2 Kɔrɛntinyɛje 1 - Dɔnɔn kə̂ Siki: Tar kə̂ aw arə təbbə

Tar lapiya lə Pɔl

¹ Əman Pɔl kə̂ Lubba ndiki tə̂ karə m-ddee to nje-kaw-kula lə Jeju-Kristə, əman kə ngokɔnje Timɔte, n-dda makəturu nəənn jarə Egilisi lə Lubba kə̂ to Kɔrɛntə ddəm jarə dəwje lə Lubba kə̂ isije nangə tə̂ kə̂ Akay tɔyn ddəm.

² Maji karə Bɔjeje Lubba ddəm Əbbəjeje Jeju-Kristə ddəm n̂-ddaje kə se mə-maji ngaâ darəje məse wul lɔm.

Pɔl ɔsu gaji Lubba

³ Jɔsuje gaji Lubba kə̂ to Bɔ Əbbəjeje Jeju-Kristə. N̂-to Bɔ kə̂ aw oo kəm-to-ndoo lə dəwje ddəm n̂-to Lubba kə̂ aw wul mə dəwje mə nɛ̂nje tə̂ tɔyn ddəm.

⁴ Naw wul məje mə nɛ̂n kəm-to-ndooje tə̂ kə̂ aw ingaje, karə ddəw məje tə̂ kə̂ n̂-wul le, jasəje ta wul mə dəwje tɔyn kə̂ nɛ̂n kəm-to-ndooje dang dang aw ingade tɔ.

⁵ Ddəw kâra baa tokə jaw joo ndoo nya kə Kristə le, Kristə kara aw dda arə məje aw wul nya tɔ.

⁶ Â bbo jaw joo ndoo a, jaw dda karə məse wul ngaâ karə ingaje kaji. Â bbo məje wul a, to mba karə məse wul tɔ. Yeenn le aw dda arə asəje ta tɔ wurse mə nɛ̂n kəm-to-ndooje tə̂ kə̂ kâra baa kə̂ aw ingajeje le.

⁷ Jaw junda məje dɔse tə̂ nya. Mba n-gərə to ndoo kə̂ jaw joo le ooje kə je tɔ arə məse a wul kə je tɔ.

⁸ Ngakɔnʼmje, n-ndiki ta karə ə-gərəje tar ndoo kə̂ joo nangə tə̂ kə̂ Aji le. Dula kəmje ndoo tə̂ darə uta singaje arə jəjə to ja nayn kəm baa ang.

⁹ Jəjə to n̂-gangə sariya-yo dɔje tə̂ mban. A nɛ̂ɛnn to tokə baann bba karə jundaje məje dɔje tə̂ jeje njaa ang. A junda məje dɔ Lubba tə̂ kə̂ aw ndol dəwje kə̂ oyje.

¹⁰ Ne â n̂-tee kə je ta yo tə̂ arə nâ təl tee kə je ta yo tə̂ kə̂ baann bbay. Baann njaa, junda məje dɔɛ̂ tə̂ to nâ tee kə je tɛɛ tə̂ bbay.

¹¹ Sese njaa kara aw umanjeje ddəwe tə̂, ddəw duju tə̂ kə̂ aw dujuje Lubba mba tar ləje. Yeenn a, Lubba a kila tar-duju tə̂ lə dəwje kə̂ banya kə̂ aw dujeje mba tar ləje le. Nâ karəje nɛ̂ɛnn kə mə-maji laa ngaâ dəwje nya a karɛ̂je wooyo mbaje.

Pɔl inya ta kaw Kɔrɛntə

¹² Nɛ̂n kə̂ jaw junda nɛ̂n guje to kəjə ləje kə̂ aw ɔru naji ləje pa-nja tə̂ ləje dɔ nangə tə̂ nəənn, uta tɔyn, pa-nja ləje horose tə̂. Lubba dda arə n-nja horose tə̂ kə mə-nda kayn ddəm jula nɛ̂n naan tə̂ ang ddəm. Nɛ̂ɛnn le to ddəw kəm-karɛ tə̂ lə dəwje ang, to ddəw mə-maji tə̂ lə Lubba.

¹³ N-dda nɛ̂n kə̂ dang makəturuje tə̂ jarəse ang. To nɛ̂nje kə̂ aw turaje ngaâ asəje ta gərə kandɛ̂. Munda məm to a gərəje kandɛ̂ tɔyn njaa.

¹⁴ Mba ə-gərəje ngaji mban to n-to nɛ̂n-kunda guse, tokə sese â toje to nɛ̂n-kunda guje ndɔ tə̂ kə̂ Əbbəjeje Jeju a təl ddee le.

¹⁵ M-gərə to nɛ̂ɛnn a to tokə baann njaa. Ngaâ m-ndiki ta kaw rɔse tə̂ kete, karə tar kə̂ maji to dɔse tə̂ to gɔl joo laa.

¹⁶ Goe tə̂ a, mâ kin rɔse tə̂ kaw nangə tə̂ kə̂ Maseduwann. Ngaâ bbo min Maseduwann le a, mâ təl rɔse tə̂ bbay karə umanʼmje kaw tə̂ ləm kə mba tə̂ nangə tə̂ kə̂ Jude.

¹⁷ Bbo m-ndiki ta dda tokə baann a, to nɛ̂n-dda ndam baa wa? Wase nɛ̂nje kə̂ m-ndiki ta dda le toje to nɛ̂nje kə̂ da-rɔ tə̂ bba karə m-təl m-pa nan: «An än» ddəm «Ân an» ddəm wa?

¹⁸ Lubba njaa kara gərə to tar kə̂ n-pa jarəse le to «An än» ddəm «Ân an» ddəm ang.

¹⁹ Mba Jeju-Kristə Ngonn lə Lubba, kə̂ əman kə Silas kə Timɔte, jila mbər tar laa bbe ləse le, n̂-ddee ta pa nan «An än» ddəm «Ân an» ddəm ang. Tar laa tɔyn njaa to «An än» dɔrɔ.

²⁰ Ddəw tə̂ lə Jeju le â Lubba pa nan «An än» ta karə nɛ̂n je nɛ̂nje tɔyn kə̂ ne njaa nunn ndue ta karəje le. Ddəw tə̂ laa tɔ a, jeje kara n-pa nan «Amɛnn» jarə Lubba ta kɔsu nɛ̂n gajɛ̂.

²¹ Lubba njaa dda arə jeje kə sese tɔyn, jubbaje singa ddəw mə-kâra tə̂ kə̂ jaw ddaje kə Kristə le ngaâ nundaje dang.

²² Nula Ndil-mə-nda məje tə̂ to əndaji laa, ta nginan nɛ̂n kəsə nɛ̂nje kə̂ n̂-gɔl mba tar ləje.

²³ Kəm Lubba tə̂, m-pa tar kə̂ tɔkɔrɔ marəse. Bbo mərə ngəm a, narə moy kə ddang. M-təl maw Kɔrɛntə ang, mba m-ndiki ta kula kəmse ndoo tə̂ ang.

²⁴ To kɔn bba jaw jɔn dɔse ddəw mə-kunn tə̂ ləse ang. Uwaje mə-kunn ləse arəje ngəng mban. Yeenn bba n-ndiki ta karə jeje ddəm sese ddəm n-ddaje kula kə naan jarə rɔse nəəlse.