1 Tesalonisinyɛje 4 - Dɔnɔn kə̂ Siki: Tar kə̂ aw arə təbbə

Pa-nja kə̂ maji kəm Lubba tə̂

¹ Kəsə tar ləje tokə be: Ngakɔnje, n-tɔjuse ddəw kə̂ ta nja nɛ̂n karə nəəl kəm Lubba tə̂. To nɛ̂n kə̂ aw ddaje mban. A n-dujuse ddəm n-ndəjəse ddəm kə ri Əbbəjeje Jeju karə awje nɛ̂n kə kete kete.

² Mba ə-gərəje nduje kə̂ Əbbə-dəwje Jeju arə n-pa jarəse mban.

³ Nɛ̂n kə̂ Lubba ndiki â to, karə ə-sangəje rɔse mba Lubba, karə ulaje rɔse kaya tə̂ ang.

⁴ Maji karə dəw kâra kâra gərə ta ngəm rɔɛ̂ karə maji tɔyn ddəm, ula pa-nja laa naan tə̂ ang ddəm.

⁵ Arəje bbo kə̂ da-rɔ tə̂ dɔrɔ â ddase tokə aw dda dəwje kə̂ gərəje Lubba ang le ang.

⁶ Mə tar tə̂ nəənn, maji karə dəw kâra dda marə nɛ̂n kə̂ maji ang kə ngokɔɛ̂n ang ddəm ula nje-marɛ̂ naan tə̂ ang ddəm. Mba n-pa jarəse ngaâ n-ndɔru mbise nya mbɛɛ̂ mban. Əbbə-dəwje a kinya dəwje tɔyn kə̂ aw ddaje nɛ̂nje kə̂ baann baa ang.

⁷ Mba Lubba bbarje karə n-sangəje rɔje mbɛɛ̂ bbo karə jula rɔje mə nɛ̂n-yərəw tə̂ ang.

⁸ Yeenn bba bbo dəw kə̂ mbətə nduje nəənn a, to dəw â n̂-mbəte ang, Lubba kə̂ arəse Ndil-mə-nda laa â n̂-mbəte.

⁹ Nɛ̂n kə̂ ɔju dɔ ndiki naan to ngakɔn-naan njaa le, to nɛ̂n kə̂ dəw a təl kuja tarɛ̂ makəturu tə̂ kula nɛ̂n karəse ang ngaa. Mba Lubba tɔjuse ddəw ndiki naan mban.

¹⁰ Aw ə-ndikije ngakɔnje kə̂ Maseduwann tə̂ tɔyn tokə baann mban. A n-ndəjəse karə ə-ddaje arə uta yeenn bbay.

¹¹ Maji karə ə-sangəje ddəw ta kisi kə mə-wul-lɔm, ta undaje kəmse kə dɔ nɛ̂nje tə̂ ləse njaa, ta ə-ddaje kula kə jise njaa ddəw kâra baa kə ndu kə̂ junn jarəse.

¹² Baann bba pa-nja ləse a dda karə dəwje kə̂ ooje məde tə̂ ang bbəəlse. Ngaâ â ddeeje to nɛ̂n-koto dɔ dəw tə̂ ang.

Lubba a ndol dəwje kə̂ oyje

¹³ Ngakɔnje, n-ndiki ta karə ə-gərəje tar dɔ dəwje tə̂ kə̂ oyje, bba karə uwaje ndoo tokə lə kəsə dəwje ang. Mba dede dundaje məde dɔ marə nɛ̂n tə̂ kâra ang.

¹⁴ Bbo jooje məje tə̂ to Jeju oy ngaâ Lubba ndole a, jooje məje tə̂ tɔ to Lubba a ndol dəwje kə̂ ooje məde tə̂ kə Jeju bba oyje, karə disije kə Jeju kâra baa.

¹⁵ Ddəw kâra baa tokə Əbbə-dəwje pa le, nɛ̂n kə̂ n-pa jarəse â nəənn: Jeje kə̂ ja naynje kəm baa ndərəng ndɔ ddee tə̂ lə Əbbə-dəwje, ja kaw kete karə dəwje kə̂ oyje le ang.

¹⁶ Mba ja kooje marə ndu kə̂ Lubba a kunn, ndu marə mbay lə anjəje a bbar ngaâ kɔru təbbə lə Lubba a bbar mə dara tə̂, a ne Əbbə-dəwje njaa nâ kin darâ ddisi. Dəwje kə̂ ooje məde tə̂ kə Kristə bba oyje a ndolje dɔngɔr.

¹⁷ Goe tə̂ a, jeje kə̂ ja n-naynje kəm baa bbay le, dâ kotoje kə de kâra baa mə mum tə̂, ta kaw kinga nɛ̂n Əbbə-dəwje mə dara tə̂. Yeenn ngaâ ja naynje kə Əbbə-dəwje kə ndɔ kə ndɔ.

¹⁸ Yeenn a, maji karə ə-ndəjəje naan kə tarje nəənn bba karə ubbaje singa.