1 Tesalonisinyɛje 2 - Dɔnɔn kə̂ Siki: Tar kə̂ aw arə təbbə

Kula kə̂ Pɔl dda bbe tə̂ kə̂ Tesalonikə

¹ Ngakɔnʼmje, sese njaa ə-gərəje kə majɛ̂ to tee kə̂ n-tee rɔse tə̂ le, ture to baa ang.

² Ə-gərəje kə majɛ̂ to joo ndoo ngaâ dəwje tajije bbe tə̂ kə̂ Pilipi. A Lubba arə jubba singa mə nɛ̂n-singaje tə̂ nya nya, narə jila mbər Tar kə̂ Maji laa jarəse.

³ Tarje kə̂ jaw pa jarəse le ngəm ɔru ang ddəm nɛ̂n-yərəw ɔru ang ddəm kəjə kə̂ maji ang kâra ɔru ang ddəm.

⁴ A Lubba nanje oo bba inya Tar kə̂ Maji laa le mə jije tə̂. Yeenn bba jaw pa tar lə Lubba mba nəəl nɛ̂n kəm dəwje tə̂ ang. Jaw pa mba nəəl nɛ̂n kəm Lubba tə̂ kə̂ aw nan məje.

⁵ Sese kara ə-gərəje kə majɛ̂, jaw pa tarje ta kərə nɛ̂n dəw ndɔ kâra ang ngaâ kəjə ləje to dɔ nɛ̂n-kinga tə̂ ndɔ kâra ang. Lubba njaa kara a kɔru naji ləje.

⁶ Jaw sangə ddəw ta kinga piti ta dəwje tə̂ ang ddəm tase tə̂ ang ddəm ta marə dəwje tə̂ ang ddəm.

⁷ Kə tɔkɔrɔ tə̂, n-to njê-kaw-kulaje lə Kristə, yeenn a, jee kə ddəw ta nya dɔse tə̂ njaa. A n-dda bba n-wul pee horose tə̂, tokə lə kɔn ngannje kə̂ aw ngəm ngannɛ̂.

⁸ N-ndikise nya, n-to ngɔsi ta pa Tar kə̂ Maji lə Lubba karəse ddəm ta karə təbbə ləje njaa mbase ddəm. Mba ə-ddeeje to dəwje kə̂ n-ndikise nya.

⁹ Ngakɔnje, oleje məse dɔ kulaje tə̂ ləje kə dɔ ndoo tə̂ kə̂ joo. Til kə kar, n-dda kula bba ta ddee to nɛ̂n-koto dɔ dəw tə̂ kâra horose tə̂ ang. Baann â jila nɛ̂n mbər Tar kə̂ Maji lə Lubba jarəse.

¹⁰ Ə-toje to njê-tar-najije ləje, sese ddəm Lubba ddəm. Pa-nja ləje horose tə̂ see njê-mə-kunnje to pa-nja kə̂ nɛ̂n-yərəw ɔru ang, to pa-nja kə̂ gatə gatə, kə̂ tar to dɔɛ tə̂ ang.

¹¹ Ə-gərəje to, n-dda nɛ̂n kə se kâra kâra tɔyn tokə bɔ aw dda kə ngannɛ̂.

¹² N-ndəjəse, n-dda jarə ubbaje singa ngaâ n-dujuse nya karə pa-nja ləse to tokə ye kə̂ Lubba ndiki, ne kə̂ n̂-bbarse karə andəje mə Bbe-kɔn tə̂ laa, karə ingaje Piti laa saa.

¹³ Jaw jarə wooyo Lubba kə ndɔ tɔyn mba kar kə̂ jila mbər tar lə Lubba jarəse le, ooje ngaâ ə-taaje to tar lə Lubba njaa, bbo to tar lə dəwje ang. Tar le aw dda kula məse tə̂, see njê-mə-kunnje.

¹⁴ Ngakɔnje kə̂ Tesalonikə, ə-ndajije nɛ̂n-dda lə dəwje kə̂ Egilisi tə̂ kə̂ nangə tə̂ kə̂ Jude mban, dede kə̂ dooje məde tə̂ kə Jeju-Kristə le. Dede le dooje ndoo ji Jiipije tə̂, a bbasinɛn sese kara njê kə̂ ləse njaa aw ula kəmse ndoo tə̂ tokə baann tɔ.

¹⁵ Jiipije â tɔlje Əbbə-dəwje Jeju kə njê-kilaje mbər tar lə Lubba. Dulaje kəmje ndoo tə̂ tɔ. N̂-nəəlje kəm Lubba tə̂ ang ngaâ n̂-toje to njê-baanje lə dəwje tɔyn.

¹⁶ Dɔkuje ddəw kila mbər tar karə dəwje kə̂ toje to Jiipije ang darəje dəwje le ingaje kaji ang. Nɛ̂ɛnn dda arə majangje lə Jiipije le uta dɔɛ̂. A ta tee kɔnyɛ̂ tə̂ a, wungu lə Lubba oso dɔde tə̂.

Pɔl ndiki ta təl koo njê kə̂ Tesalonikə

¹⁷ Ngakɔnje, jinya naan mba gɔju kar. Ja kooje naan ang, a məje tə̂ jinyase ang. A n-dda singa nya tɔ ta təl koose, mba maal təl koose ddaje nya.

¹⁸ Mba yeenn bba, n-ndiki ta təl kaw rɔse tə̂. Ngaâ əman Pɔl njaa m-sangə ddəw gɔl banya nya ta kaw. A Satan ɔkuje ddəw.

¹⁹ Sese â jaw junda məje dɔse tə̂, sese â ja kinga rɔ-nəəl mbase, sese tɔ â, â toje to nɛ̂n-piti ləje nɔn Əbbə-dəwje Jeju tə̂ ndɔ tə̂ kə̂ nâ ddee.

²⁰ Tɔkɔrɔ njaa, ə-toje to nɛ̂n-piti ləje ddəm nɛ̂n-rɔ-nəəl ləje ddəm.