɔnse tə̂ wa? Baann ang. Kəm Lubba tə̂, ddəw tə̂ lə Kristə â jaw pa tar nəənn. See ngakɔnje kə̂ n-ndikise nya, jaw pa tarje nəənn tɔyn jarəse bba karə mə-kunn ləse ubba singa.

²⁰ M-bbəəl mba kin karə m-tee bbeê ləse a, ə-toje dang kə ye kə̂ m-ndiki ddəm əman kara m-to dang kə ye kə̂ ə-ndikije le ddəm. Ngaâ, m-bbəəl mba kin karə nɛ̂nje kə̂ maji ang to horose tə̂. Nɛ̂nje tokə: Koo-ta-naan ang, kunda-mə kə naan, dda wungu, nɛ̂n-dda kə̂ ta kuta nɛ̂n naan, nanɛn kə naan, tura tarje baa baa, koo-rɔ-bo kə nɛ̂nje kə̂ ngabula.

²¹ M-bbəəl mba kin karə maw ta koose kə̂ guku a, Lubba ləm ila rɔ-kul kəmʼm tə̂ nɔnse tə̂. Ngaâ, karə m-nɔn, mba dəwje nya horose tə̂ kə̂ naynje ddəw majang tə̂ tokə ye kə̂ ləw, ddəw nɛ̂n-yərəwje tə̂, ddəw kaya tə̂ kə ddəw lo-to-majang tə̂.