1 Tesalonisinyɛje 5 - Dɔnɔn kə̂ Siki: Tar kə̂ aw arə təbbə

Ndɔ ddee lə Əbbə-dəwje

¹ Ngakɔnje, nɛ̂n kə̂ ɔju dɔ kar wase ndɔ ddee lə Əbbə-dəwje le, to nɛ̂n kə̂ ta dda makəturu tə̂ kula nɛ̂n karəse ang ngaa.

² Mba sese njaa kara ə-gərəje kə majɛ̂: Ndɔ lə Əbbə-dəwje a ddee tokə ndɔ ddee lə nje-bboko til tə̂.

³ Kar kə̂ dəwje a paje nan: «Jisi kə mə-wul-lɔm kə majɛ̂ njaa ngaa. Jasə ta njaa kə bbəəl ang ngaa.» A karɛ̂ tə̂ənn njaa, njangə baa a, tuju a koso dɔ dəwje tə̂ le tokə ndo kə̂ ɔsu dɛnɛ̂n ngaâ dâ teeje tɛɛ tə̂ ang.

⁴ A see ngakɔnje, sese ə-naynje lo ndul tə̂ ang. Yeenn a, ndɔ le a kɔsuse busu tokə lə nje-bboko ang.

⁵ Sese tɔyn ə-toje to dəwje kə̂ aw njaje lo-karɛ tə̂. Ə-toje to dəwje kə̂ aw njaje karâ. Jeje n-to dəwje kə̂ aw njaje mə til tə̂ ang ddəm aw njaje lo ndul tə̂ ang ddəm.

⁶ Yeenn a, maji karə n-tibbije tokə lə kəsə dəwje ang. Maji karə bbi ɔru kəmje ang ta n-gərəje dɔjije.

⁷ Dəwje kə̂ aw tibbije, aw tibbije til tə̂. Ngaâ njê kə̂ aw ayje koto arə aw ddade, aw ayje til tə̂.

⁸ A jeje kə̂ n-to dəwje kə̂ aw nja karâ le, maji karə n-gərəje dɔjije. Maji karə mə-kunn kə ndiki toje rɔje tə̂ tokə lə kubbu ddɔ. Məje kə̂ junda ta kinga kaji le maji karə to dɔje tə̂ tokə lə əjɔkudɔ-ddɔ.

⁹ Mba Lubba mbərəje karə wungu laa oso dɔje tə̂ ang. N̂-mbərəje karə jinga kaji ddəw tə̂ lə Əbbəjeje Jeju-Kristə.

¹⁰ Kristə le oy mba tar ləje bba karə, le jisije kəm baa wase joyje njaa kara, jisije kəm baa saa ndɔ tə̂ kə̂ nâ ddee.

¹¹ Yeenn bba, maji karə ə-ndəjəje naan, ə-ddaje arəje njê-marəse ubbaje singa ddəw kâra baa tokə aw ddaje mban le.

Dɔbɔyn ndəjə kə tar lapiya

¹² Ngakɔnje, n-dujuse bbay karə ə-bbəəlje dəwje kə̂ aw ddaje kula horose tə̂, dede kə̂ Əbbə-dəwje undade karə n̂-tɔjuse ddəw, karə n̂-ndəjəse le.

¹³ Maji karə oojede maji kəmse tə̂ ddəm ə-ndikijede ddəm ɔju dɔ kula ləde le. Maji karə isije kə mə-wul-lɔm horose tə̂.

¹⁴ Ngakɔnje, n-dujuse nya karə ə-ndɔruje mbi dəwje kə̂ aw ddaje nɛ̂nje kə̂ to kə dɔgɔlɛ̂ ang. Maji karə ə-ddaje arəje dəwje kə̂ rɔde oy njururu təl ubbaje singa. Ngaâ umanje dəwje kə̂ mə-kunn ləde sangə ang bbay ddəm ə-tɔje wurse arəje dəwje tɔyn ddəm.

¹⁵ Aaje kə majɛ̂ arə dəw kâra ila barə majang kə̂ dəw dda saa ang. A, maji karə ə-sangəje ddəw ta dda maji horose tə̂ ddəm ta dda maji kə dəwje tɔyn ddəm.

¹⁶ Ndɔ tɔyn njaa, maji karə rɔse nəəlse,

¹⁷ maji karə ə-dujuje Lubba kə kar tɔyn

¹⁸ ngaâ mə nɛ̂nje tə̂ tɔyn, arəje wooyo Lubba, mba to nɛ̂nje kə̂ Lubba ndiki karə ə-ddaje mba mə-kâra kə̂ ə-ddaje kə Jeju-Kristə.

¹⁹ Maji karə ɔkuje ddəw Ndil-mə-nda karə dda kula ang.

²⁰ Maji karə ə-mbətəje mbər tarje lə Lubba kə̂ daw dila le ang.

²¹ Nɛ̂nje tɔyn njaa, maji karə ə-tənnje kə majɛ̂ ooje bba ta ə-ngəmje yeje kə̂ maji.

²² Majangje dang dang tɔyn njaa, maji karə ə-ngəmje rɔse ddəwe tə̂.

²³ Maji karə Lubba njaa kə̂ to nje-karə mə-wul-lɔm dda arə ə-ddeeje maji tɔyn. Maji karə n̂-ngəm da-rɔse tɔyn, kəjə ləse, kəwn ləse kə rɔse, narə ndɔ ddee lə Əbbə-dəwje Jeju-Kristə a, tar kâra to dɔse tə̂ ang.

²⁴ Ne kə̂ n̂-bbarse le naw dda nɛ̂n kə turu ndue. Ne â nâ dda nɛ̂njeenn.

²⁵ Ngakɔnje, maji karə ə-dujuje Lubba mbaje tɔ.

²⁶ Ə-ddaje lapiya ngakɔnje tɔyn to lapiya kə̂ maji tɔyn.

²⁷ M-dujuse nya kə ri Əbbə-dəwje karə n̂-tura makəturu nəənn darə ngakɔnje tɔyn.

²⁸ Maji karə mə-maji lə Əbbəjeje Jeju-Kristə nayn kə se.