2 Kɔrɛntinyɛje 10 - Dɔnɔn kə̂ Siki: Tar kə̂ aw arə təbbə

Pɔl pa tar kula laa

¹ Əman Pɔl, maw dujuse marə nɛ̂n kə ri Kristə kə̂ wul pee ddəm to nje-mə-maji ddəm. Aw paje nan, bbo misi horose tə̂ a m-wul, â bbo misi ddəw əw kə se a, maw nya dɔse tə̂ nya.

² M-walse nya: Dang bba ə-ddaje arə bbo m-tee horose tə̂ a, m-nya dɔse tə̂ ang. Mba marə dəwje paje nan, kulaje kə̂ jaw dda to kulaje kə̂ ddəw da-rɔ tə̂ baa. Yeenn bba m-ndiki ta kin kə de karə ngəng.

³ N-toje to dəwje ddəw da-rɔ tə̂ njaa, a jaw ddaje ddɔ ddəw da-rɔ tə̂ ang.

⁴ Mba nɛ̂n-ddɔje kə̂ jaw ddɔje nɛ̂n toje to nɛ̂n-ddɔje kə̂ dəw â dda ang. Singa nɛ̂n-ddɔje le in rɔ Lubba tə̂ mba guru nɛ̂n ndokoje kə̂ ngəng, jaw tujuje kəjəje kə̂ toje kə dɔgɔlɛ̂ ang.

⁵ Jaw tujuje tarje tɔyn kə̂ dəwje kə̂ ooje rɔde bo nya aw paje mba kɔku nɛ̂n ddəw dəw karə gərə Lubba. Jaw juwa kəjəje lə dəwje tɔyn bbərə tə̂ karə dooje ta Kristə.

⁶ Bbo sese kə̂ Kɔrɛntə ooje tɛɛ̂ mə nɛ̂nje tə̂ tɔyn a, n-to ngɔsi ta gangə sariya dɔ dəwje tə̂ tɔyn kə̂ mbətəje ta koo tɛɛ̂.

⁷ Maji karə aaje nɛ̂n kə̂ to kəmse tə̂ ddaka baa nəənn ooje: Bbo dəw əjə to n̂-to dəw lə Kristə a, maji karə n̂-gərə kə majɛ̂ to, jeje kara n-to dəwje lə Kristə tɔ.

⁸ Əbbə-dəwje arəje singa karə n-dda jarə ubbaje singa, bbo ta dda karə singase ɔru ang. Yeenn bba bbo munda nɛ̂n gum uta dɔɛ̂ ngaji kara, rɔm a wul ang.

⁹ M-ndiki karə oomje to dəw kə̂ aw ula bbəəl məse tə̂ ddəw makəturuje tə̂ kə̂ maw mula nɛ̂n marəse le ang.

¹⁰ Mba marə dəwje paje nan: Makəturuje lə Pɔl ngəng nya ddəm mɔngu nya ddəm. Â bbo ne njaa kə da-rɔɛ̂ nisi horoje tə̂ a, singɛ̂ goto ddəm turu tar kə̂ naw pa goto ddəm.

¹¹ Maji karə dəw kə̂ aw pa tar tokə baann le gərə bba: Kar kə̂ n-goto horose tə̂ le, tarje kə̂ n-dda makəturu tə̂ ngəng, a bbo n-ddee horose tə̂ a, ja dda kula karə ngəng tokə tar ləje le tɔ.

¹² Mba marə dəwje ooje rɔde bo nya. A ja tay sangə mba kasə kə de naan ang ddəm ta kunn rɔje kɔju nɛ̂n de ang ddəm. Dede njaa dunnje nɛ̂n dɔju nɛ̂n rɔde ngaâ dede njaa dunn rɔde dɔju nɛ̂n kəsə dəwje. N̂-toje to mbəje.

¹³ Jeje, ja kunda guje karə nday dɔɛ̂ ang. Ja kunda guje tee nɛ̂n lo tə̂ kə̂ Lubba ɔju arəje ta dda kula tə̂, ja dda kula le ndərəng tee nɛ̂n rɔse tə̂.

¹⁴ Tee kə̂ n-tee rɔse tə̂ le, nayn to n-nday ngangə lo kə̂ Lubba tɔjuje le ang. Mba jeje njaa jaw ndərəng rɔse tə̂ dɔngɔr kə Tar kə̂ Maji lə Kristə.

¹⁵ Kulaje lə marə dəwje â junda nɛ̂n guje jarə nday dɔɛ̂ ang. A junda məje ta bbo mə-kunn ləse bo kə kete kete a, ja kasə ta dda karə kula ləje kara aw kə kete kete horose tə̂. A ja nday ngangə lo kə̂ n̂-tɔjuje le ang.

¹⁶ Ja kaw kila mbər Tar kə̂ Maji ndərəng nday nɛ̂n bbe ləse, bbo ja kunda guje kə kulaje kə̂ dəwje kə̂ dang â ddaje loje tə̂ kə̂ n̂-gangə darəde le ang.

¹⁷ Makəturu lə Lubba pa nan: «Bbo marə dəw ndiki ta kunda gue a, unda gue kə kula kə̂ Əbbə-dəwje dda.»

¹⁸ Dəw kə̂ maji kəm Əbbə-dəwje tə̂, to dəw kə̂ ne njaa naw pa tar kə̂ maji maji dɔ rɔɛ̂ tə̂ ang. Dəw kə̂ Əbbə-dəwje njaa pa tar dɔɛ̂ tə̂ maji bba.