2 Kɔrɛntinyɛje 11 - Dɔnɔn kə̂ Siki: Tar kə̂ aw arə təbbə

Tar lə Pɔl kə njê-kaw-kulaje kə̂ tɔkɔrɔ ang

¹ Ddəw to a, ə-tɔje wurse arəmje, mba mâ pa tar tokə nje-wooy ngaji. Tɔkɔrɔ, ə-tɔje wurse arəmje.

² Maw mayn jangə dɔse tə̂ tokə Lubba aw ayn jangə dɔse tə̂ le. M-dda mɔrɔ ləse marə dingaw kâra baa kə̂ to Kristə. M-ndiki ta ddee kə se nɔɛ̂n tə̂ tokə ngonn mandə kə̂ gərə ngaw ang bbay kə̂ aw ngəm rɔɛ̂.

³ A tokə li ərə Ɛbə le, m-bbəəl mba karə kəjə ləse təl turu ngaâ karə awje ddəw əw kə Kristə kə̂ unnje rɔse tɔyn arɛ̂je kə mə-kâra le.

⁴ Mba bbo marə dəw ddee aw ila mbər tar lə marə Jeju dang kə Jeju kə̂ n-pa tar laa jarəse le wase ə-taaje marə ndil dang kə Ndil kə̂ ingaje dɔngɔr le wase n̂-ddee kə marə tar kə̂ maji dang kə ye kə̂ ə-taaje dɔngɔr le a, aw ndikije tə̂ saa kə majɛ̂.

⁵ Məjə to njê-kaw-kulaje kə̂ ooje rɔde bo nya nəənn le utamje kə marə nɛ̂n kâra ang.

⁶ M-gərə ta pa tar karə kura ang njaa. A nɛ̂n kə̂ ɔju dɔ nɛ̂n-gərə, tarɛ̂ to dang. N-tɔjuse nɛ̂n-gərə le ddaka baa mə nɛ̂nje tə̂ tɔyn.

⁷ M-dda rɔm tɛn baa bba ta dda karə sese ə-ddeeje to dəwje kə̂ bo ngaâ mila mbər Tar kə̂ Maji lə Lubba baa marəse. A yeenn to majang â m-dda wa?

⁸ M-taa nɛ̂n lə marə Egilisije tɔyn jide tə̂, mba dukamje bba karə m-dda nɛ̂n kula horose tə̂.

⁹ Ngaâ, kar tə̂ kə̂ mee nɛ̂n rɔse tə̂ le, bbo m-ndiki ta kinga marə nɛ̂n a, m-duju nɛ̂n ji dəw tə̂ kâra ang. Mba ngakɔnʼmje kə̂ inje Maseduwann ddeeje kə nɛ̂nje kə̂ dum arəmje. M-dda bba karə m-ddee to nɛ̂n-koto dɔse tə̂ ang. Mâ nayn nɛ̂n baann nyɔm.

¹⁰ Ddəw tar tə̂ kə̂ tɔkɔrɔ lə Kristə kə̂ to məm tə̂ le, m-pa nan: Dəw kâra a kɔkəm ddəw karə munda gum kə tar nəənn nangə tə̂ kə̂ Akay ang.

¹¹ M-pa tar baann mba ddi wa? Mba to ndiki â m-ndikise ang wa? Lubba gərə to m-ndikise.

¹² Nɛ̂n kə̂ maw dda nəənn, mâ dda bbay, bba karə njê kə̂ aw sangəje marə nɛ̂n ta kunda nɛ̂n gude, to daw ddaje kula tokə ləje le ingaje marə nɛ̂n ta kunda nɛ̂n gude ang.

¹³ Dede, n̂-toje to njê-kaw-kulaje kə̂ tɔkɔrɔ ang. N̂-toje to njê-ngəmje kə̂ ddaje rɔde to njê-kaw-kulaje lə Kristə.

¹⁴ Yeenn to nɛ̂n kə̂ siki ang. Satan njaa kara dda rɔɛ̂ to anjə kə̂ lo-karɛ tə̂.

¹⁵ Yeenn bba bbo njê-kulaje lə Satan ddaje rɔde to njê-kulaje kə̂ nɛ̂n-dda ləde to gatə gatə a, to marə nɛ̂n kə̂ siki ang tɔ. Nɛ̂n kə̂ a kingade ddutu ndɔ tə̂ ləde a kasə kəm kula-ddade.

Ndooje kə̂ Pɔl oo

¹⁶ M-təl m-pa bbay: Maji karə dəw oom to nje-wooy ang. Wase bbo oomje tokə baann a, maji karə ə-ndikije tə̂ karə əman njaa kara munda gum ngaji.

¹⁷ Tar kə̂ m-pa nəənn, Əbbə-dəwje â ndiki karə m-pa ang. M-pa tokə dəw kə̂ wooy ddɛɛ̂, mba m-gərə to mâ kinga marə nɛ̂n ta kunda nɛ̂n gum.

¹⁸ Dəwje nya aw undaje gude ddəw nɛ̂n tə̂ kə̂ da-rɔ tə̂. Mba yeenn bba, əman kara mâ kunda gum tɔ.

¹⁹ Sese kə̂ ə-toje to njê-kəm-karɛje le, aw ndikije tə̂ ta tɔ wurse koo nɛ̂n tarje ləde!

²⁰ Aw ə-tɔje wurse arəje daw ddase to bbərəje, daw taaje nɛ̂nje ləse baa, daw bbokose, daw doose to dəwje ang ngaâ daw tundaje kəmse!

²¹ To rɔ-kul ləm ta pa: Moo a, tokə nɛ̂n kə̂ n-toje to njê-yɔɔje njaa nyɔm. M-pa tar tokə nje-wooy, m-pa nan: Bbo dəw tay unda gue mba marə nɛ̂n a, əman kara, mâ tay kunda gum tɔ.

²² N̂-toje to Ebərəje, a əman kara m-to Ebərə tɔ. N̂-toje to dəwje kə̂ Ijarayɛl, a əman kara m-to dəw kə̂ Ijarayɛl tɔ. N̂-toje to ngaka Abaraham, a əman kara m-to ngoka Abaraham tɔ.

²³ N̂-toje to njê-kulaje lə Kristə wa? Mâ pa tar tokə nje-wooy: M-to nje-kula lə Kristə kə̂ utade bbay. M-dda kula mutade, dilam kəy-kula tə̂ gɔl banya utade, n̂-tundam dutade ngaâ maw ta yo tə̂ ngɔsi mutade.

²⁴ Gɔl min njaa, Jiipije tundamje ndəy dɔmota gire jikara.

²⁵ Gɔl mota njaa dəwje tundamje kə kakə, dəwje tilamje kə ər gɔl kâra, tɔkə to dii səm gɔl mota, m-nayn mə maann tə̂ kə əsindɔɔ ndərəng lo arɛ gɔl kâra.

²⁶ Njaje tə̂ ləm kə̂ maw nja, nɛ̂n-singaje ingam: Baje a ta kuwam. Njê-bbokoje, ngakɔm Jiipije kə dəwje kə̂ toje to Jiipije ang a ta tɔləmje. Nɛ̂n-singaje ingamje mə tɔkə bbeje tə̂, mə kɔr tə̂, dɔ ba-katəje tə̂, ngakɔnʼmje kə̂ tɔkɔrɔ ang aw ddaje səm singa.

²⁷ Maw dda kulaje kə̂ aw ɔru singam. Nya njaa bbi ɔru kəm ang. Bbo nɛ̂n-kusa kə kunda maann aw tɔləm. Nya njaa maw mɔku rɔm nɛ̂n-kusa mba duju Lubba. Kul tɔləm ddəm kubbu dum ddəm.

²⁸ Mâ pa kəsə nɛ̂nje ang. A tar kə̂ uwa wurum nya to tar lə Egilisije tɔyn.

²⁹ Bbo marə dəw singɛ̂ goto a, əman kara moo rɔm to mee kə singa ang tɔ. Bbo mə-kunn lə marə dəw oso a, tarɛ̂ sanʼm nya.

³⁰ Bbo ta kunda gum a, singam kə̂ goto a mâ kunda nɛ̂n gum.

³¹ Lubba kə̂ Bɔ Əbbə-dəwje Jeju, kə̂ dəwje aw piteje kə ndɔ kə ndɔ gərə to maw mərə ngəm ang.

³² Bbe tə̂ kə̂ Damas, ngonn mbay kə dda kula kə ri tɔkə mbay Aretas unda dəwje ta ddəwje tə̂ kə̂ daw dandəje nɛ̂n mə bbe le karə duwam.

³³ A dilam mə karɛ tə̂, dulam kə kəm lo kar ndoko tə̂, darə m-ddisi, ngaâ m-tee jia tə̂ mayn.