1 Tesalonisinyɛje 3 - Dɔnɔn kə̂ Siki: Tar kə̂ aw arə təbbə

¹ N-tɔ wurje n-nginan ndərəng pin a, joo maji ta nayn kə karəje baa Atɛnn.

² Ngaâ jula ngokɔnje Timɔte jarəse. Ne le naw numanje kula tə̂ lə Lubba mba kila mbər Tar kə̂ Maji lə Kristə. Julɛ̂ bba karə n̂-dda narə ingaje singa ddəm karə uwaje arəje ngəng ddəw mə-kunn tə̂ ləse ddəm.

³ Baann bba karə mə nɛ̂n-singaje tə̂ kə̂ aw ingase nəənn, dəw kâra təl kə guku ang. Mba ə-gərəje kə majɛ̂ to, nɛ̂n-singaje kə̂ baann le a kingajeje njaa.

⁴ Kar kə̂ n-nayn rɔse tə̂ le, n-pa jarəse to ja kooje ndoo nya njaa. A nɛ̂n kə̂ n-pa le njaa tee arə sese kara ə-gərəje kə majɛ̂.

⁵ Mba yeenn bba, m-tɔ wurum pin le ngaâ, mula Timɔte karə aw oo tar dɔ mə-kunn tə̂ ləse. M-bbəəl mba karə Əsu in nanse arə kulaje ləje ddee to nɛ̂n kə̂ baa.

⁶ A bbasinɛn Timɔte le in rɔse tə̂ təl ngaa. N̂-pa tar kə̂ maji dɔ mə-kunn tə̂ ləse kə dɔ ndiki tə̂ kə̂ to məse tə̂ narəje. N̂-pa narəje nan aw əjəjeje dɔje tə̂ kə ndɔ tɔyn ngaâ maal kooje aw ddase tokə jeje kara maal təl koose aw ddaje le tɔ.

⁷ Yeenn bba ngakɔnjeje, mə nɛ̂n-singaje tə̂ tɔyn kə mə nɛ̂n kəm-to-ndooje tə̂ tɔyn kə̂ aw ingajeje, jaw jubba singa mba mə-kunn ləse.

⁸ Bbasinɛn dɔje ndol, mba aw uwaje arəje ngəng ddəw mə-kâra tə̂ kə̂ ə-ddaje kə Əbbə-dəwje.

⁹ Wooyo kə̂ baânn â ja karə Lubba mbase, karə asə kəm rɔ-nəəl kə̂ jinga mbase nɔn Lubba tə̂ ləje le wa?

¹⁰ Til kə kar, jaw duju Lubba nya karə ɔru ddəw arə jaw joose, bba karə ingaje nɛ̂n kə̂ du mə-kunn tə̂ ləse.

¹¹ Maji karə Bɔjeje Lubba njaa kə Əbbəjeje Jeju, dɔruje ddəw darə jaw tee rɔse tə̂!

¹² Maji karə Əbbə-dəwje dda arə ndiki kə̂ aw ndikije naan kə ndiki kə̂ aw ndikije nɛ̂n dəwje tɔyn aw kə kete kete, tokə ndiki kə̂ jaw ndikise le tɔ.

¹³ Maji karə narə ubbaje singa ngaâ n̂-dda narə ə-ddeeje to dəwje kə̂ maji tɔyn ddəm dəwje kə̂ tar kâra to dɔde tə̂ ang ddəm nɔn Bɔjeje Lubba tə̂, ndɔ tə̂ kə̂ Əbbəjeje Jeju a ddee, ne kə dəwje laa tɔyn. Amɛnn!